ال ماماندار جول ۋاقىتىندا پايدالانۋعا بەرىلۋى ءۇشىن كۇن تارتىبىندە تۇرعان باستى ماسەلە – جول سالۋعا ماتەريالدار جەتكىلىكتى بولۋى كەرەك دەيدى. سونىڭ ىشىندە قيىرشىقتاس, بيتۋم اسا قاجەت ەكەن. سوندىقتان وبلىس اكىمدىگىنىڭ وتىرىستارىنا جول سالۋشى كومپانيالار وكىلدەرى دە ءجيى قاتىساتىن بولدى.
ءتيىستى مەكەمەلەرگە جول بولىكتەرىن مەرزىمىندە اياقتاۋى, ونىڭ ساپاسىن قاتاڭ باقىلاۋدا ۇستاۋ تاپسىرىلدى. اۋدان, قالا اكىمدەرىنە كونكۋرستاردى مەرزىمىندە اياقتاپ, جوبالاۋ جۇمىستارىن جان-جاقتى قاراستىرۋ مىندەتتەلدى. بيىل وبلىستاعى جولدىڭ 1100 شاقىرىمى جوندەلسە, ونىڭ ىشىندە 460 شاقىرىمنان استامى جەرگىلىكتى اۋىل جولدارىنا تيەسىلى.
وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ حابارلاۋىنشا, وڭىردەگى جول جوندەۋ جۇمىستارىنا 12,5 ملرد تەڭگەگە جۋىق قاراجات بولىنگەن. جەرگىلىكتى ماڭىزداعى جولداردا 67 شاقىرىمعا اسفالت-بەتون توسەمى سالىنعان. جوندەۋ جۇمىستارىنىڭ ساپاسىن باقىلاۋ ماقساتىندا باسقارما ماماندارى, اۆتورلىق جانە تەحنيكالىق باقىلاۋ وكىلدەرى اپتا سايىن «پاۆلودارجول لابوراتوريا» قىزمەتكەرلەرىمەن بىرىگىپ تەكسەرىس جۇرگىزەدى.
ال وڭىردەگى جولدارداعى ەڭ ۇلكەن ماسەلە – باياناۋىل كۋرورتتى ايماعىنا اپاراتىن جولدى جوندەۋ تاعى دا جوسپارلانىپ وتىر. تۋريستەر دە, قوناقتار دا, قاراپايىم جۇرتشىلىق تا باياناۋىلعا باراتىن جولدىڭ جوندەلۋىن كۇتۋمەن كەلەدى. تۋريستىك الەۋەتكە ساي جاڭا زامان جولدارى قاجەت. كۋرورتتى اۋداندا جالپى 340 شاقىرىم جول جوندەلمەك. سونىڭ ىشىندە قالقامان كەنتىنەن قاراعاندى وبلىسىنىڭ شەكاراسىنا دەيىنگى 174 شاقىرىم جولدى جوندەۋ بويىنشا تەندەر دە ءوتتى. قۇرىلىستى ءىرى كومپانيالار جۇرگىزەدى. قاجەتتى ماتەريالدار دا دايىن. ناتيجەسى قانداي بولارىن ۋاقىت كورسەتەدى...
اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ مالىمەتىنشە, «ساپا» سەرىكتەستىگى اۋداندىق ماڭىزى بار جاڭاجول – ەسكەلدى باعىتىندا 52 شاقىرىم جولدى جوندەۋدە. جوندەۋ جۇمىستارى جاڭا تەحنيكالارمەن, جاڭا تاسىلمەن جۇرگىزىلۋدە. ياعني جولدى الدىمەن بەتونداپ, ونىڭ ۇستىنە اسفالت توسەيدى.
سونىمەن قاتار تالاي جىل جوندەلمەي كەلە جاتقان جول – اۋداندىق ماڭىزى بار اقسان اۋىلىنىڭ كىرەبەرىسى مەن تورايعىر اۋىلى – جاسىباي دەمالىس ايماعىنداعى جول دا جوندەلۋدە. اقسان اۋىلىنداعى جولدىڭ ۇزىندىعى بار-جوعى 6 شاقىرىم بولسا, تورايعىر – جاسىباي اراسىنداعى بولىك 12 شاقىرىم.
دەمالىس ايماعى سانالاتىن تورايعىر اۋىلى مەن جاسىباي كولى دەمالىس ايماعىندا جول قۇرىلىسى بىلتىر باستالىپ, نەگىزگى تابانى سالىنعان بولاتىن. بيىل اسفالت توسەلۋدە. باياناۋىل ارقىلى وتەتىن رەسپۋبليكالىق ماڭىزى بار پاۆلودار – قاراعاندى باعىتىنداعى جولدىڭ جۇمىستارى دا باستالدى. بۇل جولعا «قازاۆتوجول» اق جاۋاپ بەرەدى. قازىر جول بولىكتەرىندە مەردىگەرلەر ءوز كەستەلەرىنە ساي جۇمىستارىن جاساۋدا. ءبىز تەك باقىلاۋشىمىز دەيدى اۋداندىق اكىمدىك قىزمەتكەرلەرى.
بيىل باياناۋىلداعى اۋداندىق ماڭىزى بار 70 شاقىرىمدىق جولدىڭ جوندەۋ جۇمىستارىنا 1,5 ملرد تەڭگە ءبولىنىپتى. تەرەڭكول – ميحايلوۆكا – رەسەي شەكاراسى باعىتىنداعى وبلىستىق ماڭىزى بار اۆتوكولىك جولىنا دا وبلىستىق قازىنادان 766 ميلليون تەڭگە قارجى بولىنگەن. مەردىگەر «پكف – گوردورستروي» جشس قازىر جول قۇرىلىسىن ءبىتىرىپ تە قالدى.
تەرەڭكول – ميحايلوۆكا – رەسەي شەكاراسى باعىتىنداعى جولدىڭ ءارى قارايعى 62-82 شاقىرىم ارالىعىنداعى 40 شاقىرىم جولعا ورتاشا جوندەۋ جۇمىستارىن «ازا» جشس جۇرگىزۋدە. بەرەگوۆوي – وكتيابر – لەسنوە اۋىلدارى باعىتىنداعى جولعا دا كۇردەلى جوندەۋ جۇمىستارى باستالدى.
ال ەكىباستۇز قالالىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ حابارىنشا, بيىل قالاعا قاراستى اۋىلدار جولدارىنىڭ قۇرىلىسىنا, كۇردەلى, ورتاشا, اعىمدىق جوندەۋىنە جانە تاس جولداردى كۇتىپ-ۇستاۋعا 2,1 ملرد تەڭگە بولىنگەن. قالاعا قاراستى ءوندىرىستى سولنەچنىي كەنتىنىڭ جولى دا تالاي جىلدار بويى ويلى-شۇڭقىرلى ەدى. اقىرى بۇل جولدى گرەس-2 ەلەكتر ستانساسى ءوز قارجىسى ەسەبىنەن جوندەۋدى قولعا الىپتى.
فاريدا بىقاي,
«ەگەمەن قازاقستان»
پاۆلودار وبلىسى
