ەلىمىزدىڭ تۋىن رەسمي تۇردە كوتەرۋ سالتاناتىنا قازاقستان قۇراماسىنىڭ سپورتشىلارى مەن ەلىمىزدەگى سپورت سالاسىن باسقارۋشى ماماندار قاتىستى.
قازاقستان ۇلتتىق وليمپيادالىق كوميتەتى سپورت ديرەكتسياسىنىڭ باسشىسى, ازيا ويىندارىنداعى قازاقستاننىڭ سپورتتىق دەلەگاتسياسىنىڭ جەتەكشىسى ەلسيار قاناعاتوۆ تۋ كوتەرۋ سالتاناتىنا جينالعان سپورتشىلارعا ساتتىلىك تىلەپ, ازيا ويىندارىنىڭ قازاقستان ءۇشىن ماڭىزدى سپورت دوداسى ەكەنىن اتاپ ءوتتى.
«بۇگىن ازيا ويىندارىندا ەلىمىزدىڭ كوك بايراعى كوتەرىلدى. قازىرگى تاڭدا 200-گە جۋىق سپورتشى دجاكارتا مەن پالەمبانگ قالالارىنداعى اتلەتيكالىق اۋىلعا كەلىپ قونىستانۋدا. قۇراماداعى كوپتەگەن سپورتشىلار جارىس كەستەسىنە ساي ازيا ويىندارىنا الداعى ۋاقىتتا ۇشىپ كەلەدى. اتلەتتەردى كۇتىپ الۋ, ورنالاستىرۋ, تاماقتاندىرۋ ماسەلەلەرى تۇگەلدەي شەشىلگەن. بۇگىندە يندونەزياداعى سپورتشىلارىمىز جاتتىعۋ جۇمىستارىن باستاپ كەتتى. ال كەيبىر كوماندالىق سپورت تۇرلەرىنەن ىرىكتەۋ كەزەڭىندەگى ماتچتار ءوتىپ جاتقانىن بىلەسىزدەر. گاندبولشىلار مەن باسكەتبولشىلارىمىز ازيا ويىندارىنداعى ىرىكتەۋ كەزەڭدەرىن وتكىزۋدە. ءبىز سپورتشىلارىمىزعا ساتتىلىك تىلەيمىز! جانكۇيەرلەر ءۇمىت ارتىپ وتىرعاندىقتان, حالىقتى قۋانتادى دەپ سەنەمىز», - دەيدى ەلسيار قاناعاتوۆ.
«مىنە, ەلىمىزدىڭ كوك بايراعى اتلەتيكالىق اۋىلدا جەلبىرەدى. بۇل ءبىزدىڭ جارىس ورنىنا كەلىپ, قاتىسۋعا دايىن ەكەنىمىزدى راستايدى. سپورتشىلاردىڭ كوڭىل-كۇيى كوتەرىڭكى! كەشە ەلسيار بايمۇحامەد ۇلىنىڭ باستاماسىمەن شتاب وتىرىسىن وتكىزدىك. ازيا ويىندارىندا سپورتشىلارعا كورسەتىلگەن جاعدايدى تولىعىمەن جاقسى دەپ ايتۋعا بولادى. ارينە, ازداعان كەمشىلىكتەر كەزدەسەدى. دەسە دە, جالپى العاندا ءبارى دە كوڭىلدەن شىعادى. تاماقتانۋ دا تولىعىمەن رەتتەلگەن. ازيا ويىندارىنا قازاقستان قۇراماسى قارقىندى جاتتىعۋ جۇمىستارىن جۇرگىزدى. قازاقستان ۇلتتىق وليمپيادالىق كوميتەتى مەن مادەنيەت جانە سپورت مينيسترلىگى سپورتشىلاردىڭ الاڭسىز دايىندالۋىنا تولىقتاي مۇمكىندىك جاسادى. قازاقستان ۇوك پرەزيدەنتى تيمۋر اسقار ۇلى ق ۇلىباەۆ قۇراما كوماندانىڭ دايىندىعىن ءوز باقىلاۋىنا الىپ, بارلىعىن قاداعالاپ وتىردى. سوندىقتان, سپورتشىلارىمىز سەنىمدى اقتاپ, جەڭىسكە جەتەدى دەگەن ءۇمىت مول», - دەيدى سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ اتقارۋشى ديرەكتورى ەلدوس رامازانوۆ.
سپورتشىلار اتىنان ءسوز العان سپورتتىق گيمناستيكا شەبەرى ميلاد كاريمي ازيا ويىندارىندا جۇلدە الۋ ءۇشىن بار كۇشىن سالاتىنىن جەتكىزدى.
"ازيا ويىندارىنا العاش رەت قاتىسىپ وتىرمىن. مۇنداعى كوماندالىق رۋحتى سوزبەن جەتكىزۋ مۇمكىن ەمەس. وسىنداي كەرەمەت ءساتتى ۋنيۆەرسيادا كەزىندە باستان وتكەرگەن ەدىم. كوماندالاستارىممەن بىرگە ەلىمىزدى قۋانتىپ, جۇلدە الۋدى ماقسات ەتۋدەيىز. جانكۇيەرلەر سەنىمىن اقتايمىز", - دەيدى كاريمي.
ەسكە سالا كەتەيىك, جازعى ازيا ويىندارى 18 تامىز -2 قىركۇيەك ارالىعىندا دجاكارتا مەن پالەمبانگ قالالارىندا وتەدى. قازىرگى تاڭدا دجاكارتاداعى اتلەتتەر قالاشىعىنا وليمپيادالىق سپورت تۇرلەرى بويىنشا 15 كوماندا, پالەمبانگتا 4 كوماندا قونىستاندى.
