پارتيا قولداۋىمەن جاڭا وقۋ جىلىندا ايماق مەكتەپتەرىندە 277 ءىت-سىنىپ اشىلادى دەپ جوسپارلانىپ وتىر. وندا وقۋشىلار ۆەب-ديزاين, روبوتتى تەحنيكا, مەحاترونيكا, باعدارلامالاۋ نەگىزدەرى جانە 3D مودەلدەۋ بويىنشا تەرەڭدەتىلگەن ءبىلىم الماق. ماۋلەن اشىمباەۆ وسكەمەن قالاسىنداعى №46 مەكتەپتە وڭىرلىك «مەنىڭ مەكتەبىم» اكتسياسى شەڭبەرىندە اشىلعان وسىنداي سىنىپتىڭ بىرىنە ارنايى باردى. جالپى, الداعى ءۇش جىلدا ەلىمىز بويىنشا پارتيانىڭ باستاماسىمەن 1 مىڭنان استام تەگىن ءىت-سىنىپ اشىلىپ, جىلىنا 150 مىڭ جاس تسيفرلى باعىتتا بىلىمدەرىن جەتىلدىرەتىن بولادى. «پارتيانىڭ مۇرىندىق بولۋىمەن قازاقستاندا وسىنداي 1 مىڭ سىنىپ اشىلادى. سولاردىڭ العاشقىلارى, مىنە شىعىستا ىسكە كىرىسىپ وتىر. بۇل – قۋانتارلىق جايت. بۇل سىنىپتاردا وقۋشىلار بىلىمدەرىن ۇشتاپ, كەلەشەگى زور سالانىڭ قىر-سىرىنا قانىعادى», دەدى ول.
وسى جەردە جاس تەحنيك ستانساسىندا وقيتىن اتالعان مەكتەپتىڭ وقۋشىلارى وزدەرى قۇراستىرعان روبوتتاردىڭ «ونەرىن» كورسەتتى. مۇعالىمدەرمەن اڭگىمەلەسكەن پارتيا توراعاسىنىڭ ءبىرىنشى ورىنباسارى ءىت-ساباقتاردىڭ پايداسىنا توقتالىپ, بۇل باعىتتاعى پاندەر بالالاردى كرەاتيۆتى ويلاۋعا باۋليتىنىن, بولاشاقتا بۇكىل الەم وسى سالانى دامىتاتىنىن, قازاقستان وسى سىنىپتار ارقىلى كوشتەن قالماۋ قامىنا كىرىسكەنىن جەتكىزدى.
وسكەمەن پوليتەحنيكالىق كوللەدجىندە اشىلعان وسىنداي ءىت-ورتالىققا بارعان پارتيا توراعاسىنىڭ ءبىرىنشى ورىنباسارى مۇنداعى وقىتۋ تەحنولوگياسىمەن تانىستى. اتالعان ورتالىقتا جەرگىلىكتى جۇمىسسىز ازاماتتار باعدارلامالاۋ نەگىزدەرىن مەڭگەرىپ, ينجەنەرلىك گرافيكا ازىرلەۋگە, بەينەمونتاج جاساۋعا, دەربەس كومپيۋتەرلەردى دياگنوستيكادان وتكىزىپ, جوندەۋگە جانە روبوت تەحنيكالارىمەن جۇمىس ىستەۋگە ماشىقتانادى. العاشقى ون تۇرعىن «ەۆم وپەراتورى» ماماندىعى بويىنشا ءبىلىم الۋعا كىرىسىپ تە كەتكەن. قىسقا مەرزىمدى كۋرستار ءبىر ايدان التى ايعا دەيىن سوزىلادى. «بولاشاقتا ءىت-ماماندارعا دەگەن قاجەتتىلىك ارتا تۇسەدى. سۇرانىس قازىردىڭ وزىندە دە جوعارى. ەلىمىز جاپپاي تسيفرلاندىرۋ باعدارلاماسىن قولعا الدى. بۇل باعىتتاعى ەڭ وزەكتى ماسەلە – بىلىكتى مامانداردىڭ تاپشىلىعى. وسىنداي ورتالىقتار اتالعان ماسەلەنى شەشۋگە سەپتەسپەك. شىعىستىڭ اتالعان ىستە العاش بولىپ قادام جاساپ وتىرعانى قۋانتارلىق», دەدى م.اشىمباەۆ.
