قازىرگى جاستار كىتاپ وقىمايدى دەگەن پىكىر ءجيى ايتىلادى. مۇعالىمدەر كەرىسىنشە ايتقانىمەن استارىندا شىندىق جوق ەمەس. بىردە استانادا تەلەديداردان ۇزدىك وقىعان ءبىر توپ وقۋشىنى كورسەتتى. الدەبىر سىناقتا ۇزدىك شىعىپ, ىرىكتەلگەن وقۋشىلار. اسەرلى اڭگىمەگە ەلتىپ وتىرعان جۇرگىزۋشى ءسوز اراسىندا «اباي جولىن» كىم جازدى؟» دەپ قالعان. الگىندە عانا بۇلبۇلداي سايراپ وتىرعان ۇزدىك وقۋشىلار اڭتارىلدى دا قالدى.
ءبىراز قالامگەرلەردىڭ اتى-ءجونى كەتتى. مۇحتار اۋەزوۆ دەپ تابانداپ تۇرىپ العان ءبىرى جوق. انا جاعدايعا سىرتتان قاراۋدىڭ ءوزى ايانىشتى.
«اۋ, ءبىزدىڭ كەزدە.., ءبىزدىڭ بالالىق شاقتا...» دەپ ماقتانىپ, كوسىلە جونەلەيىن دەسەڭ, سوناۋ بالا كەزىڭدەگى كىتاپتىڭ ءدامىن الىپ تامسانىپ وقىپ جۇرگەن شاعىڭمەن جاستاس قىزىلوردالىق ون ءبىر جاسار قىز بۇگىنگە دەيىن ەلۋ ەرتەك جازىپ تاستاپتى. التىناي بەرىكتىڭ العاشقى كىتابىن قازاق رۋحانيياتىنىڭ ۇلكەن جاناشىرى قىرىمبەك كوشەرباەۆ باسپادان شىعارىپ بەردى. قىزىلوردالىق جاس ورەننىڭ شىعارماشىلىق تابىسى ەلباسىنا دەيىن جەتىپ, اقتىلەۋ ايتىپ «ەۋرازيا جۇرەگىندە» اتتى كىتابىن سىيلاعان ەكەن.
التىنايدىڭ العاشقى كىتابىنا ونىڭ 32 ەرتەگىسى, 13 ولەڭى مەن 10 شاقتى اڭگىمەسى ەنگەن. ەندى ول ەكىنشى كىتابىن شىعارۋعا دايىندىعىن جاساپ جاتىر.
– بۇگىندە بالالار كىتاپ وقىمايدى, عالامتورعا كىرگەندى ۇناتادى دەگەن پىكىردى مەن دە ەستيمىن, – دەيدى جاس جازۋشى. – ونداي ادەتتى دوستارىمنان دا بايقايمىن. كىتاپ وقۋ – ۇلكەن مادەنيەتتىلىك. بۇل ادامداردى ادەمىلىكتى سەزىنۋگە, جاقسى ادام بولۋعا تاربيەلەيدى. جاقسى كىتاپتى الەۋمەتتىك جەلى ەشقاشان اۋىستىرا المايدى. سوندىقتان دوستارىمدى كىتاپ وقۋعا شاقىرامىن.
ون ءبىر جاسىندا ەكىنشى كىتابىن جارىققا شىعارۋعا دايىنداپ جاتقان وقۋشى ءوز قاتارلاستارىنىڭ تۇبىندە كىتاپقا ورالاتىنىنا سەنەدى.
باقتيار تايجان,
«ەگەمەن قازاقستان»
قىزىلوردا وبلىسى
