قازاق اكسر حالىق كوميسسارلارى كەڭەسىنىڭ 1927 جىلعى 23 ناۋرىزدا قابىلداعان قاۋلىسى نەگىزىندە 1928 جىلعى قازاندا تۇڭعىش قازاق مەملەكەتتىك ۋنيۆەرسيتەتى اشىلدى. العاشقى كەزدە وندا پەداگوگيكالىق, اۋىلشارۋاشىلىق جانە مەديتسينالىق فاكۋلتەتتەر قۇرۋ جوسپارلاندى. الايدا كەڭ-بايتاق قازاق ساحاراسىنداعى ساۋاتسىزدىقتى جويۋ جونىندەگى كەزەك كۇتتىرمەس مىندەت بارىنەن بۇرىن پەداگوگ كادرلاردى قارقىندى تۇردە دايارلاۋدى تالاپ ەتكەندىكتەن, العاشقى ۋنيۆەرسيتەتتى پەداگوگيكالىق باعىتتا اشۋدى ءومىردىڭ ءوزى ۇسىندى. تۇڭعىش جوعارى وقۋ ورنىندا اۋەلدە فيزيكا-ماتەماتيكا, جاراتىلىستانۋ جانە لينگۆيستيكا-پەداگوگيكالىق بولىمدەردەن قۇرىلعان جالعىز عانا فاكۋلتەت بولدى. تۇڭعىش جوعارى وقۋ ورنى 1930 جىلدان باستاپ قازاق پەداگوگيكالىق ينستيتۋتى (قازپي) دەپ اتالىپ, وعان 1935 جىلى ۇلى ويشىل, اقىن ابايدىڭ ەسىمى بەرىلدى. ول بۇگىندە اباي اتىنداعى قازاق ۇلتتىق پەداگوگيكالىق ۋنيۆەرسيتەتى دەپ اتالادى.
العاشقى كەزدەن باستاپ وقۋ ورنىندا ساپالى ماماندار دايارلاۋ ءۇشىن وقىتۋشى-پروفەسسورلار قۇرامىن بىلىكتى پەداگوگ-عالىمدارمەن جاساقتاۋ ماسەلەسى كۇن تارتىبىنە قويىلدى. قازاق حالقىنىڭ اياۋلى پەرزەنتتەرى, ۇلتىمىزدىڭ ماقتانىشتارى و.جاندوسوۆ, س.اسفەندياروۆ, ا.بايتۇرسىنوۆ, س.سەيفۋللين, ح.دوسمۇحامەدوۆ, ءى.قابىلوۆ, ب.المانوۆ, ت.جۇرگەنوۆ ينستيتۋت قابىرعاسىندا ءدارىس بەرىپ, شاكىرت تاربيەلەۋگە بەلسەنە اتسالىستى. بەلگىلى ءتىل ماماندارى ق.جۇبانوۆ, م.اۋەزوۆ, س.امانجولوۆ, م.جولدىباەۆ, ماتەماتيك ءا.ەرمەكوۆ جانە باسقا دا عالىمدارىمىز وقىتۋشى-پروفەسسورلار قۇرامىنىڭ الدىڭعى ساپىندا بولدى.
