اقش سوڭعى 30 جىلدان كەيىن اتوم ەلەكتر ستانسالارىن سالۋدى قايتادان قولعا الماق. وتكەن عاسىردىڭ 80-ءشى جىلدارى ەكولوگتاردىڭ تالابىن ەسكەرىپ, ەلدە اەس سالۋدى توقتاتقان ەدى. ءومىر باسقانى كورسەتتى. اەس-ءتىڭ دە ارتىقشىلىقتارى بار ەكەن. جاڭا ستانسانى سالۋعا 8 ميلليارد دوللار ءبولىپ وتىر. ال بۇل ەلدە بۇگىنگە دەيىن 65 اەس جۇمىس ىستەيدى.
بۇكىل الەمدە قازىر 56 اەس سالىنىپ جاتقان كورىنەدى. ولاردىڭ ءبىرازىنا وتىندى ءبىز بەرەمىز. ال وزىمىزدە اەس جوق.
پرەزيدەنت كەپىلدىگى
جاقىندا سايلانعان ۋرۋگۆاي پرەزيدەنتى حوسە مۋحيكا 1 ناۋرىزدا قىزمەتىنە كىرىسەدى. ونىڭ جۇرتتىڭ ەسىندە قالعان مالىمدەمەسىنىڭ ءبىرى – ول شەتەل ينۆەستورلارىنا قارجىلارىن ەل ەكونوميكاسىنا سالۋدى ءوتىندى. ەشقانداي دا مەملەكەتكە الىپ قويۋ, اۋىر سالىق سالۋ بولمايدى دەپ ۋادە بەردى. راسىندا دا, لاتىن امەريكاسىنداعى ءبىراز ەلدە جەكە كاپيتالعا ءتيىسۋ فاكتىلەرى بار.
بەرلۋسكوني قاۋىپتەنەدى
يتاليا پرەمەر-ءمينيسترى سيلۆيو بەرلۋسكوني ءوز پارتياسىنان سايلانعان سەناتورلارعا قوناقاسى بەرىپ وتىرىپ, بىرەۋلەر قاستاندىق جاسايدى-اۋ دەپ قورقاتىنىن ايتىپتى. بۇعان دەيىن دە تالاي رەت وزىنە قارسى قاستاندىق ارەكەت بولعانىن, بىراق ولاردان امان قۇتىلعانىن, ەندى قارسىلاستارىنىڭ جاڭا قاستاندىق ۇيىمداستىرماق ويلارى بارلىعىن مالىمدەپتى. وسىنداي كوڭىلسىز اڭگىمە ايتا وتىرىپ, ۇكىمەت باسشىسى پارتيالاستارىنا بىرنەشە ءان ورىنداپ بەرگەن كورىنەدى.
وپپوزيتسيانى قۇپتايدى
وپپوزيتسيا كەرەك دەگەندى كوپ ادام ايتادى, وعان ەشكىم تاڭدانبايدى دا, كوپ ءمان دە بەرمەيدى. ال بۇل جايىندا تۇركىمەنستان پرەزيدەنتى ايتقان كەزىندە, وعان بۇكىل الەم اقپارات قۇرالدارى ەلەڭ ەتە قالدى. ونىڭ دا سەبەبى بار: ەلدىڭ بۇرىنعى باسشىسى ساپارمۇراد نيازوۆ وپپوزيتسيانى تۇنشىقتىرىپ, ءۇنىن وشىرگەن. جاڭا باسشى عۇربانع ۇلى بەردىمۇحاممەدوۆ زامانى كەلگەندە دە, وپپوزيتسياعا ەسىك اشىلا قويعان جوق ەدى. جاقىندا مينيسترلەر كابينەتىنىڭ ماجىلىسىندە ول وپپوزيتسيالىق ساياسي پارتيا قۇرىلسا, بۇل ەل ومىرىندەگى ماڭىزدى وقيعا بولار ەدى دەپ مالىمدەمە جاسادى. وعان كوپ ادام سەنەرىن دە, سەنبەسىن دە بىلمەي ءجۇر.
دالاي-لاما ۆاشينگتوندا
پرەزيدەنت باراك وبامانىڭ تيبەتتەردىڭ رۋحاني كوسەمى دالاي-لامامەن اق ۇيدە كەزدەسۋى قىتاي ەلىندە ۇلكەن نارازىلىق تۋدىردى. قحر سىرتقى ىستەر مينيسترلىگى بۇل وقيعا امەريكالىقتار تاراپىنان حالىقارالىق كەلىسىمدى, ديپلوماتيالىق ادەپتى بۇزعاندىق دەپ ايىپتادى. ءسىرا, بۇل ەكى ەل اراسىنداعى كەلىسىم شارتتاردا قىتايدىڭ تۇتاستىعى, تيبەتتىڭ قىتايدىكى ەكەندىگى ەسكەرىلگەن بولسا كەرەك. بۇل جەردە وبامانىڭ دا جاعدايىن تۇسىنۋگە بولار. بىلتىر سول دالاي-لامانى قابىلداماعانى ءۇشىن ول ءوز وتانداستارى, ساياسي پارتيالار تاراپىنان ايتارلىقتاي سىن ەستىگەن. بارىنە بىردەي جاعۋ قيىن.
گەنەرالدار قۋىلدى
رەسەي پرەزيدەنتى دميتري مەدۆەدەۆ ىشكى ىستەر مينيسترلىگىندەگى 18 لاۋازىمدى قىزمەت باسشىلارىن جۇمىستان قۋىپتى. ايتەۋىر باسشىلاردى جازالاسا, حالىقتىڭ قۇپ كورەتىنى بار. جۇمىستى اقساتقانداردى, ءتىپتى جەمقورلىققا قاتىسى بارلاردى قۋعان ءجون-اۋ. بىراق قاي نارسەنىڭ دە ناۋقانعا اينالعانىن قۇپتاۋ دا قيىن. مۇندايدا قوساق اراسىندا جازىقسىزدار دا كەتىپ قالۋى ىقتيمال. ايتپەسە, ءبارىن ءبىر قامشىمەن ءبىر كۇندە ساباماي-اق, كەمشىلىكتەرى اشىلعان كەزدە, توپتاپ جازالاۋدى كۇتپەي-اق, شارالار قولدانسا بولماي ما؟
ماويستەر كەكشىل
ءۇندىستاننىڭ باتىس بەنگاليا شتاتىندا ەكسترەميستەردىڭ شابۋىلىنان قاۋىپسىزدىك كۇشتەرىنىڭ 24 قىزمەتكەرى قازا تاپتى. پوليتسيا ۋچاسكەسىنە كەنەت شابۋىل جاساپ, بەيقام ادامداردى قىرىپ سالعان جاساقشىلاردىڭ باسشىسى مۇنى بۇعان دەيىن قاۋىپسىزدىك قىزمەتكەرلەرىنىڭ ماويستەرگە قارسى جۇرگىزگەن وپەراتسياسىنا جاۋاپ دەپ تۇسىندىرگەن. شابۋىلعا 100 ەكسترەميست قاتىسىپ, ءبىراز قارۋ-جاراقتى دا ولجالاپ كەتىپتى.
ازىرلەگەن ماماديار جاقىپ.
