ءتۋريزمنىڭ ترەندتەرى
شىمبۇلاقتاعى بيىلعى فورۋم «الماتىدا تاۋ ءتۋريزمىن جانە بۇقارالىق سپورتتى دامىتۋ تەتىكتەرى: بۇگىن جانە ەرتەڭ» تاقىرىبىن تاڭدادى. القالى جيىن تاۋ ءتۋريزمىنىڭ اۋزى دۋالى, قولىنان ءىس كەلەتىن شەتەلدىك ماماندارىن توعىستىرىپ وتىرعاندىقتان, الدىمەن الماتى قالاسى اكىمىنىڭ ورىنباسارى اسەل ءجۇنىسوۆا ءسوز الىپ, ءتۋريزمنىڭ دامۋىن بەينەلەيتىن بىرقاتار كورسەتكىشتەردى العا تارتتى.
– الماتى قالاسى رەسپۋبليكا بويىنشا بارلىق كەلۋشىلەردىڭ بەستەن ءبىرىن قۇرايدى, سونىڭ ىشىندە قازاقستانعا ات باسىن بۇراتىن شەتەلدىك تۋريستەردىڭ 40 پروتسەنتى الماتىعا سوقپاي كەتپەيدى. سوڭعى ءۇش جىلدا قالاعا كەلگەن تۋريستەر سانى جىلىنا 14 پروتسەنتكە ءوستى. وتكەن جىلى ۋنيۆەرسيادا ارقاسىندا 20 پروتسەنتكە ارتتى. 2018 جىلدىڭ قاڭتار-مامىر ايلارىندا اۋەجاي ارقىلى 232 مىڭ شەتەلدىك تۋريست كەلدى. بۇل وتكەن جىلدىڭ وسى كەزەڭىمەن سالىستىرعاندا 20 پروتسەنتكە ارتىق. قازاقستاندىق جانە شەتەلدىك تۋريستەر اراسىندا جۇرگىزىلگەن ساۋالناما ناتيجەلەرى بويىنشا, شەتەلدىك تۋريستەردىڭ 60 پروتسەنتى الماتىنى ەكوتۋريزم ءۇشىن تاڭدايدى. ال قازاقستاندىق تۋريستەردىڭ 55 پروتسەنتى ءتۇرلى بەلسەندى ءىس-شارالار مەن ويىن-ساۋىق ءۇشىن ات باسىن تىرەيدى. تابيعات پەن مەگاپوليستىڭ زاماناۋي ويىن-ساۋىقپەن ۇيلەسۋى – قالامىزدىڭ اۋىز تولتىرىپ ايتارلىق ەرەكشەلىكتەرىنىڭ ءبىرى, – دەدى اسەل ءجۇنىسوۆا.
قالا اكىمىنىڭ ورىنباسارى الماتىعا TripAdviser الەمدىك پلاتفورماسىندا قىزىعۋشىلىق ارتىپ كەلە جاتقانىن اتاپ, سوڭعى ەكى جىل ىشىندە الماتى ميكروسايتىنىڭ كورىلىمى 140 ەسە ارتقانىن مىسالعا كەلتىردى. پاراقشاعا نەگىزىنەن رەسەي, اقش, ۇلىبريتانيا, ءۇندىستان مەن گەرمانيا ازاماتتارى كىرەدى. اسىرەسە ەكوتۋريزمگە دەگەن قىزىعۋشىلىق بايقالادى. الماتى قالاسىنىڭ اكىمدىگى ىلە-الاتاۋ ۇلتتىق پاركى جانە الماتى وبلىسىنداعى ارىپتەستەرى سانالاتىن «قازاقتۋريزم» كومپانياسىمەن بىرگە تاۋ ءتۋريزمىن دامىتۋدىڭ باس جوسپارىن ىسكە اسىرۋ جۇمىستارىن قولعا الا باستاعان. اتالمىش جوبا جاڭا تاۋ شاڭعىسى كۋرورتتارىنىڭ پايدا بولۋىن, ۇزىندىعى 500 شاقىرىمنان استام جاياۋ ءجۇرۋ (حايكينگ) مەن باقىلاۋعا (ترەكينگ) ارنالعان تاۋ مارشرۋتتارىن ۇيىمداستىرۋدى قاراستىرادى.
