اتالمىش قاۋىمداستىقتى بۇعان دەيىن امانتاي كۇرەنبەكوۆ باسقارىپ كەلدى. بۇكىلقازاقستاندىق قويان-قولتىق ايقاس قاۋىمداستىعىنىڭ پرەزيدەنتىن قايتا سايلاۋ - قر مادەنيەت جانە سپورت ءمينيسترى ارىستانبەك مۇحامەدي ۇلىنىڭ باستاماسى. بۇعان قولداۋ بىلدىرگەن قاۋىمداستىقتىڭ باسقا مۇشەلەرى ءبىراۋىزدان نۇرلان ەرمەكباەۆقا داۋىس بەردى. بۇگىن استانادا وتكەن جيىنعا ارىستانبەك مۇحامەدي ۇلىمەن بىرگە اتالمىش قاۋىمداستىقتىڭ بۇرىنعى پرەزيدەنتى امانتاي كۇرەنبەكوۆ تە قاتىستى.
«بۇكىلقازاقستاندىق قويان-قولتىق ۇرىس قاۋىمداستىعىن باسقارۋعا سەنىم بىلدىرگەندەرىڭىز ءۇشىن شىن جۇرەكتەن العىس ايتقىم كەلەدى. قويان-قولتىق ۇرىس - وتە ماڭىزدى سپورت. قازاقستان رەسپۋبليكاسىنىڭ پرەزيدەنتى, قر قارۋلى كۇشتەرىنىڭ جوعارعى باس قولباسشىسى قازاقستان حالقىنا جولداۋىندا «سپورتپەن شۇعىلدانۋ, دەنە شىنىقتىرۋمەن اينالىسۋ - ءومىردىڭ ءار سالاسىندا ءتۇرلى قيىندىقتاردى جەڭە بىلۋگە, جەڭىسكە جەتەلەيتىنىن» ايتتى. وسىعان بايلانىستى ارميا ءۇشىن, قارۋلى كۇشتەر ءۇشىن سپورتتىڭ قولدانبالى ءتۇرىنىڭ ماڭىزى ەرەكشە. ءبىز وسىنداي جۇمىستى جالعاستىرامىز دەگەن ويدامىن. قاۋىمداستىق بىرنەشە جىل بويى جۇمىس ىستەپ, وسى مەرزىم ىشىندە جاقسى جەتىستىكتەرگە قول جەتكىزدى», دەدى نۇرلان ەرمەكباەۆ.
ءوز كەزەگىندە ارىستانبەك مۇحامەدي ۇلى نۇرلان ەرمەكباەۆتى قاۋىمداستىق پرەزيدەنتى بولىپ سايلانۋىمەن قۇتتىقتادى.
«قازىرگى كەزدە قارۋلى كۇشتەردىڭ دەڭگەيى ايتارلىقتاي كوتەرىلگەنىن كورىپ وتىرمىز. قازاقستان سپورتشىلارى قانداي جارىستار بولماسىن, جوعارى كورسەتكىشتەرگە قول جەتكىزىپ جاتىر. مەن, البەتتە, بارلىق سپورت بىرلەستىكتەرىنىڭ اتىنان نۇرلان بايزاق ۇلىن قاۋىمداستىق پرەزيدەنتى بولىپ سايلانۋىمەن قۇتتىقتايمىن. نۇرلان بايزاق ۇلى - ءوزى دە كەرەمەت سپورتشى, كوپتەگەن سايىستاردىڭ جەڭىمپازى, 1988 جىلى سپورت شەبەرلىگىنە ۇمىتكەر اتانعان. قاۋىمداستىقتىڭ دامۋىنا جاڭا كوكجيەكتەر اشىلعانىنا سەنىمدىمىن», دەدى ارىستانبەك مۇحامەدي ۇلى.
