«كوركەم ءسوز – كوڭىل ءتىلى, جالاڭ ءسوز – زەيىن ءتىلى» دەگەن ەكەن احمەت بايتۇرسىنوۆ. ادەبيەتتى ءسوز ونەرىنىڭ جاۋھارىنا تەڭەسەك, كوركەم ادەبيەت قوعام ءومىرىنىڭ ايناسى ىسپەتتەس. بابالارىمىز ء«سوز ونەرى – دەرتپەن تەڭ»دەگەن ناقىل قالدىرعان. بۇل ايتىلعانداردىڭ ءبارى – قاسيەتتى انا ءتىلىمىزدىڭ بار كوركەمدىك قۋاتىن ايقىندايتىن ءومىردىڭ سىرلى سۋرەتتەرىن, حالىقتىڭ كوركەم تاريحىن كەستەلى تىلمەن ورنەكتەيتىن, كيەلى قاسيەتىن ايعاقتايتىن انىقتاۋىشتار ەكەنى ءسوزسىز. ءار ۇلتتىڭ ءتىلى – ونىڭ نەگىزگى تىرەگى. دوستىقتىڭ كيەلى مەكەنى سانالاتىن اتامەكەنىمىزدە ەل مەن ەلدى, ەر مەن ەردى ۇعىستىراتىن, الداسپاننان دا وتكىر انا ءتىلىمىزدىڭ بولاشاعى ءۇشىن جاسالىپ جاتقان ارشىندى قادامدار, ماڭىزدى باستامالار از ەمەس. سولاردىڭ ءبىرى دەپ مازمۇنى تەرەڭ, ءمانى كەنەن تىلدەر فەستيۆالىنىڭ داستۇرگە اينالىپ, تامىرىن تەرەڭگە جايۋىن ايتۋعا بولادى. مەملەكەتتىك ءتىلدى ناسيحاتتاۋ, مارتەبەسىن كوتەرۋ, قۇتتى تۇعىرىنا قوندىرۋ, قوعام ءومىرىنىڭ بارلىق سالالارىندا كەڭىنەن قولدانىلۋىن قامتاماسىز ەتۋ, ماڭىزدى قارىم-قاتىناس قۇرالى ارقىلى جاستاردىڭ وتانعا, ەلگە, جەرگە دەگەن سۇيىسپەنشىلىگىن ارتتىرۋ ماقساتىن دىتتەگەن القالى باسقوسۋدا سويلەگەن سوزىندە وبلىس اكىمىنىڭ ورىنباسارى داۋرەن جانداربەك جينالعانداردى ايتۋلى مادەني شارانىڭ اشىلۋىمەن قۇتتىقتاپ, ساتتىلىك تىلەدى. مەملەكەتتىك ءتىلدىڭ دامۋىنا ەلەۋلى ۇلەس قوسىپ جۇرگەن ءبىر توپ ءتىل جاناشىرلارىنا مادەنيەت جانە سپورت مينيسترلىگىنىڭ,تىلدەردى دامىتۋ جانە قوعامدىق-ساياسي جۇمىس كوميتەتىنىڭ, ايماق باسشىسىنىڭ قۇرمەت گراموتالارى مەن العىس حاتتتارى تابىس ەتىلدى. جەتى اتالىم بويىنشا جەڭىمپاز اتانعان جەرگىلىكتى ۇجىمدار ماراپاتتالدى. ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ ءبولىم جەتەكشىسى ايدوس تۇرسىنباي ۇلى ءوز سوزىندە بيىلعى فەستيۆال الاشتىڭ اقيىق اقىنى ماعجان جۇماباەۆتىڭ 125 جىلدىق مەرەيتويىنا ارنالىپ وتىرعانىن جەتكىزدى.
قازاقستان حالقى تىلدەرى بايقاۋىنا ءوڭىرىمىزدىڭ بارلىق وبلىستارىنان جانە الماتى, استانا قالالارىنان اباي اتىنداعى كوركەمسوز وقۋ شەبەرلەرىنىڭ جەڭىمپازدارى كەلىپ, ءبىرىنشى كەزەڭدە قازاقتىڭ بەلگىلى جازۋشىلارىنىڭ پروزالىق شىعارمالارىنان ۇزىندىلەر وقىدى. ساحنا شىمىلدىعىن ءبىرىنشى بولىپ ش.ەسەنوۆ اتىنداعى كاسپي مەملەكەتتىك تەحنولوگيالار مەن ينجيرينگ ۋنيۆەرسيتەتىنىڭ ستۋدەنتى, ماڭعىستاۋ وبلىسىنىڭ نامىسىن جىرتىپ كەلگەن ارعىن قوساي اشتى. ول جۇرتشىلىققا ورالحان بوكەيدىڭ اڭگىمەسىنەن ءۇزىندى ۇسىنىپ, جاقسى دايىندىقپەن كەلگەنىن كورسەتتى. سول سياقتى شىمكەنتتىك باتىرحان تولاعاي, پاۆلودارلىق ەركەجان تولەۋبەك, قىزىلوردالىق ءومىرباي ابىلايحان, قوستانايلىق جۇمابەك ارۋجان, تاعى باسقالارى دا كوركەم ءسوز وقۋدىڭ قىرى-سىرىن ابدەن مەڭگەرىپ العاندارىن اڭعارتتى. ەكىنشى كەزەڭ ماعجان شىعارمالارىن مانەرلەپ وقۋعا ارنالدى.
بەلگىلى قوعام قايراتكەرى الدان سمايىل توراعالىق ەتكەن قازىلار القاسى ءار ۇمىتكەردىڭ ءبىلىمى مەن بىلىگىن, ونەرى مەن ورەسىن باعالاۋدا شىعارمانىڭ تاڭدالۋىنا, ورىنداۋ شەبەرلىگىنە, ساحنالىق دايىندىعىنا, كيىم كيىسىنە باسا نازار اۋدارىپ, باس جۇلدەگە شىعىس قازاقستان وبلىسىنىڭ ۇمىتكەرى سايا بەكبوسىنوۆا لايىق دەپ تاپتى. ءبىرىنشى ورىندى اقتوبەلىك التىن قوجانوۆا, ەكىنشى ورىندى ەلوردالىق قۇلپىناي ومىربەكوۆا, ءۇشىنشى ورىندى پاۆلودارلىق ەركەجان تولەۋبەك پەن پەتروپاۆلدىق جاناربەك سەكەل يەلەندى.
جەڭىمپازدار مەن جۇلدەگەرلەرگە ارنايى ديپلومدار, العىس حاتتار, اقشالاي جانە ىنتالاندىرۋ سىياقىلارى تابىس ەتىلدى.
– فەستيۆال جوعارى دارەجەدە ۇيىمداستىرىلدى. وقۋشى قىزىمىز سايانىڭ 97 ۇپاي جيناپ, توپ جارعانىنا قۋانىشتىمىز. ول زايسان اۋدانىندا جۇمىس ىستەيتىن حالىق تەاترى جانىنداعى كوركەمسوز وقۋ ۇيىرمەسىنىڭ تۇراقتى مۇشەسى. رەسپۋبليكالىق بايقاۋلاردىڭ بىرنەشە دۇركىن جەڭىمپازى, – دەدى زايسان حالىق تەاترىنىڭ رەجيسسەرى الما سۇلەيمەنوۆا قۋانىشىن جاسىرا الماي.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