ينستيتۋت باسشىلىعى وسىنداي كۇردەلى كەزەڭدە ماسكەۋ مەن لەنينگراد ۋنيۆەرسيتەتتەرىنىڭ كومەگىنە سۇيەندى. ولار قازاق پەداگوگيكا ينستيتۋتىنا كىتاپ قورىمەن, وقۋ جانە ادىستەمەلىك قۇرالدارىمەن, زەرتحانالىق جابدىقتارىمەن كومەكتەسىپ وتىردى. ماسكەۋدەن قازاق پەداگوگيكا ينستيتۋتىندا جۇمىس ىستەۋ ءۇشىن ادەبيەتشى-عالىم ن.فاتوۆ, ماتەماتيك ب.كرۋگلياك, فيزيكا مامانى ۆ.ليتۆينوۆ, بيولوگيا عىلىمدارىنىڭ دوكتورى س.لوگينوۆ, ەمبريولوگ ا.زاحۆاتكين سياقتى كوپتەگەن بەلگىلى عالىمدار كەلدى. سوناۋ قازان توڭكەرىسىنەن بۇرىن اعارتۋشىلىق ۇران تاستاپ, بۇكىل قازاق جۇرتىن ءدۇر سىلكىندىرگەن احمەت بايتۇرسىن ۇلى سول كەزدىڭ وزىندە-اق حالقىم ءبىلىمدى جۇرتپەن تەڭەسسە ەكەن دەپ, جاس ۇرپاققا ارناپ ونەگەلى سوزدەر, وقۋلىقتار جازسا, الماتىدا تۇڭعىش قازاق ۋنيۆەرسيتەتىن اشۋعا دا جانتالاسا ۇلەس قوسقان قايراتكەرلەرىمىزدىڭ ءبىرى بولعان. احاڭ قازاقستاننىڭ تۇڭعىش جوعارى وقۋ ورنىندا ستۋدەنتتەرگە ءتىل بىلىمىنەن ءدارىس وقىدى, ءتىل جانە ادەبيەتتەن ء«تىل – قۇرال», «ادەبيەت تانىتقىش», جۇسىپبەك ايماۋىتوۆ «پسيحولوگيا» («جانتانۋ»), ماعجان جۇماباەۆ «پەداگوگيكا» وقۋلىقتارىن جازدى.
ساكەن سەيفۋلليننىڭ قازاق ادەبيەتى تاريحىنان وقىعان لەكتسيالارى دا تىڭداۋشىلارىن ءبىلىم ايدىنىنا قاناتتاندىرا ءتۇستى. كورنەكتى مەملەكەت جانە قوعام قايراتكەرلەرى وراز جاندوسوۆ پەن حالەل دوسمۇحامەدوۆ تە وقۋ ورنىن قالىپتاستىرۋ ىسىنە بەلسەنە اتسالىسىپ, بولاشاق مامانداردى تاربيەلەۋگە ولشەۋسىز ۇلەس قوسقان ۇلاعاتتى ۇستازدار بولدى. العاشقى جوعارى وقۋ ورنىن اشۋعا, ونى قالىپتاستىرۋعا زور ەڭبەك سىڭىرگەن العاشقى رەكتور سانجار اسفەندياروۆ ەسىمىن ەرەكشە ىلتيپاتپەن اتاعان ءجون. ونىڭ قاستەرلى ەسىمى وقۋ ورنىنىڭ تاريحىندا التىن ارىپتەرمەن جازىلدى. اراب, پارسى, اعىلشىن, فرانتسۋز تىلدەرىن جەتىك مەڭگەرگەن, قالا بەردى وقۋ-اعارتۋ ءىسىنىڭ قايراتكەرى, دارىندى عالىم, كورنەكتى مەملەكەت قايراتكەرى س.اسفەندياروۆ ۋنيۆەرسيتەتتىڭ ۇيىمداستىرۋشىلىق جۇمىسىن جان اياماي اتقاردى, العاشقى ستۋدەنتتەردى قابىلدادى. وقۋ ورنىنىڭ وقۋ-ماتەريالدىق بازاسىن قالىپتاستىرۋعا, ونى وقۋلىقپەن, وقىتۋشىلارمەن قامتاماسىز ەتۋگە ولشەۋسىز ۇلەس قوستى. ول 1930 جىلى الماتى مەديتسينا ينستيتۋتىن اشۋعا دا بەلسەنە اتسالىسىپ, ونىڭ دا العاشقى رەكتورى, كەيىن رەسپۋبليكا دەنساۋلىق ساقتاۋ حالىق كوميسسارى جانە حالىق اعارتۋ كوميسسارى بولدى. وسى رەتتە قازاقتىڭ كورنەكتى اقىن-جازۋشىلارى, مەملەكەت جانە قوعام قايراتكەرلەرى, بىلىكتى مۇعالىم كادرلارى مەن عالىمدارىنىڭ ۇلكەن شوعىرى وسى قازپي-دەن شىققانىن ەرەكشە اتاپ وتكەن ءجون. مۇحتار اۋەزوۆ, قاجىم جۇماليەۆ, قۇدايبەرگەن جۇبانوۆ جانە ت.