وسى جالپاق قۇبا جون ءوزارا جالعاسا كەلە جوڭعار الاتاۋىنا جىمداسىپ بىتەدى. اينالا جاسىل الەم. تاۋ باسىندا وسكەن قاراعاي, ارشادان كوز تۇنادى. مىڭسان ءتۇرلى دارىلىك ءشوپ تە اياق استىندا وسەدى. جازى سالقىن, كوڭىرسامالدى اۋماق. تاۋدىڭ ارعى ەتەگى – قىتاي ەلى. قىردى قۋالاپ مەملەكەتتىك شەكارا وتەدى. قىراعى شەكارشىلاردان بولەك مال باققان شارۋانىڭ شۇباعان ءىزى سايراپ جاتىر. مىڭعىرعان مال. قىسقاسى, قازاقتىڭ ەرتەدەن انگە قوسقان «بەلجايلاۋى» وسى شىعار...
قازىر بۇل جايلاۋدى جىلاندى, لەپسى اۋىلىنىڭ مالشىلارى جايلاپ وتىر. وسى ولكەنىڭ ورەنى, «جەرسۋ» كورپوراتسياسىنىڭ پرەزيدەنتى, بەلگىلى مەتسانات باۋىرجان وسپانوۆتىڭ اسىل تۇقىمدى جىلقى شارۋاشىلىعىندا مىڭ باسقا جۋىق ك ۇلىك بار. مۇنان بولەك تابىن-تابىن سيىر دا ءوسىپ جاتىر. تۇيە ت ۇلىگى دە وسى ماڭدى جايلاعان. اياقتى مال قاراشانىڭ ىزعارى قونىپ, قار قالىڭداعانشا «جامانتاستا» جايىلىپ, قىستاماعا كەلەدى. تاۋ سۋىق بولعانىمەن, «جامانتاستىڭ» قىسى مالعا جايلى دەيدى جىلقىشى قاۋىمى. جانۋارلار قىستان ازىعىن تەۋىپ تاۋىپ, ولەڭ شوپكە اۋىز بىلعاماي ەركىن شىعادى ەكەن. سودان بولار قوڭىن جوعالتپاعان مالدىڭ ءونىمى دە مول بولماق. ەت پەن ءسۇت وندىرۋگە تاپتىرمايتىن جول. مۇنىڭ سىرتىندا, تابيعي ازىقپەن قورەكتەنگەن جىلقى جۇرسىكە شىدامدى, قۋاتتى كەلەدى ەكەن. سالت جۇرىستە شالدىقپايدى. ادەتتە تازا قاندى, ياكي اراب تۇقىمىنان شىققان جانۋارلاردىڭ تۇياعى تاۋلى ولكەدە تاسىرقاپ, ەڭىستى ءارى بيىك جولداردا 2 ساعاتتان ارتىق جۇرىسكە شىدامايدى. ال قازاقتىڭ ءتول تۇقىمىنان تاراعان جابىلار ءدال وسى «جامانتاس» جونىندا ساعاتىنا 10 شاقىرىم جەردى ەركىن يگەرە الادى. كوزىمىز جەتكەسىن ايتىپ وتىرمىز...
