قازاقستانداعى ساياسي پارتيالاردىڭ وڭتۇستىكتەگى فيليالدارىنىڭ ءبىرازىنا قوڭىراۋ شالعانبىز. سايلاۋالدى ۇگىت-ناسيحات جۇمىستارىنا ءار قيلى كىرىسىپ جاتىر. اۋدان, اۋىلدارداعى جاقتاستارىنىڭ ءتىزىمىن ءالى تولىق الىپ ۇلگەرمەگەندەرى دە بار. استانا, الماتىدان كەلەتىن سەركەلەرىن كۇتىپ, ءالىپتىڭ ارتىن باعىپ وتىرعاندارى دا بارشىلىق.
ولارعا قاراعاندا ء“ادىلەت” دەموكراتيالىق پارتياسى اتقا جەڭىل بولىپ تۇرعان سىڭايلى. قىسقا مەرزىمدە وڭتۇستىكتىڭ شىعىسى مەن باتىسىن كوكتەي ءوتىپ, جاقتاستارىمەن بىرنەشە كەزدەسۋ وتكىزگەن پارتيانىڭ سەركەسى ماقسۇت ءنارىكباەۆ تەرىسكەيگە, ياعني سوزاق اۋدانىنا اتتانعاندا, مۇساعالي دۋانبەكوۆ باستاعان بەلسەندىلەرى شىمكەنتتەگى “وتىرار” تەلەارناسىنىڭ ءباسپاسوز ورتالىعىندا جۇرتشىلىقپەن كەزدەسۋ ءوتكىزدى. جيىنعا اتاجۇرتقا ورالعان قانداستارىمىز وداعىنىڭ توراعاسى ارتىقباي ۇكىباەۆ جانە تاۋەلسىز كاسىپوداق وداعىنىڭ وكىلدەرى قاتىسىپ وتىردى. “ادىلەت” دەموكراتيالىق پارتياسىنىڭ سايلاۋالدى تۇعىرناماسى تولىق تارازىلانعاننان كەيىن باسقوسۋ دوڭگەلەك ۇستەل جاعدايىنا ويىستى.
ەل ىشىندە ادىلەتتىك تاپپاي جۇرگەندەر كوپ. زاڭ تالاپتارىن بىلمەيتىندىكتەرى دە وقىس وقيعاعا ۇرىندىرىپ, وكىنىشكە ۇلاسىپ جاتادى. كەي رەتتە وسىعان زاڭ ورىندارىنىڭ ءوزى جول بەرىپ جاتاتىندىعى دا بار. ماسەلەن, جەتى جىل سۋديا بولىپ قىزمەت اتقارعان كەلىنشەك وسى قىزمەتتەن جوعارىداعى باسشىلاردىڭ قىلمىسقا يتەرمەلەۋىنەن كەتكەندىگىن ايتىپ شاعىندى.
سۇراقتار كوپ قويىلدى. جاۋاپ بەرىلدى. ارينە, ءبىر ماسەلەنى ءبىر مەزگىلدە شەشەتىن سيقىرشىنىڭ تاياعى ەشكىمدە جوق. ول ەرتەگىلەردە عانا بولاتىنىن اركىم-اق تۇسىنەدى.
“ادىلەت” پارتياسىنىڭ وقو-داعى فيليالى ءتورايىمىنىڭ ورىنباسارى سالتانات قۇتتىباەۆا تولعاقتى ءماسەلەلەردى شەشۋگە ۋاقىت كەرەكتىگىن ايتادى.
* * *
بۇگىندە «ادىلەت» دەموكراتيالىق پارتياسىن قولداۋ ماقساتىندا وزگە وڭىرلەردەگى جاستار دا ايانىپ جاتقان جوق. كەشە استانانىڭ سول جاعالاۋىندا پارتيانىڭ «ءادىل جاستار» قاناتى وكىلدەرى قازاقستان تاۋەلسىزدىگىنىڭ 20 جىلدىق مەرەيتويىنا وراي ارنايى اۆتوشەرۋ ۇيىمداستىردى. بۇل شاراعا 20-عا تارتا اۆتوكولىك تارتىلدى. اۆتوشەرۋدىڭ باستى ماقساتى – قوعامنىڭ سايلاۋعا دەگەن نازارىن اۋدارتۋ, جاستار بەلسەندىلىگىن ارتتىرۋ جانە الداعى سايلاۋدا «ادىلەت» دەموكراتيالىق پارتياسىنا قولداۋ كورسەتۋ. بۇل تۇرعىدا ادىلەتتىكتەردىڭ ەل تاۋەلسىزدىگىنىڭ 20 جىلدىعىن سايلاۋ ۇدەرىستەرىمەن, ونىڭ ىشىندە ۇگىت-ناسيحات جۇمىستارىمەن بايلانىستىرۋى كورەر كوزگە ۇتىمدىلىعىمەن ەرەكشەلەنگەنىن اتاپ كورسەتكەن ءجون. بۇل ارادا نەگىزگى يدەيا ەل تاۋەلسىزدىگى بولماسا, دەربەس مەملەكەت رەتىندەگى دەموكراتيالى جانە اشىق سايلاۋ دا بولماس ەدى دەگەندى مەڭزەدى. باقتيار تايجان.
