«ۇلتتىق سپورت تۇرلەرى مەن جاستار ساياساتى سالاسىنداعى ىنتىماقتاستىق» دەگەن تاقىرىپتا وتەتىن سامميتكە ازەربايجان پرەزيدەنتى يلحام اليەۆ, قازاقستان پرەزيدەنتى نۇرسۇلتان نازارباەۆ, قىرعىزستان پرەزيدەنتى سوورونباي جەەنبەكوۆ جانە تۇركيا پرەزيدەنتى رەدجەپ تايىپ ەردوعان قاتىسادى دەپ كۇتىلۋدە. سونىمەن قاتار, بيىلعى سامميتكە وزبەكستان تاراپىنىڭ دا قىزىعۋشىلىعى جوعارى ەكەندىگى ايتىلعان, اتاپ ايتقاندا, وزبەكستان پرەزيدەنتى شاۆحات ميرزيوەۆ جيىنعا كەلەدى دەپ كۇتىلۋدە.
سامميت كەزىندە تۇركى ينتەگراتسياسىن مادەنيەت, سپورت جانە ءبىلىم بەرۋ سالالارىندا تەرەڭدەتە ءتۇسۋ تۋرالى پىكىر الماسىلادى. سونىمەن بىرگە, VI سامميت كەزىندە بىرقاتار قۇجاتتارعا قول قويىلادى. ولاردىڭ قاتارىندا TWESCO قىزمەتىنە تىكەلەي قاتىستى قۇجاتتار دا بار.
ەستەرىڭىزگە سالار بولساق, تۇركى كەڭەسىنىڭ كەزەكتى ءسامميتى اراعا ءۇش جىل سالىپ ۇيىمداستىرىلىپ وتىر. تۇركىتىلدەس مەملەكەت تەردىڭ باسشىلارى وسى فورماتتا 2015 جىلى استانادا كەزدەسكەن بولاتىن. ال, تۇركى كەڭەسى مەملەكەت باسشىلارىنىڭ ءسامميتى العاش رەت 2011 جىلى الماتىدا «تۇركىتىلدەس ەلدەردىڭ ەكونوميكالىق ىنتىماقتاستىعى», 2012 جىلى بىشكەكتە «مادەني-گۋمانيتارلىق سالاداعى ىنتىماقتاستىق», 2013 جىلى ازەربايجاننىڭ گابالا قالاسىندا «كولىك جانە كوممۋنيكاتسيا سالاسىنداعى ىنتىماقتاستىق», 2014 جىلى تۇركيانىڭ بودرۋم قالاسىندا «تۋريزم سالاسىنداعى ىنتىماقتاستىق», 2015 جىلى استانادا «اقپارات سالاسىنداعى ىنتىماقتاستىق» دەگەن تاقىرىپتارمەن وتكەن بولاتىن.
تۇركىتىلدەس مەملەكەت باسشىلارىنىڭ VI سامميتىندە قازاقستان كەڭەسكە توراعالىق قىزمەتىن قىرعىزستان رەسپۋبليكاسىنا تاپسىرادى.
