اقتوبەلىك بالاقايلار وبلىسپەن تانىسۋدى تەمىرتاۋ قالاسىنان باستادى. قوناقتار تاريحي-ولكەتانۋ مۇراجايىندا, نۇرسۇلتان نازارباەۆ وقىعان قاراعاندى مەملەكەتتىك يندۋستريالدى ۋنيۆەرسيتەتتە, «ۆوستوك» ساياباعىنىڭ قىسقى باعىندا بولدى. سونىمەن قاتار بالالار ءۇشىن سامارقان سۋ قويماسىندا سەرۋەن مەن «جانار» مەيرامحاناسىندا تۇسكى اس ۇيىمداستىرىلدى.
بۇدان كەيىن بالعىن ساياحاتشىلار دولينكا كەنتىندەگى ساياسي قۋعىن-سۇرگىن قۇرباندارىن ەسكە الۋ مۇراجايىن ارالاپ كوردى. مۇندا بالالار ءتۇرلى جادىگەرلەرمەن تانىسىپ, كارلاگ وقيعالارى تۋرالى اڭگىمەلەردى تىڭدادى.
– بۇل كۇن كوپتەگەن قىزىقتارعا تولى بولدى. ماعان بارلىعى ۇنادى, اسىرەسە ساياسي قۋعىن-سۇرگىن قۇرباندارىن ەسكە الۋ مۇراجايى مۇڭدى سەزىمگە بولەدى, – دەدى ءوزىنىڭ العان اسەرىمەن بولىسكەن اقتوبەلىك وقۋشى اقەركە تولىباەۆا.
ال اقنۇر نۇرلىبەكوۆا ەسىمدى قوناققا سامارقان سۋ قويماسىندا وتكەن سۋداعى سەرۋەن ۇناعان ەكەن.
– تەمىرتاۋداعى تاريحي-ولكەتانۋ مۇراجايىندا مەن كوپتەگەن مالىمەتتەردى ءبىلدىم. وندا ءبىز قازاق حالقىنىڭ تاريحى تۋرالى سىر شەرتەتىن تاريحي جادىگەرلەردى تاماشالادىق. سونىمەن قاتار ماعان تەمىرتاۋداعى سامارقان سۋ قويماسى قاتتى ۇنادى, ول جەر وتە اسەم ەكەن, – دەدى اقنۇر نۇرلىبەكوۆا.
سەنبى كۇنى اقتوبە وبلىسىنان كەلگەن دەلەگاتسيا قارقارالى اۋدانىنا باردى. وندا قوناقتاردى فلەشموبپەن جانە كونتسەرتتىك باعدارلامامەن قارسى الدى.
– قارقارالىعا قوش كەلدىڭىزدەر! قارقارالى – ول اسەم تابيعات, وقيعا-اڭىزدارعا تولى تاريح, وسى جەردەن كوپتەگەن باتىرلار مەن شەشەندەر, اقىندار مەن جازۋشىلار شىققان. بۇگىن سىزدەر ابايدىڭ اكەسى قۇنانبايدىڭ تۇرعىزعان مەشىتىندە بولىپ, تاۋ باسىنا شىعاسىزدار. بۇل كۇن قىزىققا جانە وقيعالارعا تولى بولادى, – دەپ قارسى الدى قوناقتاردى قارقارالى اۋدانى اكىمىنىڭ ورىنباسارى سايلاۋ ءالي ۇلى.
قارقارالىدا بالالار قۇنانباي قاجىنىڭ مەشىتىندە, ولكەتانۋ مۇراجايىندا بولىپ, ءمادي ءباپي ۇلىنىڭ ەسكەرتكىشىن كوردى. تاۋعا شىعىپ, ء«ۇش ۇڭگىر» تۋريستىك الاڭىنا بارىپ, قارقارالى مەملەكەتتىك ۇلتتىق تابيعي پاركىن ارالاپ قايتتى.