بۇل ءىت-ورتالىق ءوز تۇلەكتەرىن جۇمىسپەن قامتۋ ءۇشىن جەرگىلىكتى جۇمىس بەرۋشى كومپانيالارمەن, كاسىپورىندارمەن جانە اتقارۋشى بيلىك ورگاندارىمەن تىعىز بايلانىس ورناتقان. وبلىستاعى ەكىنشى وسىنداي ورتالىق سەمەيدەگى ەلەكتر-تەحنيكالىق كوللەدجدىڭ بازاسىندا اشىلعان.
«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ جۇمىس ساپارى بارىسىندا وسكەمەندەگى «7 – 20 – 25» يپوتەكالىق باعدارلاماسىنىڭ قاتىسۋشىلارىمەن دە كەزدەستى. ەلباسىنىڭ بەس الەۋمەتتىك باستاماسى اياسىندا قولعا الىنعان «7 – 20 – 25» باعدارلاماسى شىعىستا قارقىندى ىسكە اسىپ جاتىر. وسكەمەندەگى «ەرتىس سيتي» اتالاتىن كەشەندەگى ۇيلەر وسى باعدارلاما بويىنشا ساۋدالانۋدا. اتالعان باعدارلاماعا ەكىنشى دەڭگەيلى جەتى بانك سەرىكتەس اتانىپ وتىر. وبلىس تۇرعىندارىنان 77 ءوتىنىم كەلىپ تۇسكەن ەكەن, سولاردىڭ 43-ىنە بانكتەر نەسيە بەرۋدى ماقۇلداعان. پرەزيدەنتتىڭ بەس الەۋمەتتىك باستاماسى اياسىندا بەكىتىلگەن وسى بىرەگەي باعدارلاما بويىنشا وبلىستا 430 پاتەر ساتىلۋعا ءازىر تۇر. جىل سوڭىنا دەيىن تاعى 800 پاتەر دايىن بولۋى ءتيىس. نەسيەنى ەكىنشى دەڭگەيدەگى جەتى بانك بەرۋدە.
م.اشىمباەۆ «ارزان» دۇكەنىنىڭ ماڭىندا ورنالاسقان «ەرتىس سيتي» تۇرعىن ءۇي كەشەنىنە بارىپ, باسپانالى بولعان قالا تۇرعىندارىن قونىستويلارىمەن قۇتتىقتادى. اتالعان كەشەندە يپوتەكالىق باعدارلاما بويىنشا 30 پاتەر ساۋدالانىپتى. «بۇگىندە ەلىمىزدە باسپانا ماسەلەسى باستى پروبلەمالاردىڭ ءبىرى بولىپ وتىر. وتكەن جىلى قازاقستان بويىنشا 11 ميلليون شارشى مەتر باسپانا تۇرعىزىلدى. دەسەك تە, ءالى دە باسپاناعا ءزارۋ وتانداستارىمىز بار. بۇعان دەيىنگى باعدارلامالاردىڭ شارتتارى قيىن بولعانى دا راس. ولاردىڭ وسىماقىسى دا جوعارى بولدى, ءارى باستاپقى تولەنۋى ءتيىس مىندەتتى سوما 30-50 پروتسەنتتى قۇرادى. وسىعان وراي ەلباسى «7 – 20 – 25» اتتى بىرەگەي باعدارلامانى ازىرلەۋگە تاپسىرما بەرگەن-ءدى. سول ءىس مىنە, جۇزەگە اسىپ جاتىر. باسپانا – وتباسى بەرەكەسىنىڭ كەپىلى. ء«ۇيى جوقتىڭ – كۇيى جوق» دەپ بەكەر ايتىلماعان عوي. سىزدەر وسى باعدارلامانىڭ ارقاسىندا باسپانالى بولىپ وتىرعان العاشقى ازاماتسىزدار. قونىستارىڭىز قۇتتى بولسىن!» دەدى پارتيا توراعاسىنىڭ ءبىرىنشى ورىنباسارى.
ازامات قاسىم,
«ەگەمەن قازاقستان»
