وتىنىشتەر اعىمداعى جىلدىڭ قاراشا ايىنىڭ العاشقى جارتىسىنا دەيىن جوبانىڭ رەسمي سايتى ارقىلى قابىلداناتىن بولادى.
«قازاقستاننىڭ 100 جاڭا ەسىمىن» ىرىكتەۋ بارىسىنا بيىلعى جىلى ۇكىمەتتىك ەمەس ۇيىمدار دا اتسالىسادى. وسىعان وراي الماتى قالاسى ىشكى ساياسات باسقارماسىنىڭ ۇسىنىسىمەن جۋرناليستەرمەن كەزدەسكەن «بولاشاق» قاۋىمداستىعىنىڭ مۇشەسى, ا.سىزعانوۆ اتىنداعى عىلىمي ورتالىقتىڭ كارديوحيرۋرگى باۋىرجان راكيشەۆ, جەتەكشى ستۋدەنتتەردىڭ ءوزىن-ءوزى باسقارۋ G-38 بىرلەستىگىنىڭ توراعاسى شىڭعىس ەرسوۆەتوۆ, «جاستار ءۇنى» قوعامدىق بىرلەستىگىنىڭ توراعاسى داۋرەن بابامۇراتوۆ, «ۆولونتەرلەر ليگاسى» قق ءتورايىمى ايسۇلۋ ەرنيازوۆا جوباعا جاڭا ۇمىتكەرلەردى تاڭداۋ بارىسىنا قاتىستى بىرقاتار جايتتاردى ورتاعا سالدى.
رەسپۋبليكا وڭىرلەرىندە ەلىمىزدىڭ دامۋىنا اتسالىسىپ, قوعامدىق ماسەلەلەردى شەشۋگە ءوز ۇلەسىن قوسىپ جۇرگەن ازاماتتار جەتكىلىكتى. الداعى كەزەڭدە ۇكىمەتتىك ەمەس ۇيىم مۇشەلەرى عىلىم, ءبىلىم, مەديتسينا, ءوندىرىس ورىندارى, ت.ب. سالالاردا اتقارعان مىندەتىن ءوزىنىڭ ازاماتتىق ۇستانىمى اياسىنان شىعارماي جۇرگەن جانداردى ىزدەستىرىپ, ەل اراسىنا شىعاتىن بولادى.
بۇگىندە ەلىمىزدى حالىقارالىق دەڭگەيدە تانىتىپ جۇرگەن, سپورتشىلار دا, ونەر وكىلدەرى دە بارشىلىق. وسى ورايدا ديماش قۇدايبەرگەن, دميتري بالاندين, جانسايا ابدىمالىك سياقتى ەل ماقتانىشىنا اينالعان جاستاردىڭ دا «قازاقستاننىڭ 100 جاڭا ەسىمىنىڭ» قاتارىندا اتالۋى كەيىنگى ءوسىپ كەلە جاتقان جاس ۇرپاققا ۇلگى-ونەگە بولاتىنى انىق.
ۇكىمەتتىك ەمەس ۇيىم وكىلدەرى تاراپىنان ۇسىنىلعان ۇمىتكەرلەر جوبا شارتىنىڭ تالاپتارىنا سايكەس ىرىكتەلەدى. مىسالى, وتكەن جىلى ەلىمىز وڭىرلەرىنەن كەلىپ تۇسكەن ەكى مىڭعا جۋىق ءوتىنىش ساراپتالىپ, ىشىنەن ەڭ ۇزدىكتەرى تاڭدالدى. ال بيىلعى جىلى دا وسى تالاپتار ۇدەسىنەن شىققان ۇزدىكتەر 100 ەسىمنىڭ قاتارىنا ەنەتىن بولادى.
ەلۆيرا سەرىكقىزى,
«ەگەمەن قازاقستان»
الماتى
