راس, مۇنداي شارالاردىڭ بالاماسى بەلارۋس ەلىندە دە بار, ءتۇرلى اقپاراتتىق فورۋمدار وتكىزىلىپ تۇرادى. بىراق ءار ەلدىڭ ءوز ۇستانىمى بار ەكەنىن ەسكەرسەك, بۇل فورۋمنان كۇتەرىم كوپ ەكەنىن جاسىرمايمىن. مەنىڭ بۇل فورۋمعا كەلگەندەگى نەگىزگى ماقساتتارىمنىڭ ءبىرى – قازاقستاندىق مەديا نارىقتاعى جاڭا تەحنولوگيالار مەن ۇردىستەردى كورۋ, ۇيرەنۋ. سونىمەن بىرگە وسى كۇنگە دەيىن ءوزارا ىنتىماقتاستىق تۇرعىسىندا جاسالعان قازاقستان-بەلارۋس بۇقارالىق اقپارات سالاسىنداعى قارىم-قاتىناستى تەرەڭدەتە ءتۇسۋ. سوڭعى جىلدارى ەكى ەلدە دە باق سالاسىنداعى زاڭناما ۋاقىت تالابىنا ساي جەتىلدىرىلە تۇسكەنى بەلگىلى. بۇل جالپى جۋرناليستيكا پاراديگماسىنىڭ وزگەرىسىنە دە قاتىستى.
مەديا اپتالىق شەڭبەرىندە ءبىز ارىپتەستەرىمىزبەن تەلەۆيزيا سالاسى مەن نورماتيۆتىك-قۇقىقتىق بازا بويىنشا ورتاق جۇزەگە اسىرىپ جاتقان يدەيالارىمىزدى پىسىقتادىق. وسى ورايدا فورۋم اياسىندا ءوزىم قىزىققان كەيبىر مەديا ەلەمەنتتەرگە توقتالا كەتكىم كەلەدى. ماسەلەن, كەشە جابىق پيتچينگكە قاتىستىم. بۇل شارانى تەلەۆيزياداعى يدەيالار جارمەڭكەسى دەسەك تە بولادى. پيتچينگتى مەديا فورۋمدا قولدانۋ مەن ءۇشىن جاڭالىق بولدى, قاتتى ۇنادى, كەلەشەكتە ونى ەلىمىزدە قولدانىسقا ەنگىزگىم كەلەدى. پيتچينگ بەلارۋس مەديا فورۋمدارىندا قولدانىستا جوق. سونىمەن قاتار قازاقستاننىڭ مەديا يندۋسترياسىندا قولدانىلىپ جۇرگەن جاڭا تەحنولوگيالار, جۇيەلەر, تەحنيكالار, جاڭا جابدىقتار بارلىعى قىزىعۋشىلىعىمىزدى ارتتىرۋدا دەسەم, ارتىق ايتپاس ەدىم.
جالپى, قازاقستاندا مەديا سالاسىن تسيفرلاندىرۋ, جاڭا تەحنيكالىق جابدىقتارمەن قامتاماسىز ەتۋ جوعارى دەڭگەيدە. ورتاق ماسەلەلەرىمىز دە جوق ەمەس. بەلارۋس ەلىندە دە كوپتەگەن پوستكەڭەستىك ەلدەردەگى سياقتى تسيفرلاندىرۋ ماسەلەسى, ءداستۇرلى باق-تى ساقتاپ قالۋ, بايلانىستى دامىتۋ وتكىر كۇيىندە تۇر. بىراق قازاقستان وسى تۇرعىدان اۋقىمدى جوبالاردى تىڭنان جۇزەگە اسىرىپ, تازا يدەيا جۇزىندە قالماي, قارىشتاپ دامۋ جولىندا. سول سەبەپتى قازاقستان مەديا سالاسىنداعى ءاربىر ءۇردىس ءبىز ءۇشىن ۇلكەن تاجىريبە بولماق.
وسىدان ءبىر اي بۇرىن بەلارۋس اقپارات مينيسترلىگىنىڭ باستاماسىمەن قۇرامىندا مەديا سالاسىنىڭ كوپتەگەن ماماندارى بار ءبىر توپ دەلەگاتسيا «قازمەديا» ورتالىعىنىڭ قىزمەتىمەن ارنايى كەلىپ تانىستىق. ورتالىقتىڭ نيۋسرۋمدارى مەن ستۋديالارىنا ەكسكۋرسيا جاسادىق, تەحنيكا تۇرلەرىن كوردىك. وكىنىشكە قاراي, ەلىمىزدە مۇنداي ءىرى اقپاراتتىق ورتالىق جوق. «قازمەديا» سەكىلدى كوپتەگەن باق ءتۇرىن ءبىر شاڭىراق استىندا جيناۋ تۋرالى يدەيا ءبىز ءۇشىن تىڭ ەمەس, دەگەنمەن ونى قالاي جۇزەگە اسىرامىز, دۇرىس جولمەن كەلە جاتىرمىز با دەگەن سۇراققا جاۋاپ ىزدەي كەلگەنىمىز شىندىق. مۇنداي ورتالىق ەكونوميكالىق تۇرعىدا ءتيىمدى, سونداي-اق تەلەحابار تاراتۋدا ورتاق ارحيۆتىك بازا بولۋىمەن قۇندى. سىزدەر ءۇشىن مۇنداي وبەكتىنى سالۋ وتكەن تاريح بولسا, ءبىز ءۇشىن ۇلكەن تاجىريبە. ورتالىقتى سالۋ كەرەكتىگى, ونىڭ تيىمدىلىگى ايقىندالدى, ەندىگى جەردە ماسەلە قاراجاتقا بايلانىستى بولماق.
تسيفرلاندىرۋ – الەمدى قامتىعان مەگاترەند. جەر شارىنىڭ ءبىر بولىگىندە ورىن الىپ جاتقان جاڭالىق, ەكىنشى بولىگىنە ەرتە مە, كەش پە جەتەتىنى ايقىن. وسى ورايدا ءبىز اۋديتوريامىزدىڭ باعىتى مەن سۇرانىسى قىزمەتىنە نازار اۋدارۋعا ءماجبۇرمىز. مەن قاتىسقان وڭىرلىك باق فورۋمىندا وسى ماسەلەلەر وتە ورىندى كوتەرىلدى. جالپى, مەديا اپتالىقتىڭ العاشقى ەكى كۇنىنەن العان اسەرىم مەن جاڭالىعىم مول ەكەنىن ايتقىم كەلەدى.
پاۆەل لەگكي,
بەلارۋس اقپارات ءمينيسترىنىڭ ءبىرىنشى ورىنباسارى