جاقىندا باۋىرجان وسپانوۆتىڭ شاقىرۋىمەن ءبىر توپ ازامات لەپسى اۋىلىنا ات سۋىتىپ, ارى قاراي تاۋ جولىمەن سەيىل قۇردى. مادەنيەت جانە سپورت ءمينيسترى ارىستانبەك مۇحامەدي ۇلى باستاپ, الماتى وبلىسى اكىمىنىڭ ورىنباسارى جاقسىلىق ومار قوستاعان سالت اتتىلىار شەرۋى 50 شاقىرىمعا سوزىلعان تاۋ جولىمەن ءجۇرىپ ءوتىپ, «جامانتاس» جايلاۋىنا جەتىپ بەل جازدى. سالت اتقا ءمىنىپ, سەيىل قۇرعاندار اراسىندا قازاقتىڭ ايگىلى سپورتشىلارى دا بولدى. بوكسشى قانات يسلام, ارالاس جەكپە-جەك جەڭىمپازى ارمان وسپانوۆ, وليمپيادا چەمپيونى باقتيار ارتاەۆ, كۇمىس جۇلدەلى چەمپيون نۇرباقىت تەڭىزباەۆ سياقتى جىگىتتەر تاقىمىندارى تيگەن اتپەن تاۋ بوكتەرلەپ ءجۇرىپ ءوتتى. جانە بۇل سەيىلدىڭ ماڭىزى مەن ءمانى بولەك بولدى. قازىر تۇتاس ەلىمىزدەگى سياقتى جەتىسۋ وڭىرىدە دە ءتۋريزمدى دامىتۋعا ەرەكشە كوڭىل ءبولىپ وتىر. ال كوڭىلدى دەمالىس ىزدەپ, تابيعاتقا قۇمارتقان ادام ءۇشىن تاۋ ءتۋريزمىنىڭ ءتۇرلى جولدارىن ۇسىنۋ قاجەت. وتكەندە الاكولدىڭ جاعاسىندا دۋاتلوننان جارىس وتكەن بولاتىن. سول كەزدە جانكۇيەرلەر مەن ۇيىمداستىرۋشىلار تاراپىنان «نەگە سالت اتپەن سەرۋەندەپ, تاۋ اراسىندا دەمالاتىن مارشرۋتتار اشپاسقا؟» دەگەن تىلەك ايتىلعان ەدى. كاسىپكەر باۋىرجان وسپانوۆ قاعىلەزدىك تانىتىپ, سول ماقساتقا جول اشۋعا كىرىسىپتى. بۇيىرسا, جەتىسۋدىڭ الاكول ءوڭىرى تەك جاعاجاي تۋريزمىنەن بولەك تاۋ اراسىندا اتپەن سەرۋەندەۋگە قىزىققان ادامدار ءۇشىن جاڭا دەمالىس ورىنىنا اينالادى. ەكولوگيالىق ءتۋريزمنىڭ فاناتتارى ءۇشىن ءدال وسى «جامانتاس» جايلاۋىنداعىداي تۇمسا تابيعاتقا كوز قاندىرىپ, قازاقتىڭ قىمىزى مەن سىرنە-قۋىرداعىنا قارىن تويدىرىپ قايتۋدان ارتىق راحات بولماس ەدى. ال اتقا ءمىنۋدىڭ ءجونى تىپتەن بولەك. تازى جۇگىرتىپ, قۇس ۇشىراتىن ءداستۇرلى اڭشىلىق جولىن دا جاڭعىرتۋعا مۇمكىندىك بار.
- قازاقتى ات ۇستىنەن كورۋدىڭ ءوزى باقىت قوي. ءارى ۇلتتىق ءداستۇردى ۇلىقتاۋ مەن سالاماتتى ءومىردىڭ سالتىن ۇستانۋدىڭ تاپتىرمايتىن جولى ات سپورتىن دامىتۋ. ءبىز بۇل جەردە كاسىبي سپورتتان بولەك, كوڭىلى قالاعان ءاربىر ادامنىڭ اتقا ءمىنىپ, تابيعاتتا سەرۋەندەۋىنە مۇمكىندىك بەرەتىن بۇقارالىق باعىتتى قولعا الىپ وتىرمىز. وعان بىزدە بارلىق جاعداي بار. ادامداردى قىزىقتىرىپ, قۇلاقتاندىرىپ وسىنداي دەمالىس تۇرلەرىن دامىتپاقشىمىز, - دەدى شاراعا قاتىسقان مادەنيەت جانە سپورت ءمينيسترى ارىستانبەك مۇحامەدي ۇلى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
سۋرەتتەردى تۇسىرگەن جەڭىس ىسقاباي