– ماعان ءبارى دە وتە قاتتى ۇنادى, اسىرەسە تاۋعا شىعىپ, ۇلتتىق ساياباقپەن تانىسقانىمىزعا قۋانىشتىمىز. ءبىز وندا بۇعىلاردى, قويانداردى جانە تاسباقالاردى كوردىك. وكىنىشكە قاراي بيزونداردى كورە المادىق, بىراق مەن ولار تۋرالى ينتەرنەتتەن وقىعان بولاتىنمىن. ەركىم بولسا, وسى جەردە مەكەندەپ قالار ەدىم, – دەپ رياسىز ك ۇلىمدەدى قوناق بالا ايعانىم جانبولاتوۆا.
– قارقارالىنىڭ تابيعاتى وتە اسەم ەكەن – اعاشتارى دا, تاۋلارى دا. وسىندا تاعى كەلىپ, بارلىعىن تاعى ءبىر مارتە ارالاپ شىققىم كەلەدى, – دەدى قۇربىسىنىڭ ءسوزىن قۇپتاعان اقەركە تولىباەۆا.
– ءبىزدى بارلىق جەردە تاماشا قارسى الدى. باعدارلاما وتە قىزىقتى بولدى, ءبىز تەمىرتاۋدا, كارلاگ مۇراجايىندا, ءتىپتى تاۋ ىشىندە دە بولىپ قايتتىق. قارقارالىدا العاشقى ادامداردىڭ ۇڭگىرىندە بولدىق, ول كەرەمەت ەكەن. قاراعاندى وبلىسى – وتە قىزىقتى جانە اسەم ءوڭىر. مەندە تەك جاعىمدى اسەرلەر عانا قالدى, – دەدى اقتوبەلىك ۇلان نۇربەك مىسيەۆ.
– ءۇش كۇن لەزدە وتە شىقتى. مەن قاراعاندى وبلىسى تۋرالى كوپتەگەن ماعلۇماتپەن تانىستىم. اسىرەسە قۇنانباي قاجىنىڭ مەشىتى ەسىمدە قالدى. اقتوبەگە ورالعان سوڭ, اتا-انام مەن دوستارىما بارلىعىن ايتىپ بەرەمىن, – دەيدى اقمارجان امانبەك.
سونداي-اق ول دەلەگاتسيا قۇرامىنداعى بارلىق بالالاردىڭ اتىنان قاراعاندى وبلىسىنداعى اكتسيا ۇيىمداستىرۋشىلارىنا جىلى لەبىزدەرى مەن قۇشاق جايا قارسى العاندارى جانە قىزىقتى باعدارلاما ازىرلەگەندەرى ءۇشىن شىن جۇرەكتەن العىس ايتتى.
– قاراعاندى وبلىسىنىڭ اكىمدىگىنە, وڭىردەگى ءبىز بولعان قالالار مەن اۋدانداردىڭ ءبىلىم باسقارماسى مەن ءبىلىم بولىمدەرىنىڭ باسشىلىعى مەن قىزمەتكەرلەرىنە العىسىمىزدى بىلدىرگىمىز كەلەدى, – دەدى اقتوبە وبلىسىنىڭ دەلەگاتسياسى جەتەكشىلەرىنىڭ ءبىرى باعداگۇل تىلەگەنوۆا. – بارلىقتارىڭىزعا ەكسكۋرسيالار, قىزىقتى باعدارلامالار ۇيىمداستىرىپ, ەرەكشە-كوڭىل كۇي سىيلاعاندارىڭىز ءۇشىن راحمەت!
ەكسكۋرسيا كەزىندە اقتوبە وبلىسىنان كەلگەن دەلەگاتسيانىڭ قاۋىپسىزدىگىنە ەرەكشە ءمان بەرىلدى. ءۇش كۇن بويى ولار مىنگەن كولىكتى وبلىستىق ءىىد جەرگىلىكتى پوليتسيا قىزمەتكەرلەرى قاناتىنىڭ استىنا الدى.
ەندى ەكى اپتادان كەيىن رەسپۋبليكالىق ولكەتانۋ اكتسياسى اياسىندا قاراعاندى وبلىسىنان 40 بالا اقتوبە وبلىسىنا بارىپ قايتادى.
قايرات ءابىلدا,
«ەگەمەن قازاقستان»
قاراعاندى وبلىسى
