تامىز تۇگەسىلىپ, قىركۇيەك كەلە سالىسىمەن تابيعات توسىن مىنەز تانىتا باستاعانداي. جىل سايىن جىلىلىعىنان تانبايتىن بۇل ماۋسىم بيىل ءسال سۋىتىپ تۇر. «قىس شاناڭدى جاز سايلا» دەگەندەي, جامبىل وبلىسىندا جىلىتۋ ماۋسىمىنا دايىندىق جۇمىستارىن ۇيىمداستىرۋ شارالارى باستالىپ تا كەتتى.
اسىرەسە كوگىلدىر وتىنمەن قامتىلماعان اۋىل تۇرعىندارى ءۇشىن اعاش جيناپ, كومىر ءتۇسىرۋدىڭ ءوزى ءبىر ماشاقات. جىلىتۋ ماۋسىمىنا دەيىنگى ۇيىمداستىرۋ جۇمىستارى ساپالى ءارى ۋاقتىلى اتقارىلسا, تۇرعىندار ءۇشىن ماسەلە دە تۋىنداماس ەدى. سونىمەن قاتار كومىر باعاسىنىڭ قولجەتىمدىلىگى دە تۇرعىندار ءۇشىن اسا ماڭىزدى. جامبىل وڭىرىندە بۇگىندە كومىر تاسىمالى قالاي جۇزەگە اسىرىلۋدا جانە وسىعان بايلانىستى باعاسى قانداي بولماق دەگەن ساۋال كوپشىلىكتى كوبىرەك ويلانتادى.
الداعى 2018-2019 جىلدارداعى جىلىتۋ ماۋسىمىنا ءوڭىر تۇرعىندارى ءۇشىن 332,9 مىڭ توننا كومىر قاجەت. الايدا بۇگىنگە دەيىن ءتيىستى كومىردىڭ 110,4 مىڭ تونناسى نەمەسە 33,2 پروتسەنتى تاسىمالدانىپتى. بۇل كورسەتكىش وتكەن جىلدىڭ كورسەتكىشىمەن سالىستىرعاندا جوعارى بولعانمەن, ءالى دە بولسا اتقارىلۋعا ءتيىس جۇمىستار جەتەرلىك.
اۋدانداردى قاجەتتى وتىنمەن قامتۋ ماسەلەسى دە وزەكتى. جامبىل وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى نۇرلان الدامجاروۆتىڭ ايتۋىنشا, بۇل ماسەلەدە ءتيىستى كورسەتكىشتى ورىنداماعان اۋداندار بار ەكەن. ماسەلەن ءتيىستى جۇمىستار سارىسۋ اۋدانىندا – 14,1 پروتسەنت, جۋالى اۋدانىندا – 21,4, جامبىل اۋدانىندا – 22,7, شۋ اۋدانىندا – 25,0 پروتسەنت قانا ورىندالعان. بيۋدجەتتىك مەكەمەلەرگە 72,2 مىڭ توننا قاتتى وتىن قاجەت بولسا, بۇگىنگى تاڭدا ونىڭ 53,4 مىڭ تونناسى عانا جەتكىزىلگەن.
«قاتتى وتىن تاسىمالداۋ جۇمىستارى بۇگىندە ودان ءارى جالعاسۋدا. جۋالى, ت.رىسقۇلوۆ اۋداندارىنىڭ جانە وبلىستىق ءبىلىم باسقارماسىنىڭ بيۋدجەتتىك مەكەمەلەرى جوسپارعا ساي كومىرمەن تولىقتاي قامتىلىپ وتىر», دەيدى باسقارما باسشىسى.
دەرەكتەر بويىنشا, اعىمداعى جىلدىڭ تامىز ايىندا تاراز قالاسىنداعى كومىر ساتاتىن ون تەمىر جول تۇيىعىندا 17,7 مىڭ توننا كومىر بار. مۇنداعى «شۇباركول» مەن «قاراجىرا» كومىرىنىڭ ءبىر تونناسى 14,5-18 مىڭ تەڭگە ارالىعىندا بولسا, «ەكىباستۇز» كومىرىنىڭ ءبىر تونناسى 10 مىڭ تەڭگەدەن ساتىلۋدا. اۋدانداردا بارلىعى كومىر ساتاتىن 19 ورىن بار, جامبىل جانە بايزاق اۋداندارىنىڭ حالقى قاتتى وتىندى وبلىس ورتالىعىنان الىپ تۇتىنادى.
قىركۇيەك ايىنىڭ قاتال باستالعانىنا قاراعاندا, بيىلعى قىس مەزگىلى وڭاي بولمايتىن ءتۇرى بار. وتكەن جىلى كۇننىڭ كۇرت سۋىپ كەتۋىنە بايلانىستى وتىن تاپشىلىعى ورىن العان بولاتىن. سوندىقتان اۋدان اكىمدەرى حالىققا كومىردى ەرتەرەك ساتىپ الۋ كەرەكتىگىن تۇسىندىرگەنى دۇرىس سياقتى. ايتپەسە, قازاندا قار جاۋىپ كەتىپ جاتسا, وتكەن جىلعى جاعداي قايتالانۋى ابدەن مۇمكىن.
ايتپاقشى, الىپساتارلار ارقىلى الىنعان قاتتى وتىننىڭ قىمباتقا ءتۇسۋى مۇمكىن. وسى ماسەلەگە وراي, جامبىل وبلىسىنىڭ اكىمى اسقار مىرزاحمەتوۆ وڭىردەگى كومىر نارىعىندا قارجىلىق ماسەلەلەردى شەشىپ, باعانى تۇراقتاندىرۋ شارالارىن تاپسىرعان. كومىر ساتۋشى جەكە كاسىپكەرلەر ارقىلى «تاراز» الەۋمەتتىك-كاسىپكەرلىك كورپوراتسياسىنىڭ قارجىسىن ءتيىمدى پايدالانۋدى, سونىمەن قاتار ءاربىر اۋدان ورتالىقتارىندا كومىر ساتاتىن نۇكتەلەر اشۋ كەرەكتىگىن ايتقان. سونىڭ ارقاسىندا الىپساتارلاردى نارىقتان شەتتەتۋگە مۇمكىندىك تۋادى جانە قاراپايىم حالىقتىڭ دا قالتاسى قاعىلمايدى.
حاميت ەسامان,
جامبىل وبلىسى
