فەستيۆالدىڭ نەگىزگى بايقاۋىنا 109 ەلدەن 1800-دەن استام فيلم كەلىپ تۇسكەن. ناتيجەسىندە, نەگىزگى بايقاۋعا وتاندىق «وزەن» فيلمىنەن باسقا, ەۋروپا, ازيا جانە افريكا رەجيسسەرلەرى تۇسىرگەن 15 فيلم ىرىكتەلىپ الىندى. فەستيۆالدىڭ اشىلۋ سالتاناتىندا برەدلي كۋپەردىڭ رەجيسسەرلىق دەبيۋتى – «جۇلدىز تۋىلدى» ميۋزيكلى كورسەتىلەدى.
اتالعان حالىقارالىق كينوفەستيۆالدىڭ قازىلار القاسىنىڭ قۇرامىنا رەجيسسەر بريليانتە مەندوسا, پروديۋسەر برايان بەرك جانە تارانە اليدوستي جانە كاحو مينامي سەكىلدى اكتريسالار, رەجيسسەر ءارى پروديۋسەر ستەنلي كۆان كىردى.
«ەمير بايعازين – قازاقستان اتىنان ۇسىنىلىپ وتىرعان «وزەن» ءفيلمىنىڭ رەجيسسەرى. بۇل فيلم ەرەكشە كوركەم تۇسىرىلگەن. ەمير بايعازين – وسى ەسىمدى ەستەن شىعارماڭىزدار», – دەدى فەستيۆالدىڭ ديرەكتورى يوسي ياتابە ءفيلمنىڭ تانىستىرىلىمىندا (ريا جاڭالىقتارى حابارلاۋى بويىنشا).
«وزەن» ءفيلمىنىڭ الەمدىك تۇساۋكەسەرى ۆەنەتسيا كينوفەستيۆالى شەڭبەرىندە وتكەن بولاتىن. بۇل فەستيۆالدىڭ «كوكجيەكتەر» باعدارلاماسىندا ەمير بايعازين ۇزدىك رەجيسسەر اتاندى. ال ءفيلمنىڭ سولتۇستىك اميريكاداعى تۇساۋكەسەرى ۇستىمىزدەگى جىلى قىركۇيەك ايىندا حالىقارالىق تورونتو كينوفەستيۆالى اياسىندا ءوتتى. كينوتۋىندى فەستيۆالدىڭ «تۇعىرناما» («پلاتفورما») كونكۋرستىق باعدارلاماسىندا كورسەتىلىپ, قازىلار القاسىنىڭ قۇرمەتتى اتالىمىنا جانە Screen Daily تاۋەلسىز كينوسىنشىلاردىڭ رەيتينگىسى تىزىمىندە الدىڭعى قاتاردان كورىندى. ودان بولەك, «وزەن» ءفيلمى ءۇشىن ەمير بايعازين گولليۆۋدتىڭ شەتەل ءباسپاسوزى قاۋىمداستىعىنىڭ گرانتىنا يە بولدى.
«وزەن» ءفيلمى وركەنيەتتەن الىس جەردە تۇراتىن, ۇيىنە قالادان قوناق كەلگەن كەيىن ءومىرى كۇرت وزگەرە باستاعان بەس اعايىندى تۋرالى باياندايدى. اسلان تۋرالى تريلوگيانىڭ الدىڭعى ەكى ءبولىمى 2013 جانە 2016 جىلدارى بەرلين كينوفەستيۆالىنىڭ نەگىزگى باعدارلاماسىنا قاتىسقان بولاتىن. «اسلاننىڭ ساباقتارى» ءفيلمى «كۇمىس ايۋ» جانە Morgenpost نەمىس گازەتىنىڭ جۇلدەسىمەن ماراپاتتالعان.
ايگۇل احانبايقىزى,
«ەگەمەن قازاقستان»
