ق.ءابدىراحمانوۆتىڭ ايتۋىنشا, پالەستينا ءمينيسترىنىڭ ساپارى ەكى ەل اراسىندا حالىقارالىق جانە ايماقتىق وزەكتى ماسەلەلەر بويىنشا پىكىر الماسۋعا, ەكىجاقتى ىنتىماقتاستىقتىڭ قازىرگى جاعدايى مەن بولاشاعىن ايقىنداۋعا مۇمكىندىك بەرىپ وتىر.
وعان قوسا 26 جىلدىق تاريحى بار قارىم-قاتىناستار اياسىندا قازاقستان مەن پالەستينا ساياسي, ساۋدا-ەكونوميكالىق, مادەني-گۋمانيتارلىق جانە باسقا دا سالالارداعى بايلانىستاردى ودان ءارى نىعايتۋعا مۇددەلىلىك بىلدىرۋدە. ونىڭ ىشىندە قوس تاراپ اۋىل شارۋاشىلىعى, مەديتسينا, ءبىلىم سالالارى بويىنشا قارىم-قاتىناستاردى جانداندىرا تۇسپەك.
– قازاقستان پالەستينامەن ەكىجاقتى ىنتىماقتاستىقتى دامىتۋعا اسا ۇلكەن ءمان بەرەدى. اتالعان ىنتىماقتاستىقتىڭ نەگىزىن قازاقستان ءوز تاۋەلسىزدىگىن جاريالاعان كەزدە 1991 جىلى پالەستينانى ازات ەتۋ ۇيىمىنىڭ, پالەستينا ۇلتتىق اكىمشىلىگىنىڭ كوشباسشىسى, مارقۇم يا.ارافاتتىڭ قازاقستانعا, سونداي-اق ەلباسىمىز ن.نازارباەۆتىڭ 1995 جىلى پالەستيناعا وتكەن ساپارلارى قالادى. بيىل ەكى ەل اراسىندا ديپلوماتيالىق قارىم-قاتىناستاردىڭ ورناعانىنا جيىرما التى جىل تولدى. وسى ۋاقىت ىشىندە ەلدەرىمىز اراسىنداعى ەكىجاقتى قارىم-قاتىناستارمەن بىرگە, بۇۇ, يىۇ جانە باسقا دا حالىقارالىق ۇيىمدار شەڭبەرىندە كوپجاقتى ىنتىماقتاستىعىمىز دامي ءتۇستى, – دەدى قازاقستاننىڭ سىرتقى ىستەر ءمينيسترى.
ونىڭ ۇستىنە پالەستينا مەملەكەتى حالىقارالىق ۇيىمدار شەڭبەرىندە ەلىمىزدىڭ نەگىزگى حالىقارالىق باستامالارىنا تۇراقتى تۇردە قولداۋ كورسەتىپ كەلەدى.
قايرات ءابدىراحمانوۆ ەلىمىز پالەستينا پروبلەماسىنىڭ رەتتەلۋى تاياۋ شىعىس وڭىرىندە ۇزاق مەرزىمدى بەيبىتشىلىك پەن تۇراقتىلىقتى ورناتۋدىڭ نەگىزگى شارتى بولىپ تابىلاتىنىنا سەنىم ارتا وتىرىپ, پالەستينانى تاۋەلسىز مەملەكەت رەتىندە مويىنداپ, حالىقارالىق قاۋىمداستىقتىڭ تولىققاندى مۇشەسى بولۋىن دايەكتى جاقتايتىندىعىن دا اتاپ ءوتتى.
– قازاقستاننىڭ اتالعان ماسەلەگە وراي ۇستانىمى وزگەرىسسىز قالادى. پالەستيندىك-يزرايلدىك جانجالدىڭ شەشىمى 1967 جىلعى شەكارالاردا استاناسى شىعىس يەرۋساليم بولىپ تابىلاتىن پالەستينا مەملەكەتىنىڭ قۇرىلۋىن كوزدەيتىن «ەكى حالىققا – ەكى مەملەكەت» قاعيداسى بويىنشا ىسكە اسۋى ءتيىس. ءتۇرلى قيىندىقتارعا قاراماستان, كەلىسسوزدەر پروتسەسى ءارى قاراي جالعاسۋى كەرەك, – دەدى ءوز سوزىندە قايرات ءابدىراحمانوۆ.
ال پالەستينا مەملەكەتىنىڭ سىرتقى ىستەر جانە ەكسپاتريانتتار ءمينيسترى رياد ءال-مالكي قازاقستان تاراپىنىڭ ىستىق ىقىلاسپەن قارسى الىپ, كەلىسسوزدەر جۇرگىزۋگە مۇمكىندىك بەرگەندىگى, قيىن-قىستاۋ جىلدارى ايماقتىق جانە حالىقارالىق قوعامداستىق الدىندا ۇزدىكسىز قولداۋ ءبىلدىرىپ وتىرعاندىعى ءۇشىن العىسىن جەتكىزدى.
– ءبىزدىڭ بايلانىستارىمىز تەك ساياسي قارىم-قاتىناستارمەن شەكتەلمەيدى. اتاپ ايتقاندا, تۋريزم, اۋىل شارۋاشىلىعى, دەنساۋلىق ساقتاۋ, مادەنيەت سالالارىنداعى ىنتىماقتى ورىستەتۋگە مۇددەلىمىز. ونىڭ ۇستىنە استانا بۇگىندە ايماقتىق, حالىقارالىق ماڭىزدى حابقا اينالدى, – دەدى رياد ءال-مالكي.
كەزدەسۋ بارىسىندا ەلىمىزدىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە تاياۋ شىعىستا بەيبىتشىلىكتى ورناتۋدىڭ اجىراماس شارتى بولىپ تابىلاتىن وڭىردەگى تۇراقتىلىقتى قالپىنا كەلتىرۋ پروتسەسىنە تولىق قولداۋ كورسەتۋدى جالعاستىراتىنى ايتىلدى.
سونداي-اق رياد ءال-مالكيدىڭ رەسمي ساپارى اياسىندا سىرتقى ىستەر مينيسترلىگى مەن پالەستينا مەملەكەتىنىڭ سىرتقى ىستەر جانە ەكسپاتريانتتار مينيسترلىگى اراسىنداعى «ساياسي كونسۋلتاتسيالار جونىندەگى ءوزارا تۇسىنىستىك تۋرالى» جانە پالەستينانىڭ ساۋدا, ونەركاسىپ جانە اۋىل شارۋاشىلىعى پالاتالارىنىڭ فەدەراتسياسى جانە «قازاقستاننىڭ سىرتقى ساۋدا پالاتاسى» جشس اراسىنداعى ىنتىماقتاستىق تۋرالى مەموراندۋمدارعا قول قويىلدى.
سەرىك ابدىبەك,
«ەگەمەن قازاقستان»
