وڭىرلىك باسىلىم رەداكتورلارىن «ەگەمەن قازاقستاننىڭ» شىعارماشىلىق-وندىرىستىك الەۋەتىمەن تانىستىرۋ ماقساتىندا وتكەن كەزدەسۋدە قازاق باسىلىمدارىنىڭ اقپارات تاراتۋداعى كوكەيكەستى تاقىرىپتارى تالقىلاندى.
مۇنداي جيىندار مەملەكەتتىك اقپاراتتىق ساياساتتى جۇيەلى جۇرگىزىپ جاتقان گازەتتىڭ مۇمكىندىگىن ودان ارى ارتتىرارى ءسوزسىز. اتالعان شارا ەلىمىزدىڭ باسقا ايماقتارىنان كەلگەن جۋرناليستەرگە دە ءىس-تاجىريبە الماسۋعا ۇلكەن مۇمكىندىك. قىزىلوردا وبلىسىنىڭ رەداكتورلارىن باستاپ كەلگەن «سىر مەديا» باسشىسى بۇگىنگى وتكەن جيىندا شىعارماشىلىق وندىرىستە كەزدەسەتىن كۇرمەۋلى سۇراقتاردىڭ جاۋابىن تاپقانىن ايتتى.
«ەلىمىزدەگى الدىڭعى كوشتى باستاپ كەلە جاتقان گازەتتەن قاي باسىلىمنىڭ دا ۇيرەنەرى كوپ. بۇگىنگى سەميناردا شەشىمىن تابا الماي جۇرگەن سۇراقتارىمىزدىڭ جاۋابىن تاپقانداي بولىپ وتىرمىز. باس باسىلىمنىڭ جۇمىس ىستەۋ ساياساتىنىڭ وزگەرىپ جاتقانىنا وتە ريزا بولدىق. اسىرەسە ينتەرنەت جۇيەسىمەن جاڭاشا قادام باستاپ جاتقانى ۇنادى», دەدى «سىر مەديا» باسشىسى امانجول وڭعارباەۆ.
«Egemen Qazaqstan» گازەتى وقىرمانعا جاقىن بولۋ ماقساتىندا سايتتا ماقالالار مەن قوسا ارنايى ۆيدەو جوبالار جاريالاي باستادى. وسى ورايدا Youtube-تان ارنايى «Egemen TV» ارناسى اشىلدى. وندا «ورنەك», «ستاديون», «ساراپشى پىكىرى» سەكىلدى ءتۇرلى جوبالار جارىق كوردى. «سىر مەديا» جۋرناليستەرىن ءدال وسىنداي مۋلتيمەديالىق باعىتتا اقپارات تاراتۋ ءىسى قىزىقتىردى.
«Egemen Qazaqstan» گازەتى باس رەداكتورىنىڭ ورىنباسارى قامبار احمەتتىڭ ايتۋىنشا, ءدال وسىنداي باستامامەن وزگە دە ءوڭىر جۋرناليستەرى تاجىريبە الماساتىن بولادى.
«قىزىلوردا وبلىسىنان كەلگەن ارىپتەستەرىمىزدىڭ ىنتالى بولعانىن كوردىك. ولاردىڭ تاراپىنان جاقسى ۇسىنىستار ايتىلدى. «ەگەمەن قازاقستاندا» ماتەريالدار جاريالاپ, بىرلەسە جۇمىس اتقارساق دەيدى. وسىنداي تاجىريبە الماسۋ جونىندە ۇسىنىستار كوبەيۋدە. الداعى ۋاقىتتا بىزگە شىعىس قازاقستان وبلىسىنىڭ دەلەگاتسياسى كەلمەكشى. ءبىز وسىنداي ۇسىنىستار ءتۇسىپ جاتقانىنا قۋانىشتىمىز», دەدى ول.
