وقيعا بىلاي بولعان ەكەن. وسى اۋىلدىڭ 36 جاستاعى يمامىنىڭ 8 جاسار ۇلى قارا ەرتىسكە شومىلىپ ءجۇرىپ, وزەننىڭ قاتتى اعىسىنا توتەپ بەرە الماي قالادى. جاعادا تۇرعان اكەسى مەن 19 جاستاعى اعاسى ونى قۇتقارماق بولىپ جانۇشىرا سۋعا سەكىرگەنىمەن اساۋ وزەن ىرىق بەرمەي, ۇشەۋىن دە الا جونەلگەن كورىنەدى. وسىلايشا ءبىر ءۇيدىڭ ءۇش بىردەي مۇشەسىن قاس قاعىم ساتتە بۋىرقانعان وزەن اعىزىپ اكەتەدى.
قازىر جەرگىلىكتى تۇرعىندار مەن قۇتقارۋشىلار توبى يمام مەن ونىڭ ۇلدارىنىڭ دەنەسىن ىزدەستىرۋدە. «وزەننىڭ اعىسى قاتتى ءارى سۋ دەڭگەيى جوعارى بولىپ تۇر. كەيبىر تۇستارىندا يىرىمدەر بار. سۋ استىندا شۇڭقىرلار دا جوق ەمەس. شىعىس وڭىرلىك اەروموبيلدى جەدەل-قۇتقارۋ جاساعىنىڭ قۇتقارۋشىلارى موتورلى قايىقپەن ىزدەستىرۋ جۇمىستارىن جۇرگىزۋدە», - دەيدى شىعىس وڭىرلىك اەروموبيلدى جەدەل-قۇتقارۋ جاساعىنىڭ 9 بولىمشەسىنىڭ باستىعى تالعات نۇرجانوۆ.
ىزدەستىرۋ جۇمىستارى وزەن جاعاسىندا دا جالعاسۋدا. بۇعان سول اۋىلدىڭ 80 ادامى مەن 11 قايىق جۇمىلدىرىلىپتى.
وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى شىعىس وڭىرلىك اەروموبيلدى جەدەل-قۇتقارۋ جاساعىنىڭ 9 بولىمشەسىنىڭ تاعى ءبىر توبى وسىدان 10 كۇن بۇرىن زايسان كولىندە بالىق اۋلاپ ءجۇرىپ جوعالىپ كەتكەن ەكى ادامدى دا ىزدەستىرىپ جاتقانىن حابارلادى. سونىمەن قاتار ءۇرجار اۋدانى اۋماعىنداعى ساسىقكول كولىندە دە ءبىر بالىقشى ىزدەستىرىلىپ جاتقان كورىنەدى.
تاعى ءبىر قايعىلى وقيعا ۇلان اۋدانىنىڭ بوزانباي اۋىلىندا تىركەلىپتى. اتا-اناسىنىڭ قاراۋىنسىز قالعان 1 جاستاعى بالا 20 ليتر سۋعا باتىپ كەتىپتى. «وسى اۋىلعا جاقىندا عانا كوشىپ كەلگەن جاس وتباسى ءۇي شارۋاسىمەن ەسى شىعىپ ءجۇرىپ, بالانى ەستەرىنەن شىعارىپ العان. ءبىر جاستاعى بالا اۋلادا تۇرعان سۋعا تولى ىدىسپەن ويناعىسى كەلدى مە, الدە سۋ ىشكىسى كەلدى مە, ايتەۋىر اڭداۋسىزدا سۋعا قۇلاپ كەتكەن», - دەلىنگەن توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان مالىمەتتە.
ازامات قاسىم,
«ەگەمەن قازاقستان»
شىعىس قازاقستان وبلىسى
