«قازاقستاندى اش: اۋديوۆيزۋالدى دامىتۋعا ارنالعان جاڭا مۇمكىندىكتەر» اتتى ءىس-شارادا مىناداي كارتينالاردىڭ ترەيلەرلەرى كورسەتىلەدى: «وزەن» (رەج. ە.بايگازين), «ارۋاق» (رەج.ح.احمەتوۆ), «امىرە» (رەج. د.ۆەسپا), «تالان» (رەج. ب.قالىمبەتوۆ), «ول» (رەج. ا.ساتاەۆ), «الماس قىلىش» (رەج. ر.ابدراشەۆ), «اناعا اپارار جول» (رەج. ا.ساتاەۆ), «ورالمان» (رەج. س.قۇرمانبەكوۆ), ء«بىزدىڭ قالانىڭ كىشكەنتاي حانزاداسى» (رەج. ت.تەمەنوۆ), «شىڭىراۋ» (رەج. ج.جەتىرۋوۆ), «جات» (رەج. ە.تۇرسىنوۆ). بۇدان بولەك «كۇلتەگىن» (رەج. ا.ءاابىلدينوۆ), «Jumper» (رەج. ارمانبەيسەمباەۆ) جانە «مۇزبالاق» (رەج. ت.مايدان, ت.تولەۋعازى) سىندى انيماتسيالىق فيلمدەردىڭ ترەيلەرلەرى كورسەتىلەدى.
حالىقارالىق «ەۋرازيا» كينوفەستيۆالىنىڭ پرەزيدەنتى ايمان مۇساقوجاەۆا بۇل شارا جايىندا: «بۇل شارا ءبىزدىڭ كينومىز بەن مادەنيەتىمىزدىڭ دامۋىنا اسەر ەتەتىندىكتەن, قازاق كينەماتوگرافيستەرى مەن مادەنيەت قايراتكەرلەرى ءۇشىن وتە ماڭىزدى وقيعا بولىپ وتىر. وسىعان وراي, مەن كوركەم ونەردى باعالاي بىلەتىن ۆەنەتسيا قالاسىنا شاقىرىپ, ءبىزدىڭ كينەماتوگرافيامىزدى تانىستىرۋعا مۇمكىندىك بەرگەنى ءۇشىن يتاليالىق ANICA حالىقارالىق دەپارتامەنتىنىڭ باسشىسى روبەرتو ستابيلەگە العىسىمدى بىلدىرەمىن. ءبىزدىڭ شارامىز تاريحى تەرەڭ جانە بەدەلدى كينوفەستيۆالدەردىڭ ءبىرى ۆەنەتسيا كينوفەستيۆالى ءوتىپ جاتقان ۋاقىتتا وتكىزىلىپ جاتقانى كوڭىل قۋانتادى,» - دەپ ايتتى.
سونداي-اق, شارا بارىسىندا قر مادەنيەت جانە سپورت مينيسترىلىگى قۇرىلتايشىسى بولىپ تابىلاتىن «ەۋرازيا» كينوفەستيۆالى تانىستىرىلادى. «ەۋرازيا» – حالىقارالىق كينووندىرۋشىلەر قاۋىمداستىعى (FIAPF) اككرەديتاتسياسىنان وتكەن ورتالىق ازياداعى ەڭ ءىرى كينوفورۋم.
ۆەنەتسياعا باراتىن دەلەگاتسيا قۇرامىندا بولات قالىمبەتوۆ, توقتار قارساقباەۆ, تالعا تەمەنوۆ باستاعان رەجيسسەرلەر مەن اكتەر سانجار ماديەۆ جانە وزگە دە كينو سالاسىنىڭ ماماندارى بولادى. دەلەگاتسيانىڭ قۇرامىندا ەۋرازيالىق جوبا نارىعىندا جۇلدەلى ەكىنشى ورىن العان (جۇلدە – «ا» ساناتىنداعى كينوفەستيۆالگە جولداما) جاس رەجيسسەر اسحات كۋچينچەرەكوۆ تە بار. Eurasia Film Market حالىقارالىق كينو نارىعى 2018 جىلدىڭ شىلدە ايىنىڭ 1 مەن 4 ارالىعىندا XIV حالىقارالىق «ەۋرازيا» كينوفەستۆالىنىڭ اياسىندا استانا قالاسىندا وتكەنىن ەستەرىڭىزگە سالامىز.
75-ءى ۆەنەتسيا كينوفەستيۆالىنىڭ «كوكجيەك» اتتى كونكۋرستىق باعدارلاماسىندا قازاقستان اتىنان ەمير بايگازيننىڭ «وزەن» كارتيناسى قاتىسادى. بۇل كارتينا قر مادەنيەت جانە سپورت مينيسترلىگىنىڭ تاپسىرىسىمەن «قازاقفيلم» اق, Emir Baigazin Production-دە تۇسىرىلگەن. بۇدان بولەك, رەجيسسەر ەلدار شيبانوۆتىڭ «سەكس, قورقىنىش جانە گامبۋرگەرلەر» اتتى 19 مينۋتتىق كارتيناسى دا كينوفەستيۆالدىڭ نەگىزگى باعدارلاماسىنىڭ قىسقا مەتراجدى فيلمدەر سەكتسياسىندا بايقاۋعا قاتىساتىن بولادى.
