الماتىداعى «عىلىم ورداسى» كەشەنىڭ قىسقى باعىندا قازاقستان حالقىنىڭ تىلدەرى كۇنى جانە احمەت بايتۇرسىن ۇلىنىڭ 146 جىلدىعىنا وراي «قازاق ۇلتتىق جازۋى: ەملە, تەرمينتانۋ جانە ونوماستيكا» اتتى رەسپۋبليكالىق عىلىمي-پراكتيكالىق كونفەرەنتسيا ءوتتى.
الاتاۋ باۋرايىندا ورنالاسقان اسەم شاھاردا وسىنداي ءمانى دە, ماڭىزدى دا زور ءىس-شارا ۇيىمداستىرۋداعى باستى ماقسات – ۇلتىمىزدىڭ باستى رۋحاني قۇندىلىعى – قازاق ءتىلىن, لاتىن گرافيكاسىنا نەگىزدەلگەن جاڭا قازاق جازۋىن رەفورمالاۋ جولىنداعى مامانداردىڭ ۇستانىمدارىن ناسيحاتتاۋ جانە قازاق ءتىل ءبىلىمىنىڭ نەگىزىن قالاعان عۇلاما عالىم, اعارتۋشى, ۇلت ۇستازى – احمەت بايتۇرسىن ۇلىنىڭ عىلىمي تۇجىرىمدارىن قازىرگى تىلدىك رەفورمامەن ۇشتاستىرا تالداۋ.
كونفەرەنتسيانى ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ كوررەسپوندەنت مۇشەسى ەردەن قاجىبەك ءوزىنىڭ كىرىسپە سوزىمەن اشىلىپ, ءبىلىم جانە عىلىم ءمينيسترى ەرلان ساعاديەۆ پەن مادەنيەت جانە سپورت ءمينيسترى ارىستانبەك مۇحامەدي ۇلىنىڭ جولداعان قۇتتىقتاۋ حاتتارى وقىلدى.
وسى جيىندا مەملەكەتتىك ءتىلدى دامىتۋ ينستيتۋتىنىڭ ديرەكتورى بيجومارت قاپالبەكوۆ, تۇركى حالىقتارىنىڭ مادەني ورتالىعىنىڭ پرەزيدەنتى احمەت داعدۇران, م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجان, قازاق ۇلتتىق اگرارلىق ۋنيۆەرسيتەتىنىڭ الەۋمەتتىك-گۋمانيتارلىق تاربيە ينستيتۋتىنىڭ ديرەكتورى سايىن بورباسوۆ, «مەملەكەتتىك تىلگە قۇرمەت» بىرلەستىگىنىڭ ءتورايىمى اسىلى وسمان, تاريح عىلىمدارىنىڭ دوكتورى مامبەت قويگەلدى, فيلولوگيا عىلىمدارىنىڭ دوكتورى تەمىرحان تەبەگەنوۆ, پەدوگوگيكا عىلىمدارىنىڭ دوكتورى فاۋزيا ورازباەۆا جانە تاعى باسقا عالىمدار, قوعام قايراتكەرلەرى, عىلىمي-زەرتتەۋ ينستيتۋتتارىنىڭ قىزمەتكەرلەرى وسى تاقىرىپتا بايانداما جاسادى.
«5 قىركۇيەك – قازاقستان حالقىنىڭ تىلدەرى كۇنى بولىپ جاڭاشا بەلگىلەندى. ۇلى ۇستاز, كورنەكتى مەملەكەت جانە قوعام قايراتكەرى, عالىم, پۋبليتسيست, اعارتۋشى, ۇلتتىق جازۋدىڭ رەفورماتورى احمەت بايتۇرسىن ۇلى دا ءدال وسى كۇنى دۇنيەگە كەلگەن. وسى ەكى بىردەي مەرەكەنىڭ قاتارلاس كەلۋىن تاريحي سايكەستىك جانە ەلىمىزدىڭ رۋحاني دامۋ باعىتىنداعى كورنەكتى كورسەتكىش دەپ باعالار ەدىم. مەن 47 جىل بويى ادەبيەتشى, زەرتتەۋشى رەتىندە ەڭبەك ەتىپ كەلە جاتقان ۇستاز بولعاندىقتان ا.بايتۇرسىن ۇلىنىڭ ءوز زامانىندا شىعارىپ كەتكەن وقۋلىقتارىن ءبىزدىڭ عالىمداردىڭ قازىرگى كەزدە تەرەڭنەن زەرتتەپ, زەردەلەپ جاتقانىنا قاتتى قۋاندىم», – دەيدى اباي اتىنداعى قازاق ۇلتتىق پەدوگوگيكالىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى تەمىرحان تەبەگەنوۆ,
كونفەرەنتسيا بارىسىندا «لاتىن گرافيكاسىنا نەگىزدەلگەن قازاق جازۋىن جانە ەملە ەرەجەلەرىن جەتىلدىرۋ», «قازىرگى قازاق ءتىلى: فونەتيكا-فونولوگيا ماسەلەلەرى», «قازاق ءالىپبيىن لاتىن قارىپىنە كوشىرۋدىڭ توتە جولى», ء«الىپبي – زامانا سۇرانىسى», «احمەت بايتۇرسىن ۇلىنىڭ ۇستانىمدارى جانە جاڭا ەملە», «قازاق تەرمينولوگياسىنىڭ وزەكتى ماسەلەلەرى: تەرمينتانىم, تەرمينجاسام, تەرمينوگرافيا», «قازاق ءتىل ءبىلىمىنىڭ جاڭا باعىتتارى», «تۇركىتانۋ, تاريحي-سالىستىرمالى, سالعاستىرمالى ءتىل ءبىلىمىنىڭ ماسەلەلەرى», «قازاق ونوماستيكاسى مەن گرامماتيكاسىنىڭ وزەكتى ماسەلەلەرى» جانە تاعى باسقا تاقىرىبىندا كەڭىنەن اڭگىمە قوزعالدى.
عالىم سۇلەيمەن
«ەگەمەن قازاقستان»
الماتى
