سوڭعى كەرۋەن ساپىندا قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى دميتري كارپوۆ, «شاحتيور» فۋتبول كلۋبىنىڭ بۇرىنعى كاپيتانى, جاتتىقتىرۋشى اندرەي فينونچەنكو جانە بەيجىڭ وليمپياداسىنا قاتىسقان جەڭىل اتلەت سەرگەي زاسيموۆيچ تە بولدى. سونىمەن قاتار, كەرۋەن قۇرامىندا وبلىستىڭ بەلگىلى سپورتشىلارى – اكروباتتار الەكساندرا رۋداكوۆا مەن داميرا تالعات, سەمسەرلەسۋدەن قازاقستان چەمپيوندارى ليونتي مۋسالوۆ, سوفيا سپيچوۆا, جاسمين كاپادجي, انگەلينا نۇرماعامبەتوۆا جانە اناستاسيا كۋليك, سونداي-اق, دارىندى بوكسشىلار مەن پالۋاندار بولدى.
سپورتشىلار شالعاي اۋىلداردا جەتكىنشەكتەرگە شەبەرلىك ساباقتارىن وتكىزىپ, وسكەلەڭ ۇرپاقتى سالاماتتى ءومىر سالتىن, سپورتتىڭ يگىلىكتەرىن ناسيحاتتادى. كەرۋەن بيىلعى جاز ىشىندە قارقارالى مەن بۇقار جىراۋ, نۇرا مەن وساكاروۆ اۋداندارىن ارالاپ ۇلگەردى. وسى كەرۋەننىڭ سەپتەسۋىمەن بوتاقارا مەن نۇرا ەلدى مەكەندەرىندە جاڭا سپورت الاڭدارى پايدا بولدى.
كەرۋەن ولجالى ورالدى دەۋگە بولادى. ەندى وبلىس ورتالىعىندا وسى ساپاردىڭ قورىتىندىلارى بويىنشا مۇراجاي اشىلماق. ول قاراعاندىداعى نۇركەن ءابدىروۆ اتىنداعى سپورت سارايىندا ورنالاسادى. تۇساۋكەسەرى قاراشا ايىنا جوسپارلانعان مۇراجايعا قويىلاتىن جادىگەرلەر كەرۋەن ارالاعان ەلدى مەكەندەردەن جەتكىزىلەدى جانە ولاردىڭ قاتارىن تولىقتىرۋعا وبلىستىڭ ايگىلى سپورتشىلارى دا كومەكتەسپەك. ايتالىق, فۋتبولشىلىق داۋرەنىن ەشقايدا تابان اۋدارماستان «شاحتەردىڭ» ساپىندا وتكەرگەن, كەنشىلەر كومانداسى ەل چەمپيونى بولعان جىلدارى ونىڭ كاپيتانى بولعان اندرەي فينونچەنكو ءوزىنىڭ ايگىلى «14» نومەرلى فۋتبولكاسىن مۇراجاي قورىنا تاپسىرىپ تا قويدى. مۇراجاي جاس ۇرپاق, سپورتسۇيەر قاۋىم ءۇشىن قىزىقتى ءارى تاربيەلىك دە زور بولۋى ءتيىس. سپورتتىق كەرۋەننىڭ دە كوزدەگەن ماقساتى وسى ەدى.
قايرات ءابىلدا,
«ەگەمەن قازاقستان»
قاراعاندى
