شارانىڭ اشىلۋ سالتاناتىندا ءسوز العان وبلىستىق ىشكى ساياسات باسقارماسى باسشىسىنىڭ ورىنباسارى ايدار سادىرباەۆ «جىگىت سۇلتانى» بايقاۋى «رۋحاني جاڭعىرۋ» باعدارلاماسىنىڭ اياسىندا وسىمەن ەكىنشى مارتە ۇيىمداستىرىلىپ جاتقانىن, مۇنىڭ الدىندا اباي اۋدانىندا «اياۋلى كەلىن» سايىسى وتكەنىن ايتتى. «جاستار باسەكەگە قابىلەتتى بولۋى ءۇشىن ەڭ اۋەلى ءوز تاريحىن, ءتول مادەنيەتىن, سالت-داستۇرلەرىن جاقسى ءبىلۋى قاجەت. «رۋحاني جاڭعىرۋ» باعدارلاماسىنىڭ دا نەگىزگى وزەگى وسى بولسا كەرەك. سايىستى وتكىزۋدەگى ماقسات – جاستاردىڭ بويىنا ۇلتتىق قۇندىلىقتارىمىزدى ءسىڭىرۋ. مۇنداي ءىس-شارالار الداعى ۋاقىتتا دا جالعاسىن تابادى», - دەدى ول.
كوكپەكتى اۋدانى اكىمىنىڭ ورىنباسارى داۋرەن قويگەلدين جاستار رەسۋرستىق ورتالىعىمەن بىرلەسە وتىرىپ بۇل شارانى وتكىزۋگە مۇقيات دايىندالعاندارىن, اۋىل سىرتىنا كيىز ۇيلەر تىگىلىپ, التىباقان ورناتىلعانىن جەتكىزدى. ء«ار اۋداننان كەلگەن جىگىتتەردىڭ ونەرىنەن بولەك اۋدان حالقىنا ارنالعان باعدارلامامىز دا بار. ول باعدارلامامىز بايگە, بۇقا تارتىس, قوي كوتەرۋ, اسىق اتۋ, لاڭگى تەبۋ سىندى ۇلتتىق ويىندارعا قۇرىلعان», – دەدى د.قويگەلدين.
قاتىسۋشىلار ءبىرىنشى كەزەڭدە تەڭگە ءىلۋ, اۋدارىسپاق, قازاق كۇرەسى, قول كۇرەسى سىندى ۇلتتىق ويىن تۇرلەرىنەن باق سىنادى. تەڭگە ءىلۋ سايىسىندا 12 جىگىتتىڭ تورتەۋى عانا (اباي, زايسان, كۇرشىم, كوكپەكتى) تالاپ ۇدەسىنەن شىعىپ, جەردە جاتقان وراۋلى تەڭگەنى كوككە لاقتىردى. بارىنەن دە اۋدارىسپاق باسەكەسى تارتىسقا تولى بولدى. اسىرەسە تارباعاتايدىڭ اقجار اۋىلىنان كەلگەن قارعا بويلى ابزال بەكباەۆتىڭ قارىمى كورەرمەندى ءتانتى ەتتى. اككى, ادىسقوي ابزال بىرەسە قارسىلاسىن ات ۇستىنەن ج ۇلىپ السا, بىرەسە قۋلىققا باسىپ, قارسىلاسىنىڭ اياعىنان ۇزەڭگىدەن شىعارىپ جىبەرىپ, باسىمدىعىن تانىتتى. ول اقتىق سىندا كۇرشىمدىك ەراسىل احمەتوۆپەن كەزدەسىپ, جەڭىپ تۇرىپ جەڭىلىپ قالدى دەۋگە بولادى. ابزال ادەتتەگىدەي ءوزىنىڭ سۇيىكتى ادىسىنە سالىپ, قارسىلاسىنىڭ اياعىن ۇزەڭگىدەن شىعارىپ, ارى اۋدارىپ جىبەرگەن. اتتان قۇلادى دەپ سەنگەن بولۋى كەرەك, ءوزى دە جەڭىسىنە ماساتتانىپ جەرگە سەكىرىپ تۇسكەن. سويتسە ەراسىل اتتىڭ ءبىر جاعىنا اۋعانىمەن, جەرگە اياعى تيمەگەن ەكەن. سودان نە كەرەك, اۋدارىسپاق ەرەجەسى بويىنشا كۇرشىمدىك ەراسىل جەڭىسكە جەتتى. قول كۇرەسىندە كوكپەكتى اۋدانىنىڭ تاسساي اۋىلىنىڭ تۋماسى ساياحات تۇرلىبەكوۆ ءساتتى ونەر كورسەتە ءبىلدى. ال قازاق كۇرەسىنەن وتكەن تارتىستا ايبەك نۇعىماروۆ, مۇحيت تۇرسىنوۆ سىندى اتاقتى بالۋانداردىڭ جەرىنەن كەلگەن ايدوس ۇركىمباەۆ قارسىلاس شاق كەلتىرمەدى. ەكىنشى كەزەڭدە جىگىتتەر قاليحان التىنباەۆ اتىنداعى اۋداندىق مادەنيەت ۇيىندە بىلىمدەرى مەن بىلىكتىلىكتەرىن تارازىعا سالدى.
سونىمەن, بايقاۋ قورىتىندىسىندا باس جۇلدەنى ۇلىلار مەكەنى - اباي اۋدانىنان كەلگەن ايدوس ۇركىمباەۆ يەلەنىپ, «جىگىت سۇلتانى» اتانىپ, ات ءمىنىپ, شاپان كيدى. ءبىرىنشى ورىندى كوكپەكتىلىك ساياحات تۇرلىبەكوۆ, ەكىنشى ورىندى زايساندىق راۋان ساحانوۆ, ءۇشىنشى ورىندى كۇرشىمدىك ەراسىل احمەتوۆ قانجىعالارىنا بايلادى.
ازامات قاسىم,
«ەگەمەن قازاقستان»
شىعىس قازاقستان وبلىسى,
كوكپەكتى اۋدانى
سۋرەتتەردى تۇسىرگەن – دارحان بەردىبەك
