سونداي ءتۇيىسۋ نۇكتەسىنىڭ ءبىرى قازاقستان, وزبەكستان جانە تۇرىكمەنستان رەسپۋبليكالارى شەكارالارى باستالاتىن ماڭعىستاۋ وبلىسىنداعى ءۇستىرت قىراتىندا بەلگىلەنگەن. ءۇستىرت ەجەلدەن ساياحاتشىلار مەن گەوگرافتاردىڭ, كەن بارلاۋشىلاردىڭ نازارىن اۋدارىپ كەلە جاتقان مەكەن. مىنە, وسى قىراتتا اتالعان ءۇش مەملەكەت شەكارالارىنىڭ ءتۇيىسۋ نۇكتەسى بەلگىلەنەتىندىگى تۋرالى شارتقا ءۇش ەلدىڭ مەملەكەت باسشىلارىنىڭ قولداۋىمەن سىرتقى ىستەر مينيسترلەرى وزبەكستاننىڭ سامارقاند قالاسىندا 2017 جىلعى 10 قاراشادا قول قويعان. بۇل تۋرالى ءماجىلىستىڭ جالپى وتىرىسىنا شىعارىلعان كەلىسىمدى راتيفيكاتسيالاۋ تۋرالى زاڭ جوباسىن تالقىلاۋ بارىسىندا سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى بايانداپ بەردى. بۇل شارت مەرزىمسىز جانە دەنونساتسيالاۋعا جاتپايدى. دەمەك ودان ەشقاشان باس تارتۋعا بولمايدى دەگەن ءسوز. م.تىلەۋبەردى ءوزىنىڭ سوزىندە «شارتتى راتيفيكاتسيالاۋ – قازاقستان, تۇرىكمەنستان جانە وزبەكستان مەملەكەتتىك شەكارالارىن دەليميتاتسيالاۋ پروتسەسىن اياقتاۋعا, اۋماقتىق داۋلار تۋىنداۋىنىڭ الدىن الىپ, جويۋعا, ەلىمىزدىڭ ۇلتتىق قاۋىپسىزدىگىن نىعايتۋعا ىقپال ەتەدى» دەدى.
زاڭ جوباسىن تالقىلاۋعا قاتىسقان دەپۋتات جەكسەنباي دۇيسەباەۆ ءتۇيىسۋ نۇكتەسىنىڭ گەوگرافيالىق ورنى بۇرىنعى كەڭەستىك كوورديناتالار جۇيەسىمەن گەودەزيالىق جانە توپوگرافيالىق كارتا بويىنشا ايقىندالعانىن ايتا كەلىپ, بالتىق تەڭىزى بيىكتىكتەر جۇيەسى بويىنشا انىقتالاتىن, 1942 جىلدان بەرى قولدانىلىپ كەلگەن كوورديناتالار ەسكىرگەندىكتەن ۇلتتىق كوورديناتالار جۇيەسى قاشان جاسالادى دەگەن سۇراق قويدى. وعان وسى تالقىلاۋعا قاتىسقان اۋىل شارۋاشىلىعى ءمينيسترىنىڭ ءبىرىنشى ورىنباسارى ارمان ەۆنيەۆ جاۋاپ بەرىپ, بۇل ءىستى جاساۋ ءۇشىن قازىر بىرنەشە ۆەدومستۆو بىرلەسىپ, جۇمىس توبىن قۇرىپ قولعا العانىن, ۇلتتىق كوورديناتالار جۇيەسى الدىمىزداعى 5-6 جىلدا دايىن بولاتىنىن ايتتى.
دەپۋتات قۇرالاي قارەكەن ءتۇيىسۋ نۇكتەسى ورنالاسقان جەر وزبەكشە «شور قازاقلى» دەپ اتالاتىنىن, ال مۇنى تۇرىكمەندەر «قازاقلى سور» دەپ اتايتىنىن, ال قازاقشا اتاۋى مۇلدە جوق ەكەنىنە نازار اۋدارىپ, وسىنىڭ ءوزى كەيىن تالاس تۋدىرماي ما دەپ سۇرادى. جاۋاپتا بۇل ماسەلەنىڭ وتە وزەكتى بولىپ, قۇجاتتى ازىرلەۋ بارىسىندا دا نازار اۋدارىلعاندىعى ايتىلدى. ء«بىز قازاقستاننىڭ گەوگرافيالىق اتاۋلارىنىڭ مەملەكەتتىك كاتالوگىنا دا جۇگىندىك, بىراق ناقتى قازاقشا اتاۋ تاپپاعان سوڭ, وسى ەكى اتاۋدى مويىنداۋعا كەلىستىك», دەدى ۆيتسە-مينيستر.
مىنە, وسىنداي قىزعىلىقتى سۇراقتارمەن, ورىندى تالقىلاۋلارمەن زاڭ جوباسى ماقۇلدانىپ, سەناتتىڭ قاراۋىنا جىبەرىلدى. بۇل زاڭ جوباسى ەلىمىزدىڭ شەكاراسىن شەگەندەي تۇسۋدەگى تاعى ءبىر ناقتى قادام بولعانى حاق.
جاقسىباي سامرات,
«ەگەمەن قازاقستان»
