توپتىق تۋرنيردە جەرلەستەرىمىز بۇعان دەيىنگى الەم بىرىنشىلىگىندە جۇلدە العان چەحيا جانە بەلارۋس قۇرامالارىمەن كەزدەستى. العاشقىلارىن ۇتتىق (4:3), ەكىنشىسىمەن تەڭ تۇستىك (1:1). سونىڭ اراسىندا جاڭا زەلانديانى جەڭدىك (2:0). وسىلايشا, «ۆ» توبىندا كوش باستاپ, پلەي-وفف كەزەڭىنە وتتىك. شيرەك فينالدا ارگەنتينادان ايلامىزدى اسىرساق (6:2), جارتىلاي فينالدا پورتۋگاليادان باسىم تۇستىك (3:2). وكىنىشكە قاراي, فينالدا الەمنىڭ ءتورت دۇركىن چەمپيونى دەگەنگ دارداي اتاعى بار رەسەي قۇراماسىنا ءالىمىز جەتپەدى (2:4). ءۇشىنشى ورىنعا ۋكراينا فۋتزالشىلارى تابان تىرەدى.
وسى ويىننان كەيىن, «استانا ارەنادا» چەمپيوناتتىڭ سالتاناتتى جابىلۋ ءراسىمى ءوتتى. ونىڭ بارىسىندا ارنايى كەلگەن قوناقتار وسى چەمپيوناتتىڭ ۇيىمداستىرۋشىلارىنا كەرەمەت قولداۋ كورسەتكەنى ءۇشىن العىس ءبىلدىرىپ, ارتىنشا الماتى قالاسى اكىمىنىڭ ورىنباسارى ارمان قىرىقباەۆ فيسۋ تۋىن كەلەسى الەم چەمپيوناتىن قابىلدايتىن پولشا وكىلىنە تاپسىردى. سونىمەن قاتار, جۇلدە العان كوماندالاردىڭ بارلىعى دا كۋبوك جانە مەدالمەن ماراپاتتالىپ, ۇزدىك ويىنشىلار ءتۇرلى اتالىمدار بويىنشا ارنايى سىيلىقتارعا يە بولدى. ولاردىڭ قاتارىندا قازاقستاندىق ءبىرجان ورازوۆ – ۇزدىك قورعاۋشى, ال داۋرەن تۇرساعۇلوۆ – ۇزدىك شابۋىلشى اتاندى.
ءسويتىپ, الماتىدا وتكەن جارىستا قازاقستاننىڭ ستۋدەنتتەرى ءوز تاريحىندا تۇڭعىش رەت الەم بىرىنشىلىگىنىڭ جەڭىس تۇعىرىنا كوتەرىلدى. ال رەسەي بولسا, بەسىنشىڭ مارتە باس جۇلدەنى ولجالاپ وتىر. بۇل كورسەتكىش جاعىنان ولار برازيليامەن تەڭەستى. وڭتۇستىك امەريكانىڭ وعلاندارى 1984, 1996, 2000, 2010, 2016 جىلدارى الدارىنا جان سالماسا, رەسەيلىكتەر 1994, 2002, 2006, 2014, 2018 جىلدارى قارسىلاس شاق كەلتىرمەدى. سونداي-اق, ۋكراينا ءۇش مارتە (1998, 2004, 2012), ال يسپانيا (1990), يتاليا (1992) جانە پورتۋگاليا (2008) ءبىر-ءبىر رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى.
ايەلدەر اراسىندا وتكەن جارىستا دا رەسەي التىننان القا تاعىندى. ەكىنشى جانە ءۇشىنشى ورىنداردا ۋكراينا مەن پورتۋگاليا. قازاقستاننىڭ قىزدارى ايتۋلى دودادا قالىڭ توپتىڭ اراسىندا قالىپ قويىپ, ەل سەنىمىن اقتاي المادى. ەستەرىڭىزگە سالا كەتەيىك, 2008-2016 جىلدار ارالىعىندا ۇيىمداستىرىلعان بەس دۇنيەجۇزىلىك دودانىڭ بارلىعى دا برازيليا ارۋلارىنىڭ ايقىن جەڭىسىمەن اياقتالعان ەدى. الايدا الماتىعا برازيليالىقتار كەلمەدى. سول ءساتتى ۇتىمدى پايدالانعان رەسەيلىكتەر العاش رەت التىن تۇعىردان قول بۇلعادى. ال وعان دەيىن ولار الەم بىرىنشىلىگىندە ءبىر التىن جانە قوس قولا مەدالدى يەلەنگەن بولاتىن.
عالىم سۇلەيمەن,
«ەگەمەن قازاقستان»
الماتى
