سانالى عۇمىرىن سارىتوعاي اۋىلىندا شاعىن عانا مادەنيەت ءۇيىنىڭ مەڭگەرۋشىسى بولىپ اتقارعان كوشەرعالي ماكاروۆ قازاقستاننىڭ باتىس وڭىرىندەگى جىرشىلىق مەكتەبىن جاڭعىرتۋعا ۇلەس قوسقان ۇلكەن ونەرپاز ەدى. تابيعي تالانتىنىڭ ارقاسىندا الاقانداي اۋىلدان شىققان ونەرپازدىڭ ەسىمى قازاقستاننان تىس جەرلەرگە دە جەتتى. 1980 جىلى مۇحيت مەرالى ۇلىنىڭ 140 جىلدىعىنا ارنالعان انشىلەر بايقاۋىنىڭ, 1988 جىلى الماتى قالاسىنداعى رەسپۋبليكالىق جىرشى-تەرمەشىلەر بايقاۋىنىڭ جەڭىمپازى بولعان كوشەرعالي جىراۋ 1988 جىلى باكۋ قالاسىنداعى دۇنيەجۇزىلىك جىرشىلار بايقاۋىنىڭ, 1989 جىلى تۇركى حالىقتارى داستانشىلارىنىڭ حالىقارالىق ونەر فەستيۆالىنىڭ لاۋرەاتى اتانعان ەدى. 2001 جىلى قىزىلوردا قالاسىنداعى «عاسىرلار ءۇنى» جىرشىلاردىڭ «جيەنباي جىراۋ» اتىنداعى بايقاۋىنىڭ جۇلدەگەرى, 2005 جىلى ماڭعىستاۋ قالاسىنداعى «شوتان باتىر» جىرشىلار بايقاۋىنىڭ لاۋرەاتى بولدى. 2005 جىلى مادەنيەت, اقپارات جانە سپورت مينيسترلىگى مەن مادەنيەت پەن ونەردى قولداۋدىڭ مەملەكەتتىك قورىنىڭ «مادەنيەت قايراتكەرى» قۇرمەت بەلگىسىمەن ماراپاتتالدى.
1997 جىلى وڭتايلاندىرۋ تۇسىندا تايپاق اۋدانى تاراپ, جاڭادان پايدا بولعان اقجايىق اۋدانىنىڭ ورتالىعى چاپاەۆ سەلوسىن «قازاقىلاندىرۋعا» كەلگەن توپتىڭ ىشىندە وسى كوشەرعالي اعامىز دا بولدى. چاپاەۆتا جىراۋلار مەكتەبىن اشىپ, تالاي بايگەدە توپ جارعان شاكىرت تە تاربيەلەپ ۇلگەردى. تانىمال جىرشى 2017 جىلى 66 جاسىندا ومىردەن وتكەن ەدى.
اۋىلداسىن ەسكە الۋعا سارىتوعايلىقتار جاقسى ازىرلەنىپتى. كەشتە كوشەرعالي ماكاروۆتىڭ شاكىرتتەرى سۇڭعات جاناەۆ, گۇلجامال قايباليەۆا, دانييار ەلەۋوۆ, ساتىبالدى سۇيەنۇلى, قايرات شابدان ۇلى جانە باسقالارى اۋىل ساحناسىنان اۋەزدى ءان, توكپە جىر شىرقاپ, كورەرمەندى ءتانتى ەتتى. جىرشىنىڭ بىرگە وسكەن جولداسى ورىنباسار جاڭگىروۆ, قۇرداسى, قازاقستان جۋرناليستەر وداعىنىڭ مۇشەسى تىلەس جازىقباي, سارىتوعاي اۋىلدىق وكرۋگىنىڭ اكىمى ابزال جاردەم ۇلى, كورشىلەس اتىراۋ وبلىسى, يندەر اۋدانى مادەنيەت ءۇيىنىڭ ءان-تەرمە ۇيىرمەسىنىڭ جەتەكشىسى ەركىن اۋباكىروۆ, سارىتوعاي مادەنيەت ءۇيىنىڭ ديرەكتورى ارداق شابدانقىزى, سارمان اۋىلىنىڭ تۇرعىنى, زەينەتكەر امانگەلدى قاليتاليەۆ, جەزتاڭداي جىراۋ قايرات بيمانوۆ, كورشىلەس بازارشولان اۋىلدىق وكرۋگىنىڭ اكىمى ەرلان بازارباي ۇلى, اۋداندىق ءماسليحات دەپۋتاتى قاناپيا تاسپاي جانە باسقالارى جىرشى تۋرالى ەستەلىكتەرىن ورتاعا سالدى.
وسى كەشتە تىلەس جازىقباي كوشەرعالي ماكاروۆتىڭ ءوزى كوپ جىل قىزمەت ەتكەن سارىتوعاي مادەنيەت ۇيىنە جىراۋدىڭ ەسىمىن بەرۋدى ۇسىنىپ, ونى بارلىعى ءبىراۋىزدان قولدادى.
كەشتىڭ ءماندى دە ماعىنالى وتۋىنە بەلگىلى اقىن ساعىنتاي بيسەنعاليەۆ, اۋداندىق مادەني-دەمالىس ورتالىعىنىڭ ديرەكتورى ەرلان حابيبۋللين ەرەكشە ۇلەس قوستى. كەش سوڭىندا جىراۋدىڭ جارى جۇمازيا, ۇلى التىنبەك جينالعان جۇرتقا ىستىق ءىلتيپاتى ءۇشىن العىس ايتتى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