ب. عالىمدار وقۋ ورنىندا ۇستازدىق ەتتى. قازپي پروفەسسورلارى قازاقستانداعى باسقا دا جوعارى وقۋ ورىندارىنا ارناپ ماماندار دايارلاۋ ىسىنە بەلسەنە اتسالىستى. العاشقى جىلداردان باستاپ ينستيتۋت باستاۋىش جانە ورتا مەكتەپتەردىڭ بىلىكتى ماماندارىن دايارلاپ شىعارا باستادى. ۋاقىت وتكەن سايىن ماماندار دايارلاۋ ساپاسى اناعۇرلىم جاقساردى, ستۋدەنت-شاكىرتتەردى وقىتىپ-تاربيەلەۋدىڭ ساليقالى داستۇرلەرى قالىپتاستى. وقۋ ورنى عىلىمي ويدىڭ ورتالىعىنا اينالدى. ءتىل مەن ادەبيەت, تاريحقا قوسا جاراتىلىستانۋ عىلىمدارىنىڭ سان سالاسى بويىنشا دا العاشقى زەرتتەۋلەر جۇرگىزىلدى. سونىمەن وتىزىنشى جىلداردىڭ اياق كەزىندە تاجىربيە جيناقتاۋى, ماتەريالدىق-تەحنيكالىق بازاسىنىڭ نىعايتىلۋى, بىلىكتى عىلىمي-پەداگوگيكالىق كادرلار قاتارىنىڭ كوبەيۋى جاعىنان قازپي-ءدىڭ وقۋ-عىلىمي ورتالىعى رەتىندەگى ءرولى ولشەۋسىز ءوستى.
ۇلى وتان سوعىسى باستالعاندا 1941-1945 جىلدارداعى قازپي-ءدىڭ كوپتەگەن ستۋدەنتى مەن وقىتۋشىسى مايدانعا اتتاندى. ۇرىس دالاسىندا كورسەتكەن ەرەن ەرلىكتەرى ءۇشىن قازپي-ءدىڭ وقىتۋشىلارى مەن ستۋدەنتتەرى جوعارى مەملەكەتتىك ناگرادالارعا يە بولدى. ماسكەۋدى نەمىس-فاشيست باسقىنشىلارىنان قورعاۋداعى ەرەن ەرلىگى ءۇشىن اتقىشتار باتالونىنىڭ ساياسي جەتەكشىسى مالىك عابدۋللين كەڭەس وداعىنىڭ باتىرى اتاعىنا يە بولدى. ءوزى باتىر, ءوزى ادەبيەتشى-عالىم مالىك عابدۋللين كەيىنىرەك قازپي-ءدى ۇزاق جىل باسقارىپ, ونىڭ دامۋىنا ولشەۋسىز ۇلەس قوسقان قايراتكەر. سونداي-اق قازپي-ءدىڭ بەلگىلى وقىتۋشىلارى مەن ستۋدەنتتەرى لەسبەك جولداسوۆ, قاناش قامزين, قۇدايبەرگەن سۇراعانوۆ, راحىمجان توقاتاەۆ, احمەديار قۇسايىنوۆ, ءسادۋ شاكىروۆ, ەۆگەني برەۋسوۆ مايدانداعى جانقيارلىق ەرلىكتەرى ءۇشىن كەڭەس وداعىنىڭ باتىرى اتانىپ, ومىراۋلارىنا التىن جۇلدىز تاقتى. سوعىستان كەيىنگى جىلدارى مەكتەپتەردە مۇعالىم كادرلارعا دەگەن قاجەتتىلىك كۇرت ءوستى, سوندىقتان ستۋدەنتتەردى قابىلداۋ, اسىرەسە سىرتتاي وقۋعا قابىلداۋ سانى ەسەلەي ارتتى. ەگەر 1946 جىلى كۇندىزگى ءبولىمنىڭ ءبىرىنشى كۋرسىنا 362 ستۋدەنت قابىلدانسا, سول جىلى ينستيتۋتتى سىرتتاي 60 ادام عانا ءبىتىردى. ال 1956 جىلى كۇندىزگى بولىمگە 567 ستۋدەنت وقۋعا تۇسسە, سىرتتاي وقۋدى 594 ادام ءتامامدادى.