سول سياقتى ەۋروپا مەن ازيادان كەلەتىن تۋريستەردىڭ 60 پروتسەنتتەن استامى قازاقستاندى تۇمسا تابيعاتى بۇزىلماعان ەل رەتىندە تاڭدايدى. بىراق وسىعان قاراماستان, الماتى تۋريزمنەن ايتارلىقتاي تابىس تاۋىپ وتىرماعانى ايان. سوندىقتان دا قالادا يان گەيلدىڭ «ادامدارعا ارنالعان قالا» جوباسى بويىنشا ء«تۋريزمدى دامىتۋ جونىندەگى 100 قادام» سىندى ارنايى جوسپار جاسالىپ وتىر. بۇل جوبا قالانىڭ تاريحي ورتالىعىن جاڭعىرتىپ, شاھاردىڭ تۋريستىك تارتىمدىلىعىن تۇبەگەيلى وزگەرتۋى ءتيىس.
قالاي دەسەك تە, الماتى قالاسى مەن ونىمەن ىرگەلەس وبلىستا ءتۋريزمدى دامىتۋدىڭ بارلىق العىشارتى بار. ەڭ باستىسى, ۆيزاسىز جانە شىمبۇلاققا اۋەجايدىڭ وزىنەن ءبىر ساعاتتىڭ اينالاسىندا جەتۋگە بولادى.
وسىنداي رەسمي ستاتيستيكالىق دەرەكتەردى بيزنەس وكىلدەرى دە راستادى. «ەير استانا» اۋەكومپانياسىنىڭ ماركەتينگ جانە ساتۋ جونىندەگى ۆيتسە-پرەزيدەنتى ريچارد لەدجەردىڭ ايتۋىنشا, 2017 جىلدىڭ جازىندا تۋريستەر سانى وتكەن جىلمەن سالىستىرعاندا 17 پروتسەنتكە ارتقان. الايدا شەتەلدىك قوناقتار قازاقستانعا ىسساپارعا نەمەسە تۋىستارىمەن كورىسۋ ماقساتىندا سيرەك كەلەدى. ماسەلەن, 2016 جىلى ەلىمىزگە كەلگەن 6,5 ميلليون شەتەلدىك ءتۋريستىڭ تەك 50 مىڭعا جۋىعى عانا ەڭبەك دەمالىسىن وسىندا وتكىزۋ ءۇشىن كەلگەن. ساراپشىنىڭ ايتۋىنشا, قازاقستاندىق ءتۋريزمنىڭ نەگىزگى ماسەلەسى – حالىقارالىق نارىقتاعى ءونىمنىڭ جەتكىلىكسىز ديستريبۋتسياسى.
«مىسالى, اۋسترالياداعى ينتەرنەت قولدانۋشى تۋريستىك پورتالعا كىرگەندە, ەلدىڭ كورىكتى جەرلەرى تۋرالى اقپاراتتى عانا الىپ قويمايدى, سونىمەن قاتار ىشكى نارىققا الەۋەتتى تۋريستەر ءۇشىن قىزمەت ەتەتىن تۋروپەراتورلاردىڭ ءتىزىمىن قاراۋعا دا مۇمكىندىك الادى. Kazakhstan.org سايتىندا كورنەكتى ورىندار تۋرالى اقپاراتتى جانە ەلەكتروندى پوشتانى جىبەرۋدى سۇرايتىن فورمانى كورەدى. ال شەتەلدىكتەر حات جازبايدى, ولارعا جەرگىلىكتى نارىقتاعى سەرىكتەستەر قاجەت. قازاقستان تۋرالى ەشتەڭە بىلمەيتىن تۋريست ول جەردە ءوزىن نە كۇتىپ تۇرعانىن بىلمەي, بوتەن ەلدە ەكى اپتاسىن وتكىزگىسى كەلمەيدى», دەدى ريچارد لەدجەر.
