شىعىس قازاقستان وبلىسىنداعى كاتونقاراعاي اۋدانىنىڭ كىشى نارىن اۋىلىنىڭ تۇرعىنى 19 قىركۇيەكتە سانيتارلىق اۆياتسيانىڭ كومەگىمەن وسكەمەندەگى ينفەكتسيالىق اۋرۋحاناعا ءسىبىر جاراسى دياگنوزىمەن ءتۇسىپ, 21 قىركۇيەكتە كوز جۇمعانى حابارلانعان ەدى.
ماماندار كىشى نارىن اۋىلىنىڭ تۇرعىنى ءسىبىر جاراسى دەرتىنە شالدىققانىن راستاپ, اۋرۋ بەلگىلەرى مارقۇمنىڭ دەنەسىنەن ءبىر اپتادان كەيىن بىلىنە باستاعانىن, ىندەتتى ءوزى سويعان تايىنشا ەتىنەن جۇقتىرۋى مۇمكىن دەگەن بولجامدارىن جەتكىزدى. سونىمەن قاتار بريفينگتە ءسىبىر جاراسىن جۇقتىرعان مالدىڭ ەتىن قايتىس بولعان جىگىتتىڭ اۋىلداستارى دا تۇتىنعانى ايتىلدى. وبلىستىق قوعامدىق دەنساۋلىقتى ساقتاۋ دەپارتامەنتى باسشىسىنىڭ ورىنباسارى بولات قۋانىشبەكوۆ بريفينگ بارىسىندا قاراسانمەن اۋىرعان مالدىڭ ەتىن جەگەن ادامداردىڭ سانى 37-گە جەتكەنىن, بۇل سان ءالى وزگەرۋى مۇمكىن ەكەندىگىن تىلگە تيەك ەتتى. «ەڭ العاشقى تەكسەرۋ كەزىندە اۋرۋ مالعا جاناسقانداردىڭ سانى 20 ادام بولعان. ستەرەولوگيالىق جانە باكتەريولوگيالىق تالداۋلار مارقۇمنىڭ اعزاسىنان دا, سويىلعان مالدىڭ ەتىنەن دە ءسىبىر جاراسى دياگنوزىن انىقتادى. سويىلعان مالدىڭ قالعان ەتى تۇگەلدەي زالالسىزداندىرىلىپ, جويىلدى» - دەدى ول.
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى رايفا سافيوللينوۆا ىندەتتى جۇقتىرىپ, كوز جۇمعان جىگىتتىڭ 1971 جىلى تۋعانىن, وسى وقيعا بويىنشا ايماق باسشىسى دانيال احمەتوۆتىڭ تاپسىرماسىمەن وبلىس اكىمىنىڭ ورىنباسارى شالقار بايبەكوۆ توراعالىق ەتەتىن ارنايى كوميسسيا قۇرىلعانىن مالىمدەدى. ۆەتەرينارلىق باقىلاۋ جانە قاداعالاۋ كوميتەتىنىڭ وبلىس بويىنشا اۋماقتىق ينسپەكتسياسىنىڭ ءبولىم باسشىسى تولەگەن مۇحامەتقاليەۆ 21 قىركۇيەكتەن باستاپ 14 كۇن بويى كىشى نارىن اۋىلىنان ەشقانداي مال سىرتقا شىعارىلمايتىنىن, الىنعان سىنامالار مەن وزگە دە دەرەكتەر شۇعىل تۇردە استاناعا جونەلتىلگەنىن, ساراپتاما قورىتىندىلارى بويىنشا اۋدان اكىمدىگى كارانتين جاريالاۋى تيىستىگىن ايتتى. «ول شەشىم بىرنەشە قۇزىرلى ورگاندارمەن راستالۋى كەرەك. ءبىز ۋاقىت جوعالتپاس ءۇشىن بۇگىننەن باستاپ اۋىلدان مال شىعارۋعا تىيىم سالدىق. سونداي-اق, وسى اۋىلداعى 150 باس مال جەرگىلىكتى ۆەتەرينارلاردىڭ ءجىتى باقىلاۋىنا الىندى. ولار اتالمىش مالداردىڭ تەمپەراتۋراسىن ۇدايى باقىلاۋدا ۇستايتىن بولادى», - دەدى ت.مۇحامەتقاليەۆ.
ازامات قاسىم,
«ەگەمەن قازاقستان»
وسكەمەن