اباي اتىنداعى قازپي 1978 جىلعى ءوزىنىڭ 50 جىلدىق مەرەيتويىن لايىقتى تابىستارمەن قارسى الدى. كورنەكتى ادەبيەت, مادەنيەت جانە عىلىم قايراتكەرلەرى س.امانجولوۆ, ح.بەكحوجين, ق.جۇماليەۆ, و.جاۋتىكوۆ, م.قاراتاەۆ, ا.ىسقاقوۆ, ا.قالىباەۆا, س.قيراباەۆ, ا.نۇسىپبەكوۆا, ش.ساتپاەۆا, ر.سىزدىقوۆا – وسى وقۋ ورنىنىڭ ماقتان تۇتار تۇلەكتەرى. ولار قازپي-دە ماماندار دايارلاۋ ىسىنە ولشەۋسىز ۇلەس قوستى. ءبىز بۇگىن قازاق ءبىلىم وردالارىنىڭ قارا شاڭىراعىندا ءبىلىم العان تۇلەكتەردىڭ ىشىنەن ەلىمىزدىڭ عىلىم, ءبىلىم, مادەنيەت سالالارىن دامىتۋعا ولشەۋسىز ۇلەس قوسقان بەلگىلى عىلىم جانە قوعام قايراتكەرلەرى م.ابدىحالىقوۆا, ت.تاجىباەۆ, ا.زاكارين, ك.ايمانوۆ, ا.سەمباەۆ, ن.ءجاندىلدين, ب.بولتىرىكوۆا, ءا.ءشارىپوۆ, ە.مامبەتقازيەۆ, ءو.جانىبەكوۆ, م.احمەتوۆا, ا.تۇماربەكوۆا سياقتى اعا ۇرپاق وكىلدەرىنىڭ ەسىمىن قۇرمەتپەن اتايمىز. سەكسەنىنشى جىلدارى ينستيتۋتتا جۇرگىزىلگەن عىلىمي-زەرتتەۋ جۇمىستارىندا حالىققا ءبىلىم بەرۋ جۇيەسىندەگى كۇردەلى ماسەلەلەر زەرتتەلىپ, وقۋ-ادىستەمەلىك كونفەرەنتسيالار جىل سايىن وتكىزىلدى. تاۋەلسىزدىكتىڭ العاشقى جىلدارىندا كەزدەسكەن ەكونوميكالىق قيىندىقتارعا قاراماستان, 1992 جىلى 24 قاراشادا قازاقستان رەسپۋبليكاسى ۇكىمەتىنىڭ شەشىمىمەن اباي اتىنداعى قازمپۋ الماتى مەملەكەتتىك ۋنيۆەرسيتەتى (المۋ) بولىپ كلاسسيكالىق ۇلگىدە قايتا قۇرىلدى.