سونداي-اق «ەير استانا» اۋەكومپانياسى ترانزيتتىك جولاۋشىلارعا ستوپوۆەر باعدارلاماسىن ۇسىنعان. ياعني بۇل ارقىلى تۋريست قوناقۇيدە بىرنەشە ءتۇن تۇراقتاي الادى, سونداي-اق جەرگىلىكتى كورىكتى ورىندارعا بارۋعا مۇمكىندىگى بار. اتالمىش باعدارلاما – برەندتى حالىقارالىق ءادىس, جەرگىلىكتى مازمۇنعا نەگىزدەلگەن جانە حالىقارالىق نارىقتا ەلدىڭ بەدەلىن ارتتىرادى. باعدارلاما الماتى مەن استانادا جۇمىس ىستەيدى. ۇلتتىق تاسىمالداۋشى بۇل جۇيەنى الەم بويىنشا 40 مىڭ تۋريستىك اگەنتكە تاراتقان جانە ستوپوۆەرگە كومپانيا سايتى ارقىلى قاتىسۋعا بولادى. ناتيجەسىندە بيىلعى ءبىرىنشى جارتىجىلدىقتا 9 مىڭ تۇنەۋ تىركەلىپ, بۇل ءونىمدى 50 مىڭ تۋريست پايدالانعان.
شىمبۇلاققا باسەكەلەستىك جەتپەيدى
2010 جىلى, ياعني شىمبۇلاقتاعى ارقان جولدارىن قايتا قالپىنا كەلتىرۋ جۇمىستارىنا دەيىن, دەمالىس كۇندەرى كۋرورتقا 1 مىڭ ادام ات باسىن تىرەسە, قازىر شىمبۇلاققا سەنبى, جەكسەنبى كۇندەرى 15 مىڭ ادام قىدىرىپ كەلەدى. جىل سايىن كەلۋشىلەر سانى ارتۋدا, بيىلعى كورسەتكىش 600 مىڭ ادامعا جەتتى.
– شىمبۇلاققا باسەكەلەستىك جەتىسپەيدى, بىراق ءبىز ونىڭ رەلەف پەن جولداردىڭ اۋقىمى بويىنشا شەكتەلەتىنىن تۇسىنەمىز. ەڭ كوپ قوناق كەلەتىن كۇندەرى كۋرورت تۇنشىعىپ تۇرعانداي اسەر قالدىرادى. مۇنىڭ سالدارى قىزمەت كورسەتۋ ساپاسىنان دا كورىنەدى. ەگەر الماتى وبلىسىندا كاسىپقوي سپورتشىلار ءۇشىن عانا ەمەس, اۋەسقويلارعا, بالالار مەن قارت ادامدارعا دا بىرنەشە جەڭىل ءارى قولجەتىمدى جولدارى بار كۋرورتتار بار بولسا, ول شەتەلدىك تۋريستەردى تارتۋعا سەپتىگىن تيگىزەدى, ەسەسىنە بارلىعى ۇتاتىن ەدى, – دەپ ەسەپتەيدى شىمبۇلاق تاۋ شاڭعىسى كۋرورتىنىڭ باس ديرەكتورى ەرجان ەركىنباەۆ.
ەركىنباەۆ دايىندىقتان وتكەن ادامدارعا عانا ەمەس, مۇگەدەك جاندارعا, كىشكەنتاي بالالارى بار اتا-انالارعا ارنالعان جاياۋ جۇرگىنشىلەرگە ارنالعان جولدارعا قولجەتىمدىلىك ماسەلەسىنە دە توقتالدى.
«شىمبۇلاققا كەلەتىندەر سانى ءبىز ارەكەت ەتپەسەك تە كوبەيە تۇسەتىن بولادى», دەيدى ەركىنباەۆ. ونىڭ ايتۋىنشا, مۇندا كەلەتىندەر سانى كەلەر جىلى وزدىگىنەن 20 مىڭعا جۋىقتايدى جانە شىمبۇلاقتاعى بارلىق نىساندى بىرتە-بىرتە دامىتۋعا بولادى.
