«وتكەن جىلى 100 مىڭنان استام وقۋشى جازعى دەمالىستا لاگەرمەن قامتىلدى. يتاليادا 40 بالا, كوكشەتاۋ مەن قاپشاعايدا, الماتىدا 48 649 بالا دەمالدى. بيىل دا وبلىس اكىمدىگىنىڭ قولداۋىمەن وسى جۇمىستار جالعاسىن تاپتى», دەيدى وبلىستىق ءبىلىم بەرۋ باسقارماسىنىڭ ءبولىم باسشىسى الماگۇل قايىرليەۆا. وسى ماقساتقا جەرگىلىكتى بيۋدجەتتەن 597 ملن تەڭگە بولىنگەن, ونىڭ جارتىسىنان استامى «اراي» لاگەرىن كۇردەلى جوندەۋگە جۇمسالدى. ەندى «تۇلپار» لاگەرىنە جوندەۋ جۇمىستارى باستالادى.
قالا سىرتىنداعى دەمالىس ورىندارىنان بولەك وبلىستاعى 149 ءبىلىم بەرۋ ۇيىمىندا مەكتەپ لاگەرلەرى اشىلدى. «تەڭىزشەۆرويل» كومپانياسىنىڭ دەمەۋشىلىگىمەن جوعارى سىنىپتا وقيتىن دارىندى بالالارعا ارنالعان ءنوۆوسىبىر جازعى فيزيكا-ماتەماتيكا مەكتەبىنىڭ جۇمىسى ۇيىمداستىرىلىپ وتىر.
لاگەرگە بارماعان بالالار ءۇشىن دە دەمالىستى كوڭىلدى وتكىزۋگە مۇمكىندىك بار. مىسالى, «نۇر بەلەس» قوعامدىق بىرلەستىگى «جەتى قازىنا» اۋلا كلۋبىن قولعا الدى. «جەتى قازىنا», «بەيبارىس», «حيۋاز», «دوستىق» اۋلا كلۋبتارى وبلىس ورتالىعىنداعى ءتورت شاعىن اۋداندا جۇمىس ىستەيدى.
وبلىستىق جاستار ساياساتى ماسەلەلەرى باسقارماسىنىڭ باسشىسى روللان قۇسپاننىڭ ايتۋىنشا, اۋلا كلۋبتارى – بالالار مەن جاسوسپىرىمدەردىڭ باس قوساتىن, شىعارماشىلىق يدەيالارىن جۇزەگە اسىراتىن جانە بوس ۋاقىتتارىن ءتيىمدى وتكىزەتىن ورىن, كلۋبتار اشىلعالى بەرى قىزىعۋشىلىق تانىتىپ, ۇيىرمەلەرگە جازىلىپ جاتقان بالالاردىڭ دا قاتارى كوپ. دۇيسەنبى-سەنبى ارالىعىندا تاڭەرتەڭگى ساعات 9.00-دەن كەشكى 20.00-گە دەيىن جۇمىس ىستەيتىن اۋلا كلۋبتارىندا 7-29 جاس ارالىعىنداعى بالالار مەن جاستار اعىلشىن ءتىلى, دومبىرا, ولكەتانۋ, جاس ەكولوگ, قولونەر, ۇستەل تەننيسى, شاحمات, دويبى, دراما ۇيىرمەلەرىنە تەگىن قاتىسا الادى.
باقىتگۇل باباش,
«ەگەمەن قازاقستان»