2003 جىلى 26 قىركۇيەكتە ەلباسى نۇرسۇلتان نازارباەۆتىڭ №1201 جارلىعىمەن قازاق جوعارى ءبىلىمىنىڭ قارا شاڭىراعى «اباي اتىنداعى قازاق ۇلتتىق پەداگوگيكالىق ۋنيۆەرسيتەتى (قازۇپۋ)» بولىپ قايتا قۇرىلىپ, «ۇلتتىق» مارتەبەنى يەلەندى. 2007 جىلى 24 قىركۇيەكتە ۋنيۆەرسيتەت جوعارى ءبىلىم كوشباسشىلارىنىڭ وكسفوردتاعى سامميتىندە ( ۇلىبريتانيا) ء«ححى عاسىر كوشباسشىلارى» باعدارلاماسى اياسىندا «بىرىككەن ەۋروپا» جانە «ەۋروپالىق ساپا» ءتارىزدى حالىقارالىق ماراپاتتارعا يە بولدى. ال 2007 جىلى ۋنيۆەرسيتەتكە «ساپا سالاسىنداعى جەتىستىگى ءۇشىن» قازاقستان رەسپۋبليكاسى پرەزيدەنتىنىڭ سىيلىعى, «التىن ساپا» بەلگىسى تاپسىرىلدى. ۋنيۆەرسيتەتىمىزدىڭ بۇل تابىسىندا وقۋ ورنىن ءار جىلدارى باسقارعان سانجار سەيىتجاپپار ۇلى اسفەندياروۆ, بايمەن المان ۇلى المانوۆ, سەرعالي ەسپەمبەت ۇلى تولىبەكوۆ, حالەل مۇحامەدجان ۇلى ادىلگەرەەۆ, احمەدي ىسقاق ۇلى ىسقاقوۆ, اسقار زاكاريا ۇلى زاكارين, مالىك عابدوللا ۇلى عابدۋللين, جۇمابەك جۇنىسبەك ۇلى جۇنىسبەكوۆ, قۇلجاباي ابدىقالىق ۇلى قاسىموۆ, توقمۇحامەد سالمەن ۇلى سادىقوۆ, سەرىك جايلاۋ ۇلى پىراليەۆ سىندى بەلگىلى عىلىم, مەملەكەت جانە قوعام قايراتكەرلەرىنىڭ ۇلەسى زور.
بۇگىندە ۋنيۆەرسيتەت ۇجىمى مەملەكەت باسشىسىنىڭ قازىرگى تاڭداعى ءبىلىم ساياساتى مەن العا قويعان مىندەتتەرىن جۇزەگە اسىرۋ ءۇشىن جۇمىلا ەڭبەك ەتۋدە. وسى ورايدا ايتا كەتۋ كەرەك, ءبىزدىڭ ۋنيۆەرسيتەت ءوزىنىڭ ستاتۋسىنا ساي ء«بىلىم», «گۋمانيتارلىق عىلىمدار», «جاراتىلىستانۋ عىلىمدارى», «تەحنيكالىق عىلىمدار جانە تەحنولوگيالار», «الەۋمەتتىك عىلىمدار جانە بيزنەس», «ونەر», «قۇقىقتانۋ» ماماندىقتارى بويىنشا جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى ءىرى عىلىم جانە ءبىلىم ورتالىعى. سونىمەن بىرگە الەۋمەتتىك جانە گۋمانيتارلىق عىلىمدار بويىنشا حالىقارالىق قاتىناستار جانە قۇقىقتانۋ, ەكونوميكا جانە بيزنەس, پەداگوگيكالىق ءبىلىم بەرۋ سالالارىندا عىلىمي-پەداگوگيكالىق كادرلار دايىندايتىن كوپ سالالى ورتالىق. بۇگىنگى تاڭدا 135 ماماندىق بويىنشا ءبىلىم بەرەدى. وسى تۇستا بىلتىردان باستاپ وقۋ ورنىندا جاڭا ۇيىمداستىرۋ قۇرىلىمى ەنگىزىلگەنىن تىلگە تيەك ەتسەك ورىندى. بۇگىندە ۋنيۆەرسيتەتتىڭ ءبىلىم بەرۋ قىزمەتىن مامانداندىرىلعان 7 وقۋ ينستيتۋتى ىسكە اسىرادى. اتاپ ايتساق, ولار – پەداگوگيكا جانە پسيحولوگيا; ماتەماتيكا, فيزيكا جانە ينفورماتيكا; فيلولوگيا جانە كوپتىلدى ءبىلىم بەرۋ; ونەر, مادەنيەت جانە سپورت; جاراتىلىستانۋ جانە گەوگرافيا; تاريح جانە قۇقىق; «سوربوننا-قازاقستان» ينستيتۋتتارى مەن شەتەلدىك ازاماتتارعا ارنالعان جانە جوعارى وقۋ ورنىنا دەيىنگى دايىندىق فاكۋلتەتى. ۋنيۆەرسيتەتتە مامان دايىنداۋ باعىتتارى بويىنشا 36 كافەدرا, سونىمەن قاتار 4 جالپى ۋنيۆەرسيتەتتىك كافەدرا – اسكەري كافەدرا, دەنەشىنىقتىرۋ جانە سپورت كافەدراسى, پەداگوگيكا كافەدراسى, ساياساتتانۋ جانە الەۋمەتتىك-فيلوسوفيالىق پاندەر كافەدراسى جۇمىس ىستەيدى. عىلىمي زەرتتەۋ ينستيتۋتتارى مەن عىلىمي ورتالىقتار عىلىمي يننوۆاتسيالىق پاركى (عيپ) بولىپ قايتا قۇرىلدى. سونداي-اق بىرنەشە جاڭا قۇرىلىمدىق بولىمشەلەردى اشىپ, جۇيەگە قويدىق. مىسالى, بىلىكتىلىكتى ارتتىرۋ جانە قاشىقتىقتان وقىتۋ ورتالىعى, ستۋدەنتتەرگە تسيفرلى قىزمەت كورسەتەتىن «شاپاعات» ورتالىعى, ءبىلىمدى اقپاراتتاندىرۋ ماسەلەلەرى جانە ءبىلىم تەحنولوگيالارى حالىقارالىق عىلىمي زەرتحاناسى, قازاقستان حالقى اسسامبلەياسى كافەدراسى, قارجىلىق تالداۋ ءبولىمى, ۋنيۆەرسيتەت بيۋدجەتىن جوسپارلاۋ جانە ونىڭ ورىندالۋىن باقىلايتىن بيۋدجەت كوميتەتى قۇرىلدى. ۋنيۆەرسيتەتتە 8 ديسسەرتاتسيالىق كەڭەس, جاس عالىمدار كەڭەسى, يۋنەسكو پەداگوگيكاسى كافەدراسى, عىلىمي كىتاپحانا جانە «ۇلاعات» باسپاسى جۇمىس ىستەيدى. اباي اتىنداعى قازۇپۋ الەمدەگى ۇزدىك ۋنيۆەرسيتەتتەر قاتارىندا جىل سايىن ءوز پوزيتسياسىن جاقسارتىپ كەلەدى.
QS World University Rankings الەمدىك رەيتينگىندە 2018 جىلدىڭ قورىتىندىسى بويىنشا ۋنيۆەرسيتەت 481-ورىندى يەلەندى (2017 جىلى – 491- ورىن).