ساقتاندىرۋ پوليستەرىن ونلاين جانە تاۋ شاڭعىسى كۋرورتتارىنىڭ كاسسالارىندا ساتۋ تاجىريبەسىن ەنگىزۋ قاجەت. قازاقستاندىق KITA كىرمە جانە ىشكى تۋريزم قاۋىمداستىعىنىڭ ۆيتسە-پرەزيدەنتى, ACT Adventure ەكسترەمالدى تۋريزم جوباسىنىڭ جەتەكشىسى اناتولي ساۆيچەۆ الماتى وبلىسىنىڭ تاۋلى اۋداندارى جولدارىمەن عانا ەمەس, سونىمەن قاتار ات توپتارىنا ارنالعان مارشرۋتتاردى, پاراپلانمەن ۇشۋ ورىندارىن جانە ۆەلوسيپەد پەن كۆادروتسيكل ايداۋدى ۇناتاتىن اۋەسقويلار ءۇشىن تاپتىرماس مۇمكىندىكتەر ۇسىناتىنىن اتاپ ءوتتى.
شىمبۇلاق پەن كىشى الماتى شاتقالدارىنىڭ تۋريستەرىنە ءبىر كۇندىك ساپار ءۇشىن شامامەن اينالما ساياحاتتىڭ 15 نۇسقاسى جانە الپينيستىك تاۋعا كوتەرىلۋدىڭ ءتۇرلى مارشرۋتتارى بار. مۇنداي رەسۋرستار بارلىق تاۋ جۇيەلەرىندە قولجەتىمدى ەمەس. «جەرگىلىكتى ءونىمنىڭ ارتىقشىلىعى – كوپتەگەن تاۋ مارشرۋتتارى, جابايى جانە جۇرىلمەگەن جولدار, ونىڭ وزىندىك ەرەكشە تۇسى – ماۋسىمارالىق كەزەڭنىڭ بولماۋى. قاۋىپسىزدىك – شەتەلدىك تۋريستەردىڭ ءبىزدىڭ تاۋلار مەن كۋرورتتارعا تولىق سەنۋى ءۇشىن ماڭىزدى ءارى قاجەتتى شارتتاردىڭ ءبىرى. وزگە ەلدىڭ تاۋ كۋرورتىندا تۋريست اياعىن سىندىرىپ السا, ونى دەرەۋ تىكۇشاقپەن اۋرۋحاناعا جەتكىزەدى. فرانتسيادا تۋريست سكي-پاسس العان ۋاقىتتا, وعان قوسا ءپوليستى دە الۋ ۇسىنىلادى. ساقتاندىرۋ پوليستەرىنىڭ ونلاين جانە تاۋ شاڭعىسى كۋرورتتارىنىڭ كاسسالارىندا ساتۋ تاجىريبەسىن ەنگىزۋ ءبىزدىڭ جاعدايىمىزدا ابدەن مۇمكىن. دەگەنمەن, ازىرگە تۋريستەرگە ارنالعان كوڭىلگە قونىمدى ساقتاندىرۋ جۇيەسى جوقتىڭ قاسى», دەدى اناتولي ساۆيچەۆ.
جەرگىلىكتى تۋريستەردىڭ قاۋىپسىزدىگى بويىنشا سەمينارلار مەن پراكتيكالىق ترەنينگتەردى تۇراقتى ۇيىمداستىرۋ وتە ماڭىزدى. سەبەبى ولاردىڭ تاجىريبەسى مەن داعدىلارى ارتا تۇسەدى, سايكەسىنشە شەتەلدىك قوناقتار تاۋلارىمىزدا ءوزىن-ءوزى قاۋىپسىز سەزىنەدى.
ومىردە ىسكە اسپايتىن ەشتەڭە جوق. فورۋمعا قاتىسۋشىلاردى قاي تۇرعىدان بولسىن قۇلشىندىرعان ادام بەلگىلى شۆەد ساياحاتشىسى, حالىقارالىق تابيعاتتى قورعاۋ وداعى جانە Snow Leopard Foundation قورىنىڭ ەلشىسى يوحان نيلسون بولدى. 20 جىلدا بۇل جيھانكەز الەمنىڭ 169 ەلىن ارالاپ, 70 شىڭدى باعىندىرعان.
ساياحاتشى الەمنىڭ ءار ەلىندە ۇشىراساتىن قورشاعان تابيعاتقا قاتىستى ماسەلەلەردى قوزعادى. مىسالى, دۇنيە ءجۇزىنىڭ ەڭ بيىك شىڭدارىندا, ونىڭ ىشىندە ەۆەرەستە تاۋ بولىپ ۇيىلگەن قوقىس ماسەلەسىن دە العا تارتتى. ءۇش جىل بويى نيلسون جانە ونىڭ ارىپتەستەرى جالپى سانى 250 ادامنىڭ قاتىسۋىمەن ارنايى ەكسپەديتسيا ۇيىمداستىرعان. ەكسپەديتسيا مۇشەلەرى الەمنىڭ ەڭ بيىك نۇكتەسى توڭىرەگىنەن 15 توننا قوقىستى جيناعان. گيمالايدى دا تازالاعان.
ومىردە بارلىق نارسەگە قول جەتكىزۋگە بولادى دەپ ەسەپتەيتىن ساياحاتشى وڭتۇستىك پوليۋستەن سولتۇستىك ءپوليۋستى جاياۋ كەسىپ وتكەن ادام ەكەندىگىن ايتپاعاننىڭ وزىندە, اركتيكاعا دا بارعان, دەنتاپلانمەن دە ۇشقان. قىسقاسى, كورمەگەن جەرى جوق.
بارلىق كەزدە بەيتاراپ بولۋعا تىرىسقان يوحان, ەڭ باستىسى ادام بالاسى قورشاعان ورتاعا زيانىن تيگىزبەۋ قاجەت دەپ بىلەدى. «قازىر قايدا بارساڭىز دا الدىڭىزدان قوقىس شىعادى. سالىستىرمالى تۇردە سىزدەردىڭ تاۋلارىڭىز ايتارلىقتاي تازا», دەيدى ساياحاتشى.
18 جاستاعى مۇگەدەك جىگىتتى شۆەتسيا شىڭىنا الىپ شىققان يوحاننىڭ تاۋ تۋريزمىنە قاتىستى ايتارى كوپ بولدى. ونىڭ ومىرلىك قاعيداتى – تابيعاتقا قارسى شىقپاۋ, ۇلتتىق ساياباقتاردى كوركەيتۋ, جابايى حايۋانداردى بوستاندىققا جىبەرۋ. ويتكەنى ادامدار وسى اينالاداعى ءومىردىڭ ءبىر بولشەگى عانا.
شۆەد ساياحاتشىسى قازاقستاندا تاۋ ءتۋريزمىن مەملەكەت ماقتانىشىنا اينالدىرا الاتىنداي بارلىق مۇمكىندىك بار دەپ ەسەپتەيدى.
50 جىل بۇرىن فرانتسياعا دا تۋريستەر اعىلىپ كەلەتىنىنە ەشكىم سەنبەگەن. فرانتسياداعى Les Portes du Mont Blanc تاۋ شاڭعىسى كۋرورتىنىڭ باس ديرەكتورى لۋكاس مارشاند ءۇشىن شىمبۇلاق شاتقالدارى تاڭسىق ەمەس. ول 2010-2014 جىلدار ارالىعىندا شىمبۇلاقتا قىزمەت ەتكەن.
تۋريزم سالاسىندا جيناعان تاجىريبەلەرى مەن باستان وتكەندەرى جايلى قىزۋلانا, قۇلشىنا باياندايتىن لۋكاستىڭ ويىنشا, الماتى جاقسى جاعىنا قاراي وزگەرگەن.
