«بۇگىن قازاقستان تۇركى كەڭەسىنىڭ توراعالىعىن اياقتاپ, بۇل مىندەتتى قىرعىز ەلىنە تابىستادى. قازاقستاننىڭ توراعالىعى كەزىندە تۇركى مەملەكەتتەرىنىڭ ينتەگراتسياسى ءوز جالعاسىن تاپتى. اتاپ ايتقاندا, استانادا وتكەن سامميتتە تۇركىتىلدەس مەملەكەتتەر ينتەگراتسياسىنىڭ تۇجىرىمداماسىن ازىرلەۋ جۇمىستارى بەرىلگەن بولاتىن. بۇگىن سول قۇجات قابىلداۋعا دايىن. مۇندا ينتەگراتسيانىڭ ماقساتتارى مەن قاعيداتتارى, دامۋ كەزەڭدەرى مەن ىسكە اسىرۋ جولدارى ايقىندالدى. سونداي-اق باسەكەگە قابىلەتتى ۇلتتىق ەكونوميكا قۇرۋعا, مادەني-گۋمانيتارلىق بايلانىستاردىڭ تەرەڭدەتۋگە ىقىلاس تانىتتىق. بۇگىن اقپاراتتىق تەحنولوگيالار, ەنەرگەتيكا, كولىك-ترانزيت, قارجى سالالارىنداعى ىنتىماقتاستىقتى كەڭەيتۋگە ەرەكشە نازار اۋدارىلدى. قازاقستاننىڭ توراعالىعى اياسىندا عىلىمي-اعارتۋشىلىق جۇمىستارعا دا ايرىقشا كوڭىل ءبولىندى».
«ماسەلەن, ءبىزدىڭ تاپسىرمالارىمىزعا سايكەس, ورتاق تۇركى تاريحى وقۋلىعى ازىرلەنىپ, ەلدەرىمىزدىڭ مەكتەپ باعدارلاماسىنا ەنگىزىلە باستاعانى قۋانىشتى جاڭالىق دەپ ساناۋ كەرەك. بۇل جاستاردى ورتاق تاريحىمىز نەگىزىندە تاربيەلەيتىن ءتيىمدى تەتىگى بولادى دەپ سەنەمىن. سونىمەن قاتار تۇركى اكادەمياسى تاريحىمىزدى تانىتىپ, سانانى جاڭعىرتۋعا باعىتتالعان 90-نان استام كىتاپ شىعاردى. ءتورت مىڭ جىلدىق مادەني مۇرامىزدى جيناقتاپ, ونى جاريالاۋعا ارنالعان اتالار مۇراسى پورتالى ىسكە قوسىلدى», دەدى نۇرسۇلتان نازارباەۆ.
تۇركىتىلدەس مەملەكەتتەردىڭ ىنتىماقتاستىعى كەڭەسى 2009 جىلى قازاقستان رەسپۋبليكاسى پرەزيدەنتىنىڭ باستاماسىمەن ناحچىۆان قالاسىندا (ازەربايجان) قۇرىلدى. قازىرگى ۋاقىتتا كەڭەستىڭ قۇرامىنا ازەربايجان, قازاقستان, قىرعىزستان جانە تۇركيا كىرەدى. تۇركى كەڭەسىنىڭ باس حاتشىلىعى ىستانبۇل قالاسىندا (تۇركيا) ورنالاسقان.
اباي اسانكەلدى ۇلى,
"ەگەمەن قازاقستان"