2018 جىلى Emerging Europe&Central Asia ەۋروپا مەن ورتالىق ازيانىڭ دامىپ كەلە جاتقان 30 ەلىندەگى 200 ۇزدىك ۋنيۆەرسيتەتتەر اراسىندا 86-ورىندا تۇرسا (2017 جىلى – 91-ورىن), رەسپۋبليكانىڭ پەداگوگيكالىق جوعارى وقۋ ورىندارى اراسىندا كوش باستاپ كەلەدى. ءبىلىم سالاسىنداعى ساپانى قامتاماسىز ەتۋ جونىندەگى قازاقستان تاۋەلسىز اگەنتتىگىنىڭ باس رەيتينگىندە پەداگوگيكالىق ماماندىقتارعا ارنالعان 32 ءبىلىم بەرۋ باعدارلاماسى ۇزدىك ۇشتىككە ەندى. ۋنيۆەرسيتەتتىڭ 51 وقۋ باعدارلاماسى حالىقارالىق جانە ۇلتتىق اككرەديتاتسيادان ءوتتى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتى ەرەكشە مارتەبەسى بار ەلىمىزدىڭ جەتەكشى پەداگوگيكالىق جوعارى وقۋ ورنى رەتىندە ەلىمىزدە پەداگوگيكالىق كادرلاردى دايىنداۋدى وقۋ-ادىستەمەلىك جانە عىلىمي-ادىستەمەلىك قامتاماسىز ەتۋ ورتالىعى بولىپ تابىلادى. شەتەلدىك ارىپتەستەرمەن بىرگە دايىندالعان پەداگوگيكالىق ماماندىقتار بويىنشا جاڭا ۇلگىدەگى وقۋ باعدارلامالارىن ەنگىزۋ جۇمىستارى جولعا قويىلعان. كوپتىلدى ءبىلىم بەرۋگە باعىتتالعان كەمبريدج, ساسسەكس ۋنيۆەرسيتەتتەرى عالىمدارىمەن جانە ەلىمىزدىڭ پەداگوگيكالىق جوو-لارىمەن, مەكتەپ ۇستازدارىمەن بىرگە فيزيكا, ينفورماتيكا, حيميا, بيولوگيا ماماندىقتارىن اعىلشىن تىلىندە وقىتۋعا ارنالعان وقۋ باعدارلامالارى ازىرلەندى.
ۋنيۆەرسيتەتتىڭ وسى ءبىلىم بەرۋ باعدارلامالارىن وقۋ-ادىستەمەلىك قامتاماسىز ەتۋ ءۇشىن 19 وقۋلىق اعىلشىن تىلىندە دايىندالدى. ۋنيۆەرسيتەتتە باكالاۆريات, ماگيستراتۋرا جانە دوكتورانتۋرادا 13 ماماندىقتى اعىلشىن تىلىندە وقىتۋ قولعا الىندى. وسى ورايدا ەلىمىزدىڭ ورتا ءبىلىم بەرۋ جۇيەسىندەگى وقۋلىقتاردىڭ 85 پايىزىن ءبىزدىڭ ۋنيۆەرسيتەتىمىزدىڭ عالىمدارى جازعانىن اتاپ وتكەنىم ءجون سياقتى.
وقۋ ورنى قىزمەتىندە حالىقارالىق ىنتىماقتاستىق ماڭىزدى ورىن الادى. بۇگىنگى تاڭدا اباي اتىنداعى ۋنيۆەرسيتەت 11 حالىقارالىق ۇيىمدارعا, اسسوتسياتسيالارعا مۇشە. الەمنىڭ 23 مەملەكەتىندەگى شەتەلدىك ۋنيۆەرسيتەتتەرمەن بىرلەسكەن جۇمىستار بويىنشا 130 كەلىسىمشارت, مەموراندۋم جاسالدى. 2014 جىلعى قىركۇيەكتە فرانتسيانىڭ 800 جىلدان استام تاريحى بار سوربوننا-پاريج سيتي ۋنيۆەرسيتەتىنىڭ فيليالى «سوربوننا-قازاقستان» ينستيتۋتى اشىلعانى ۋنيۆەرسيتەت ومىرىندەگى ەلەۋلى وقيعا بولدى. بۇل – پاريج سوربونناسىنىڭ الەمدەگى ەكىنشى, ال ورتالىق ازياداعى ءبىرىنشى فيليالى. ۋنيۆەرسيتەتتە جالپى سانى 790 پروفەسسور-وقىتۋشى ءدارىس وقيدى. عىلىمي