– سوڭعى 15-20 جىلدا تۋريزم عالامدانا ءتۇستى. قازىر ادامدار الەمنىڭ بارلىق نۇكتەسىن شارلايدى. قازاقستانعا كەلگەن, تاۋلارىنا جولى تۇسكەن ادام كورگەن-بىلگەندەرىن ينتەرنەت ارقىلى باياندايدى. جاقسىلى-جاماندى پىكىرلەرىن عالامتور ارقىلى تاراتادى. سوندىقتان دا وسى ەلگە كەلگەن تۋريست قايتىپ ورالاتىنداي جانە وزىمەن بىرگە باسقالاردى دا ەرتىپ اكەلەتىندەي جاعداي تۋعىزۋ قاجەت, – دەيدى لۋكاس مارشاند.
ونىڭ پىكىرىنشە, كۋرورتتى دۇرىس پوزيتسيالاۋ جانە ۆاۋ-ەففەكتى تۋدىرۋ وتە ماڭىزدى.
ء«بىز ەزۋىمىزبەن كۇلەمىز, قازاقتار جۇرەگىمەن كۇلەدى»
بىلتىر رەسەيدەن قازاقستانعا كەلگەن تۋريستەر سانى 65 مىڭعا, گرۋزياعا بارعاندار – 166 مىڭعا دەيىن جەتتى. نەگە؟ فرانتسيادان كەلگەن قوناقتىڭ زاماناۋي ءتۋريزمنىڭ جاھاندانۋى جونىندەگى پىكىرىمەن «شەكسىز الەم» (رەسەي) تۋريستىك قاۋىمداستىعىنىڭ اتقارۋشى ديرەكتورى الەكساندر اگاموۆ تا كەلىسەدى. ونىڭ ايتۋىنشا, 2017 جىلى رەسەيدەن قازاقستانعا كەلگەن تۋريستەر سانى 65 مىڭعا, ال گرۋزياعا بارعاندار – 166 مىڭعا دەيىن جەتكەن. وسىعان قاراپ, ساراپشى رەسەيلىكتەر قازاقستاننىڭ تۋريستىك مۇمكىندىكتەرى تۋرالى از بىلەدى دەگەن قورىتىندى جاسادى. رەسەي تۋريزم يندۋسترياسىنىڭ وكىلى ءوز ەلىنىڭ تاجىريبەسىنە سۇيەنە وتىرىپ, تۋريستەردى تارتۋدا قازاقستان ءۇشىن ەڭ تارتىمدى نارىقتارعا نازار اۋدارۋعا كەڭەس بەردى. ول وسى رەتتە قىتاي, وڭتۇستىك كورەيا, يران جانە ءۇندىستان مەملەكەتتەرىن اتاپ ءوتتى.
ونىڭ ءسوزىن فرانتسياداعى Les Portes du Mont Blanc تاۋ شاڭعىسى كۋرورتىنىڭ باس ديرەكتورى لۋكاس مارشاند قايتا قۋاتتاپ: «قازاقستاندا ءبارى دە بار. تۇرگەن مەن شارىن كەرەمەت ەمەس پە؟! مەن مۇنى ارتىق ماقتاۋ ءۇشىن ايتىپ وتىرعانىم جوق. 4 جىل وسى ەلدە تۇردىم. ادامداردىڭ قوناقجايلىق پەيىلىن اڭسايتىن كەزدەرىم بولادى. ەۋروپالىقتاردىڭ ءبىر-بىرىنە جىلۋى جوق. ءبىز ەزۋىمىزبەن كۇلەمىز, قازاقتار جۇرەگىمەن كۇلەدى.
