مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا استانانىڭ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ۇجىمى يتاليالىق دراماتۋرگ فۋريو بوردوننىڭ قازاق تىلىنە ء«وتتى داۋرەن» دەپ اۋدارۋعا كونەتىن پسيحولوگيالىق دراماسىن «قارداعى كوگەرشىننىڭ ءىزى» اتاۋىمەن الماتىلىق تالعامى بيىك كورەرمەندەر نازارىنا ۇسىنىلدى. الماتى جۇرتشىلىعى پرەمەراسىن ءبىرىنشى بولىپ تاماشالايتىن بۇل قويىلىم حالىق ءارتىسى تىلەكتەس مەيراموۆتىڭ 70 جىلدىق مەرەيتويىنىڭ قۇرمەتىنە ارنالدى. سپەكتاكلدى قويعان – قازاق كينو جانە تەاتر ونەرىندە ءوز قولتاڭباسى تانىلعان رەجيسسەر تىلەگەن احمەتوۆ.
بۇل قويىلىم كورەرمەندى تۇڭعيىق ويعا باتىرادى, بالكىم, كەيبىر جاندى رايىنان قايتارادى, اكەلەر مەن بالالار, ۇرپاق اراسىنداعى بايلانىس, تەكتىلىك تاقىرىبىنىڭ قازىرگى زامانعى سۇرقاي ءارى مۇڭلى-زارلى تارماعى بولىپ تابىلادى. تىلەكتەس مەيراموۆ سپەكتاكلدە شاۋ تارتقان وتاعاسىن – ەر ادام بەينەسىن سومدايدى. كەيىپكەر وتكەن ءومىرىنىڭ ەلەسىمەن تىرشىلىك كەشەدى, جالعىزدىق كۇيىگى ابدەن مەڭدەپ, ءازيز جانى جۇدەگەسىن ول باياعىدا سۇيەگى قۋراپ قالعان سۇيگەن جارىمەن سىرلاسىپ وتىرادى. شالدىڭ جالعىز ۇلى مەن كەلىنى, ەكى نەمەرەسى بار. ول ءوز ۇيىندە باسى ارتىق ادام بولىپ شىقتى. ەسكىرگەن م ۇلىك سياقتى قوقىسقا لاقتىرىپ تاستايتىن. كارىنىڭ جەتىمدىگى تاستاندى نارەستەنىڭ جەتىمدىگىنەن كەم تۇسپەسىن بۇل پەسا تانىتتى. ۇلى تۋعان اكەسىن قارتتار ۇيىنە وتكىزبەكشى. وركەنيەتتىك دامۋدىڭ شەگىنە جەتكەن توقمەيىل ەۋروپانى بۇرىننان وپىندىرىپ وتىرعان بۇل سۇمدىق قاسىرەت قازىردە جارتى عاسىر بۇرىن ەلدىك داستۇرىنە تۇك سىزات تۇسپەگەن قازاق حالقىنا دا جەتىپ قويعان. سوندىقتان سىنىقتان باسقانىڭ ءبارى جۇعادى, قۇلاق ەستىگەندى كوز كورەدى دەپ ءبىزدىڭ قازاق دانالىقپەن كەسىردەن شوشىنىپ ايتقان. جاماندىق ەنەرگياسى اسىرە جۇقپالى. بۇل قويىلىم كورەرمەنىن تولعاندىرماي, تەبىرەنتپەي قالمايدى. بالا تاربيەسى, تەكتى ۇرپاق ءوسىرۋ دۇنيەنىڭ التىن كىلتى ەكەنىن كىمگە بولسىن ايقىن ۇقتىرادى. ۇلكەنىن سىي قۇرمەتپەن قادىرلەيتىن, جاقىنىن ءسۇيىپ قاستەرلەيتىن حالىق ەشقاشان ولمەيدى. تەاتر ادام بالاسىنا ۋاعىز ايتپايدى, بىراق كوكىرەك, سانا-سەزىمىن قوزعايدى, زالالدان قورعانۋعا, جۇرەك جىلۋىنا, مەيىرىمگە ۇندەيدى. «قارداعى كوگەرشىننىڭ ءىزى» – سونداي قويىلىم.
ايگۇل كەمەلباەۆا,
جازۋشى, «دارىن» مەملەكەتتىك جاستار سىيلىعىنىڭ لاۋرەاتى
