ەربول جاستايىنان قولى شەبەر, تەحنيكاعا بەيىم بولىپ ءوسىپتى. كىشكەنە كەزىندە-اق وزىنە ۇنايتىن ويىنشىقتى ءوزى جاساپ الادى ەكەن. كەيىن قولدان كولىك قۇراستىرۋ تۋرالى ويىن اۋىلداستارىنا ايتىپ كورگەنىمەن, وعان ەشكىم سەنە قويماپتى. كەرىسىنشە, كۇلگەندەر كوپ ەكەن.
ەربول ويلاندى, يدەياسىن ءپىسىردى. ءوزىنىڭ نە قۇراستىراتىنىن, ول ءۇشىن نە ىستەۋ كەرەك ەكەندىگىن ءبىلدى. قاجەتتى قۇرال مەن جابدىقتى, قوسالقى بولشەكتەردى ەل ارالاپ جينادى, كەيبىرىن سۇراپ, كەيبىرىن ساتىپ الدى. ءسويتىپ بيىل 7 كۇننىڭ ىشىندە ءوزىنىڭ تراكتورىن قۇراستىرىپ شىعاردى. اۋەلى, قولدان كولىكتىڭ قاڭقاسىن قۇراستىردى. وعان «جيگۋليدىڭ» ارتقى بەلتەمىرىن ورناتتى. كولىككە بۇرىن شوپاندار قۇدىقتان سۋ تارتۋعا پايدالانعان زيد موتورى بەكىتىلدى. «جيگۋليدىڭ» قوزعالتقىش كوروبكاسى ورناتىلدى. سودان «جيگۋلي» سياقتى 5 دەڭگەيلى جىلدامدىقپەن قوزعالاتىن بولدى. بىراق ساعاتىنا 60 شاقىرىمدى ءجۇرۋ ەربولعا كەرەك ەمەس ەدى. سول سەبەپتى ول كولىگىنە جاڭا شكيۆ تاقتى. جاڭا شكيۆ اگرەگاتتاردىڭ, ياعني ءشوپ شاباتىن وراق پەن تىرناۋىشتىڭ شابىندىقتىڭ بەتىندە ءۇزىلىسسىز, قالىپتى جۇمىس جاساۋىنا مۇمكىندىك بەردى. ايتپاقشى, ەربول تىرناۋىشتى دا كولىگىنە لايىقتاپ ءوزى جاساپ الدى. كەڭەس كەزىندەگى وگىزگە ارنالعان 1, 2 مەترلىك وراق جاڭا قوندىرعىعا كەرەمەت ۇيلەسە كەتتى. كولىكتىڭ الدىنا «جيگۋليدىڭ», ال ارتىنا «گازەلدىڭ» دوڭگەلەگى تاعىلدى. قازىر كوگەرىستە جاسالعان تراكتور شابىندىقتا ءشوپ شاۋىپ, شاپقان ءشوپتى اۋىلعا تاسىپ, «بۇرقىراتىپ» ءجۇر. ەربول ەندى تراكتورىنا لايىقتاپ ءشوپ تايلاعىش جاساپ الماق. شاڭسورعىشتىڭ موتورىنان جەم جاراتىن اپپارات جاساپ جۇرگەن ەربولدىڭ باسىندا يدەيا دەگەن جەتەتىن سياقتى.
ەربول تراكتورىنىڭ ەڭبەك ونىمدىلىگىنە كوڭىلى تولاتىنىن ايتادى. ماسەلەن, تراكتور ءوزى شاۋىپ, ءوزى تىرمالاپ, كۇنىنە 5 بۋمانىڭ شاماسىندا ءشوپ دايىندايدى. ادام كۇشى تەك تەحنيكانى باسقارۋعا كەتەدى. قىرۋار جۇمىستى ءبىر ءوزى جاسايتىن تراكتوردىڭ ءبىر كۇندە جاعاتىن بەنزينى 5 ليترگە دە جەتپەيدى. قازىر ەربول ەكى اۋلاعا دا جەتەتىن ءشوپ قورىن دايىنداپ بولىپ قالدى.
باۋىرجان شيرمەدين ۇلى,
جۋرناليست
باتىس قازاقستان وبلىسى