اۋستريا تابىستىڭ 30-40 پروتسەنتىن قايتا ورالعان تۋريستەن تابادى. – الماتىنىڭ تاۋلارىن جاقسى كورەمىن! – دەپ ءسوزىن ءبىر اۋىز قازاقشامەن باستاعان اۋستريانىڭ قازاقستانداعى ەلشىلىگى ساۋدا ءبولىمىنىڭ باسشىسى ميحاەل ميۋللەر ءوز ەلىنىڭ ۇلگىسىندە تاۋ ءتۋريزمىن دامىتۋدىڭ قۇقىقتىق اسپەكتىلەرىنە نازار اۋداردى.
اۋستريا تاۋ ءتۋريزمى نارىعىنداعى نەگىزگى ويىنشىلار – ءتۇرلى قاۋىمداستىقتار, ولاردىڭ نەگىزگى بولىگى اۋستريالىق ءالپى كلۋبى, ونىڭ قۇرامىندا 500 مىڭنان استام مۇشە بار. كلۋبتار 20 مىڭ شاقىرىمنان استام تاۋ جولدارى مەن سوقپاقتاردى باسقارادى. بۇل ءىستى ەرىكتىلەر ەرەكشە ىنتامەن اتقارادى. كلۋب دۇرىس جول بەلگىلەرى ورناتىلىپ, ءتيىستى مارشرۋتتار سالىنعانىنا جاۋاپتى. اۋسترياداعى تاۋ ءتۋريزمى دامۋىنىڭ ەكىنشى كومپونەنتى – فەدەرالدى جەرلەر. ولار ينفراقۇرىلىمدى قارجىلاندىرۋدا, جەكە كومپانيالارمەن ىنتىماقتاستىق ورناتۋدا ماڭىزدى رولگە يە. «تۋريزم وتە تابىستى باعىت بولۋى مۇمكىن, بۇل ۇيلەستىرۋ ماسەلەسىنە كەلىپ تىرەلەدى, سوندىقتان جەرگىلىكتى جانە شەتەلدىك تۋريستەر قىزىقتى ۇسىنىستار پاكەتىن جانە تاۋ مارشرۋتتارى تۋرالى تولىق اقپارات الا الۋى شارت», دەدى ميحاەل ميۋللەر.
وسى تۇرعىدا «سىزدەردىڭ كۋرورتتارىڭىزدا شاعىن جانە ورتا بيزنەس جەتكىلىكسىز, كوپتەگەن مەيرامحانالار مەن ويىن-ساۋىق ورتالىقتارى جوقتىڭ قاسى», – دەدى رەسەيلىك مامان الەكساندر اگاموۆ. «HORECA قازاقستان» مەيرامحانالار مەن قوناقۇي بيزنەسى كاسىپورىندارى ۇلتتىق قاۋىمداستىعىنىڭ پرەزيدەنتى يگور كوپايلوۆتىڭ ويىنشا, الماتى وبلىسىنداعى تاۋ شاڭعىسى كۋرورتتارىنا كەلەتىن تۋريستەر ءۇشىن جاعىمسىز جاڭالىقتاردىڭ ءبىرى – قازىرگى زامانعى حالىقارالىق ستاندارتتارعا سايكەس كەلەتىن تۋريزم جانە قوناقجايلىلىق يندۋسترياسى نىساندارىنىڭ جەتىسپەۋشىلىگى.
قورىتا كەلگەندە, فورۋم اياسىندا وتكەن ءباسپاسوز ءماسليحاتىندا قازاقستاندىق جانە شەتەلدىك سپيكەرلەر باق وكىلدەرىنىڭ بارلىق سۇراعىنا بۇكپەسىز جاۋاپ بەردى. قازاقستاندىق تۋريزم يندۋسترياسى مەن بەلسەندى سپورتتى دامىتۋعا مامانداندىرىلعان قاۋىمداستىق وكىلدەرى الماتى قالاسىنىڭ اكىمدىگىنە تاۋ ءتۋريزمىن جانە بەلسەندى دەمالىستى ناسيحاتتايتىن ءىس-شارالاردى ۇيىمداستىرۋعا قولداۋ كورسەتۋگە دايىن ەكەندىگىن ءبىلدىردى.
ايناش ەسالي,
«ەگەمەن قازاقستان»
