قۇرىلىسشىلار كۇنى مەرەكەسىنە وراي سامال ىقشام اۋدانىندا سالىنىپ جاتقان ءورت ءسوندىرۋ دەپوسىنىڭ قۇرىلىسىندا قۇرىلىس ماماندارى اراسىندا بايقاۋ ءوتتى. بايقاۋدىڭ باستى ماقساتى – وڭىرىمىزدەگى قۇرىلىس ماماندارىنىڭ كاسىبي دەڭگەيىن جوعارىلاتۋ مەن جاستاردى قۇرىلىسشى ماماندىعىنا تارتۋ بولىپ تابىلادى. وبلىستىق قۇرىلىس باسقارماسىنىڭ ۇيىمداستىرۋىمەن وتكەن سايىستا تەمىرلان ساپار «ۇزدىك سىلاقشى», بولاتباي ەسقايىروۆ «ۇزدىك قالاۋشى» جانە باقىتجان سابىروۆ «ۇزدىك دانەكەرلەۋشى» اتاندى.
- مامىر ايىندا قىزىلوردا قالاسىندا قۇرىلىسشىلار اراسىندا وتكەن جارىستا, اتىراۋ وبلىسىنىڭ تاس قالاۋشىلارى ءبىرىنشى ورىندى يەلەنگەن بولاتىنبىز. سول باستامانىڭ جالعاسى رەتىندە بۇگىندە وڭىرىمىزدە وتكىزىپ جاتىرمىز. بايقاۋدان جەڭىمپاز بولعان قاتىسۋشىلارىمىزعا جۇلدەلى ورىندارىمىز بار. سونىمەن قاتار, الداعى كۇندەرى قۇرىلىس ماماندارى اراسىندا سپورتتىق سايىستار وتكىزىلەتىن بولادى, - دەيدى اتىراۋ وبلىستىق قۇرىلىس باسقارماسىنىڭ قۇرىلىس ءبولىمىنىڭ باسشىسى ساقپاروۆ نۇرلىبەك.
ايتا كەتەيىك, ءبىزدىڭ ەلىمىزدە قۇرىلىسشىلار كۇنى جىل سايىن تامىز ايىنىڭ ەكىنشى جەكسەنبىسىندە اتالىپ وتەدى.
