قازىرگى كەزدە 3–6 جاستاعى بالالاردى مەكتەپكە دەيىنگى ءبىلىم بەرۋمەن قامتۋ 93%-دى قۇرايدى. وسى جىلدان باستاپ 25 قالا مەن 6 اۋداندا بالاباقشالارعا ەلەكتروندى تۇردە جولداما بەرۋ ىسكە قوسىلدى. جىل سوڭىنا دەيىن بارلىق وبلىستار اتالعان جۇيەگە كوشەدى.
ەلەكتروندى ۇكىمەت پەن «ە-اكىمدىكتىڭ» ينتەگراتسياسى ارقىلى جولداما بەرۋ پروتسەسى اۆتوماتتاندى.
ورتا ءبىلىم بەرۋدە جاڭارتىلعان مازمۇنعا كوشۋ جالعاسۋدا. وتكەن جىلدان باستاپ 1, 2, 5, 7-ءشى سىنىپتار جاڭا وقۋ باعدارلاماسى مەن وقۋلىقتار نەگىزىندە ءبىلىم الىپ جاتىر.
قىركۇيەكتەن باستاپ 3, 6, 8-ءشى سىنىپتار جاڭارتىلعان مازمۇن بويىنشا وقۋعا كوشەدى.
«وسى جىلدىڭ سوڭىنا دەيىن بالالاردىڭ 75%-ى جاڭارتىلعان ءبىلىم بەرۋ مازمۇنى بويىنشا وقيدى, ەكى جىلدا شامامەن 150 مىڭ مۇعالىم جاڭارتىلعان باعدارلامالار بويىنشا كۋرستاردان ءوتتى», — دەدى ە. ساعاديەۆ.
بيىل تاعى 73 مىڭ پەداگوگ وقىپ جاتىر. مەملەكەت باسشىسىنىڭ تاپسىرماسىنا سايكەس جاڭارتىلعان مازمۇن بويىنشا ساباق بەرەتىن 205 مىڭ (67%) مۇعالىمنىڭ جالاقىسى 30%-عا كوبەيدى. پەداگوگتاردى اتتەستاتتاۋدىڭ جاڭا جۇيەسى ەنگىزىلدى. اتتەستاتسيالاۋعا 60 مىڭعا جۋىق پەداگوگ قاتىستى, ولاردىڭ ىشىنەن 36 مىڭنان استامى اتتەستاتسيادان ءوتتى (63%).
ءمينيستردىڭ ايتۋىنشا, جان باسىنا قارجىلاندىرۋ ءنورماتيۆى بەكىتىلدى. ول استانا قالاسىندا تولىعىمەن 74 مەملەكەتتىك جانە 11 جەكەمەنشىك مەكتەپتە بيىل 1 قىركۇيەكتەن باستالادى. سونىمەن قاتار, اتالعان جۇمىس شىمكەنت قالاسىندا دا باستالدى.
ءبىلىم جانە عىلىم مينيسترلىگىنىڭ دەرەكتەرىنە سايكەس, رەسپۋبليكالىق بيۋدجەت ەسەبىنەن جىل سايىن 110-نان 170-كە دەيىن مەكتەپ سالىنادى.
تەحنيكالىق جانە كاسىپتىك ءبىلىم بەرۋ سالاسىندا, ەلباسىنىڭ تاپسىرمالارىنا سايكەس, مەملەكەتتىك ءبىلىم بەرۋ ستاندارتتارى تولىعىمەن جاڭارتىلدى جانە بارلىق ماماندىقتار بويىنشا 245 مودۋلدىك باعدارلامالار ازىرلەندى. كوللەدجدەرگە باعدارلاما مازمۇنىن جۇمىس بەرۋشىنىڭ تالابى بويىنشا 50%-عا دەيىن جانە قوسارلى ءبىلىم بەرۋ كەزىندە 80%-عا دەيىن وزگەرتۋگە مۇمكىندىك بەرىلدى.
حالىقارالىق تالاپتارعا, سونىڭ ىشىندە WorldSkills ستاندارتتارىنا سايكەس جاڭا ءبىلىم بەرۋ باعدارلامالارىنا كەزەڭ-كەزەڭىمەن كوشىپ جاتىرمىز. قازىرگى تاڭدا 170-تەن استام جاڭارتىلعان باعدارلامالار دايىن, جىل سوڭىنا دەيىن تاعى 70 باعدارلاما دايىن بولادى.
ءبىلىم بەرۋ ۆەدومستۆوسى باسشىسىنىڭ ايتۋىنشا, ەرەكشە ءبىلىم بەرۋ قاجەتتىلىگى بار ادامدارعا تەحنيكالىق جانە كاسىپتىك بىلىمگە ەركىن قول جەتكىزۋ بويىنشا جول كارتاسىنىڭ جوباسى ازىرلەندى.
جوعارى جانە جوعارى وقۋ ورنىنان كەيىنگى ءبىلىم بەرۋدە جۇمىس باسەكەگە قابىلەتتى كادرلاردى دايىنداۋعا, ءبىلىم, عىلىم جانە يننوۆاتسيانى ينتەگراتسيالاۋعا باعىتتالعان. مەملەكەتتىك جوو-لاردىڭ رەكتورلارىن تاعايىنداۋ كەزىندە اشىقتىق پەن باستى تالاپتار ساقتالۋدا. اشىق كونكۋرس ارقىلى 19 رەكتور تاعايىندالدى. الەمنىڭ ۇزدىك ۋنيۆەرسيتەتتەرىنىڭ QS WUR رەيتينگىسىنە 2018 جىلى 10 قازاقستاندىق جوو ەندى.
پرەزيدەنتتىڭ بەس الەۋمەتتىك باستاماسىن ىسكە اسىرۋ اياسىندا بيىل مەملەكەتتىك تاپسىرىس كولەمى 20 مىڭ ورىنعا ارتتى. 2022 جىلعا دەيىن ستۋدەنتتەر جاتاقحانالارىندا 75 مىڭ ورىن ازىرلەۋ جوسپارلانعان. بۇگىندە اكىمدىكتەر 140 جەر تەلىمىنىڭ بار ەكەنىن راستادى.
«2018–2020 جىلدارعا ارنالعان عىلىمي-زەرتتەۋ جۇمىستارى عىلىمدى دامىتاتىن جەتى باسىمدىق اياسىندا ورىندالۋدا. عزتكج-دى قارجىلاندىرۋدىڭ جالپى كولەمىندە تاجىريبەلىك-كونسترۋكتورلىق جۇمىستارعا ارنالعان شىعىندار ۇلەسى 25%-عا جۋىق قۇرادى, جوسپار بويىنشا 22% بولعان. 2018–2020 جىلدارى گرانتتىق قارجىلاندىرۋ بويىنشا 1 مىڭنان استام عىلىمي جوبا جانە عىلىمدى نىسانالى قارجىلاندىرۋ بويىنشا 92 باعدارلامانىڭ ورىندالۋى باستالدى», — دەپ تۇيىندەدى ە. ساعاديەۆ.
ءبىلىم بەرۋدى جانە عىلىمدى دامىتۋدىڭ مەملەكەتتىك باعدارلاماسىن ىسكە اسىرۋ ماسەلەسىن قاراۋ بارىسىندا الماتى وبلىسىنىڭ اكىمى ا. باتالوۆ, پاۆلودار وبلىسىنىڭ اكىمى ب. باقاۋوۆ, ماڭعىستاۋ وبلىسىنىڭ اكىمى ە. توعجانوۆ بايانداما جاسادى.
