بۇگىندە الىس جانە جاقىن شەتەلدەردەن 150-دەن استام تالاپكەر ۇلتتىق ۋنيۆەرسيتەتكە ءتۇسۋ ءۇشىن ونلاين جۇيە ارقىلى تىركەلىپ, قۇجاتتارىن تاپسىردى. قازىرگى كەزدە ولاردىڭ وتىنىشتەرى قابىلدانىپ, ەندىگى كەزەكتە وقۋ ورنىنا تالاپتارعا سايكەس قاشىقتىقتان قابىلدانا الادى. برازيليا, اقش, فرانتسيا, گەرمانيا, يندونەزيا, وڭتۇستىك كورەيا, تۇركيا, ءۇندىستان جانە تاعى باسقا مەملەكەتتەردىڭ ازاماتتارى وسى جۇيە ارقىلى وتىنىشتەرىن ءبىلدىرىپ وتىر.
ۋنيۆەرسيتەتتىڭ وقۋ ءىسى جونىندەگى پرورەكتورى اسقار حيكمەتوۆ بيىلعى جىلى شەتەلدىك ستۋدەنتتەردىڭ ۇلكەن لەگى قابىلداناتىنىن جەتكىزدى. جوعارى حالىقارالىق ستاندارتتارعا ساي كەلەتىن ءبىلىم بەرۋ باعدارلامالارى, سونداي-اق اعىلشىن تىلىندە وقۋ مۇمكىندىگى, زاماناۋي كىتاپحانا, ستۋدەنتتەرگە قىزمەت كورسەتۋ ورتالىعى, سپورت كەشەنى جانە جايلى جاتاقحانالار ورنالاسقان بىرەگەي ۋنيۆەرسيتەت كەشەنى تالاپكەرلەردىڭ قىزىعۋشىلىعىن تۋعىزۋدا. ۇلتتىق ۋنيۆەرسيتەتتە ولار ساپالى ءبىلىم الۋمەن قاتار عىلىمي جانە شىعارماشىلىق الەۋەتىن جۇزەگە اسىرۋعا مۇمكىندىك الادى.
جاڭا وقۋ جىلىندا 600 شەتەلدىك ستۋدەنت قابىلدانادى دەپ جوسپارلانعان. جالپى مەديتسينا, اقپاراتتىق جۇيەلەر, حالىقارالىق قاتىناستار, مەنەدجمەنت, بيوتەحنولوگيا, قازاق جانە ورىس تىلدەرىن وقۋ سياقتى ماماندىقتار جوعارى سۇرانىسقا يە بولىپ وتىر.
ەلۆيرا سەرىكقىزى,
«ەگەمەن قازاقستان»
الماتى
