بۇگىندە فەدەراتسيانىڭ 2 ميلليوننان استام مۇشەسى بار. اعىمداعى جىلدىڭ شىلدە ايىندا الماتى قالاسىندا القالى جيىندا كاسىپوداقتار فەدەراتسياسىنىڭ توراعاسى باقىتجان ءابدىرايىم كاسىپوداقتار قىزمەتىنىڭ ءمانى الەۋمەتتىك ادىلەتتىلىكتى دامىتۋمەن بايلانىستى ەكەندىگىن اتاپ وتكەن بولاتىن. ياعني فەدەراتسيانىڭ مىندەتى – كاسىپوداقتاردىڭ بىرلىگىن نىعايتۋمەن قاتار ۇيىمدىق قۇرىلىمداردىڭ قىزمەتىن جەتىلدىرۋ بولماق. كاسىپوداقتار الەۋمەتتىك جانە ەڭبەك قاتىناستارى ماسەلەلەرىن شەشۋگە, كاسىپورىنداردا قولايلى جاعدايلار مەن تۇراقتىلىقتىڭ قامتاماسىز ەتىلۋىن ءجىتى باقىلاۋدا ۇستاۋعا ءتيىس.
وسى باعىتتا «الماتى قالاسى كاسىپوداقتار ورتالىعى» اۋماقتىق كاسىپوداقتار بىرلەستىگىندە «الماتى قالاسىنىڭ كاسىپوداقتارىن جاڭعىرتۋدىڭ جول كارتاسى» بويىنشا سالاداعى ماسەلەلەردى شەشۋگە, الەۋمەتتىك سەرىكتەستىكتى دامىتۋ جانە نىعايتۋعا بايلانىستى كەشەندى جۇمىس جولعا قويىلعان. بىرلەستىكتىڭ قۇرامىنا 687 كاسىپوداق ۇيىمى كىرەدى. الماتىداعى كاسىپوداق مۇشەلەرىنىڭ سانى – 183 مىڭ.
اعىمداعى جىلى الماتى قالاسىنىڭ اكىمدىگى, «الماتى كاسىپوداقتار وداعى» اۋماقتىق كاسىپوداقتار بىرلەستىگى, «الماتى قالاسى كاسىپ-
وداقتار ورتالىعى» اكب, الماتى قالاسى كاسىپكەرلەر پالاتاسى اراسىندا 2018-2020 جىلدارعا ارنالعان وڭىرلىك كەلىسىم جاسالعان بولاتىن. بۇل قۇجاتقا سايكەس, جالدامالى جۇمىسشىلاردى ەڭبەكپەن قامتاماسىز ەتە وتىرىپ, الەۋمەتتىك قامسىزداندىرۋدىڭ دەر كەزىندە ورىندالۋى قاداعالانادى. ياعني جۇمىسشىلار ەڭبەكاقىسىن, زەينەتاقى جانە الەۋمەتتىك اۋدارىمداردى ۋاقىتىندا الىپ وتىرۋى ءتيىس.
«الماتى قالاسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ ءتورايىمى زاۋرەش ومىرباەۆا قاۋىپسىز ەڭبەك جاعدايلارىنىڭ كۇشەيتىلۋىنە بايلانىستى سوڭعى جىلداردا وندىرىستە جاراقات الۋ جاعدايلارىنىڭ ازايعاندىعىن ايتادى. بۇل كورسەتكىش بيىل ەلىمىز بويىنشا 1500-ءدى قۇراعان. قازىرگى كەزدە ەڭبەك قاۋىپسىزدىگىن ارى قاراي جەتىلدىرۋگە بايلانىستى قوعامدىق باقىلاۋ جۇيەسى ارقىلى ونەركاسىپتىك جانە ەڭبەك قاۋىپسىزدىگى كەڭەستەرى قۇرىلعان. ياعني كەڭەس قۇرامىنا كاسىپوداق جانە جۇمىس بەرۋشىنىڭ وكىلدەرى كىرەدى. بۇل الەمدىك تاجىريبەدە قالىپتاسقان ۇدەرىس. ەلىمىزدىڭ قولدانىستاعى ەڭبەك تۋرالى زاڭناماسىندا بەكىتىلگەن ءوندىرىس كەڭەسىنىڭ شەشىمدەرى جۇمىس بەرۋشى ءۇشىن مىندەتتى بولىپ تابىلادى. ءارى وعان جۇمىس بەرۋشى جاۋاپتى. كاسىپوداقتار ءاربىر جۇمىس ورنىنىڭ قاۋىپسىزدىگىن قامتاماسىز ەتۋ ماقساتىندا وندىرىستىك قورلار مەن تەحنولوگيالىق جابدىقتاردى جاڭارتۋدى قاداعالاپ وتىرادى. وسى باعىتتا الەۋمەتتىك سەرىكتەستىك اياسىندا «قا-
ءۋىپسىز جۇمىس» باعدارلاماسى ازىرلەندى. باعدارلاما وندىرىستىك جاراقات الۋدىڭ, وقىس وقيعالاردىڭ الدىن الۋ سيياقتى قاۋىپسىزدىك شارالارىن جاقسارتۋعا باعىتتالعان.
ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا جۇمىسسىزداردى جانە ءوزىن-ءوزى جۇمىسپەن قامتىعان ادامدارعا جاردەمدەسۋ نەگىزىندە ەڭبەك نارىعىندا سۇرانىسقا يە كاسىپتەرگە باۋلۋ ماقساتىندا قىسقا مەرزىمدى كاسىپتىك وقىتۋ جۇيەسى دە جولعا قويىلعان.
اعىمداعى جىلى استانا قالاسىندا جوعارعى سوت پەن كاسىپوداقتار فەدەراتسياسى اراسىندا ءوزارا ارىپتەستىك تۋرالى مەموراندۋمعا قول قويىلدى. وندا تاراپتار كەلىسۋ ۇردىستەرى, تاتۋلاسۋ ورتالىعىندا قىزمەت كورسەتەتىن مامانداردى وقىتۋ جانە قىزمەت ساپاسىن جاقسارتۋ ارقىلى داۋلاردى رەتتەۋ تۋرالى زاڭنامانى دامىتۋ جانە ءوزارا بايلانىس جاساۋ ماسەلەلەرى بويىنشا ارىپتەستىككە قول جەتكىزدى. وسىعان وراي كاسىپوداقتار فەدەراتسياسىنىڭ اۋماقتىق كاسىپوداقتار بىرلەستىكتەرىنىڭ بازاسىندا تاتۋلاسۋ ورتالىقتارىن اشۋ قاراستىرىلۋدا. ال الماتىدا اشىلعان تاتۋلاسۋ ورتالىعى سوتقا شاعىمداردىڭ سانىن ازايتۋعا مۇمكىندىك بەرەدى. بىتىمگەرلىك راسىمدەردىڭ ءرولىن كۇشەيتۋ ازاماتتارعا داۋلاردى سوتقا جەتكىزبەي شەشۋدە ۇلكەن كومەك كورسەتەدى. سونىمەن قاتار 2018-2019 جىلدار ارالىعىندا ەڭبەك جانە حالىقتى الەۋمەتتىك قورعاۋ مينيسترلىگى, كاسىپوداقتار فەدەراتسياسى, «اتامەكەن» ۇلتتىق كاسىپكەرلەر پالاتاسى تاراپىنان «ۇجىمدىق شارت جاساڭىزدار!» رەسپۋبليكالىق اكتسياسى ۇيىمداستىرىلىپ وتىر. جاستار ساياساتىن ىسكە اسىرۋدا ءارى وقيتىن جاستاردىڭ الەۋمەتتىك جانە ەڭبەك قۇقىقتارى مەن مۇددەلەرىن قورعاۋدا «اتامەكەن» كاسىپكەرلەر پالاتاسى جانە الماتى قالاسىنىڭ جۇمىسپەن قامتۋ ورتالىعىمەن بىرلەسىپ بوس ورىندار جارمەڭكەسىن, سەمينارلار, دوڭگەلەك ۇستەلدەر تۇراقتى وتكىزىلىپ كەلەدى.
جۇمىسشىلار مۇددەسىن قورعاۋدا حالىقارالىق بايلانىستار دا جولعا قويىلعان. اعىمداعى جىلى تۇركيانىڭ, قحر حاينان پروۆينتسياسى كاسىپوداق ورتالىقتارىنىڭ دەلەگاتسيالارىمەن وتكەن كەزدەسۋلەر بارىسىندا دەمالىس بەرۋگە, دەمالىس بولىمدەرىن بولۋگە, قىزمەتكەرلەردى قىسقارتۋعا, بالا كۇتىمىنە ارنالعان دەمالىسقا, جالاقىنى ۇلعايتۋ مۇمكىندىگىنە قاتىستى شەتەل تاجىريبەلەرى تالقىلاندى.
«الماتى قالاسى كاسىپوداقتار ورتالىعى» اۋماقتىق كاسىپوداقتار بىرلەستىگى جۇمىسشىلار مۇددەسىن قورعاۋدى جەتىلدىرۋگە بايلانىستى الماتى قالاسى مەملەكەتتىك ەڭبەك ينسپەكتسياسى جانە كوشى-قون باسقارماسى, قوعامدىق كەڭەس, جاستار ۇيىمى, ىسكەر ايەلدەر قاۋىمداستىعى, «جاس وتان» جاستار قاناتى, باستاۋىش كاسىپوداقتار ۇيىمدارىمەن تىعىز بايلانىستا جۇمىس ىستەپ كەلەدى.
ەلۆيرا سەرىكقىزى,
«ەگەمەن قازاقستان»
الماتى