دارەجەسى مەن اتاعى بارلار – 528 ادام, ونىڭ 134 عىلىم دوكتورى, پروفەسسور, 349 عىلىم كانديداتى, دوتسەنت جانە 45 PhD دوكتورى ەڭبەك ەتەدى. سونداي-اق بىزدە 14 ۇعا اكادەميكتەرى مەن كوررەسپوندەنت-مۇشەلەرى, 45 باسقا دا قوعامدىق اكادەميالاردىڭ اكادەميكتەرى قىزمەت ىستەيدى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتى ءوز بولاشاعىن زەرتتەۋ ۋنيۆەرسيتەتى رەتىندە دامىتۋ باعدارىن قولعا الۋدا. ۋنيۆەرسيتەتتە عىلىمي زەرتتەۋلەردىڭ باسىم باعىتتارى انىقتالعان. ەلباسى ن.ءا.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەر, ءۇش ءتىلدى ءبىلىم بەرۋ, قازاق ءتىلىن لاتىن الىپبيىنە كوشىرۋ ماسەلەلەرىنە بايلانىستى قازاقستان رەسپۋبليكاسى ءبىلىم بەرۋ جۇيەسىنىڭ مىندەتتەرى, «تسيفرلى قازاقستان» جانە اقپاراتتىق-كومپيۋتەرلىك 3D-تەحنولوگيالار نەگىزىندە جاڭا ءبىلىم رەسۋرستارى بويىنشا زەرتتەۋلەر جۇرگىزىلۋدە. سونداي-اق «تسيفرلى ۋنيۆەرسيتەت», «يننوۆاتسيالىق ۋنيۆەرسيتەت», «الەۋمەتتى جاۋاپتى ۋنيۆەرسيتەت», «جالپىعا قولجەتىمدى اشىق ۋنيۆەرسيتەت», ينفراقۇرىلىمى بويىنشا «جايلى ۋنيۆەرسيتەت», مۇعالىمدەر مەن وقىتۋشىلاردىڭ بىلىكتىلىگىن ارتىرۋدىڭ كوشباسشىسى سياقتى مارتەبەلەرگە قولجەتكىزۋ ءۇشىن كۇرەسۋدە. ۋنيۆەرسيتەت ستراتەگياسىنىڭ باستى ماقساتى – ەڭ وزىق ادىستەر مەن باعدارلامالار نەگىزىندە ءححى عاسىر پەداگوگتەرىن دايارلاۋ, تاياۋ جىلدارى ءبىلىم الۋشىلار سانىن 10 مىڭعا جەتكىزۋ, شەتەلدىك ۋنيۆەرسيتەتتەرمەن بىرلەسە وتىرىپ, پەداگوگيكالىق ماماندىقتار بويىنشا 15-تەن اسا «قوس ديپلومدىق» ءبىلىم بەرۋ باعدارلامالارىن ەنگىزۋ, بىزدە وقيتىن شەتەلدىك ستۋدەنتتەردىڭ ۇلەسىن 5 پروتسەنتكە كوتەرۋ جانە QS World University Rankings الەمدىك رەيتينگىسى بويىنشا 450-ورىنعا كوتەرىلۋ.
جالپى, ۋنيۆەرسيتەتتىڭ ءبىلىم مەن تاربيە جونىندەگى اتقارىپ جاتقان ءىس-قىزمەتى وراسان. ۋنيۆەرسيتەتتىڭ تاريحى تەرەڭ, بولاشاعى ەرەن دەيتىن بولساق, سول تاريحتىڭ باستاۋىندا تۇرعان الاش قايراتكەرلەرىن دە ۋنيۆەرسيتەت ۇجىمى ءبىر ءسات ەستەن شىعارعان ەمەس. قاسيەتتى قارا شاڭىراقتىڭ سان قيلى تاريحىندا ۋنيۆەرسيتەتتىڭ قالىپتاسىپ, دامۋىنا زور ۇلەس قوسقان, كورگەنى مەن تۇيگەنى مول تاجىريبەلى باسشىلار مەن قوعام قايراتكەرلەرىنىڭ الاتىن ورنى ەرەكشە. مۇنىڭ ءبارى كەلەشەك ۇرپاقتىڭ كەمەل تۇلعا بولىپ قالىپتاسۋىنا جارقىن جول اشاتىن ونەگەلى تاربيە قۇرالدارى.
تاكير بالىقباەۆ,
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
الماتى
