ەرەكشە لاگەر ەلوردامىزدىڭ 20 جىلدىق مەرەيتويىمەن تۇسپا-تۇس كەلگەن اۋداننىڭ 90 جىلدىعى اياسىندا شابانباي بي اۋىلىنىڭ ىرگەسىندەگى قىزىلاراي تاۋىنىڭ كوركى كوز تارتاتىن تۇسىندا اشىلدى.
«جاس تۋريست» شاتىرلى لاگەرىنىڭ ماقساتى – ءوڭىردىڭ تاريحي-مادەني مۇرالارىن وسكەلەڭ جاستارعا ناسيحاتتاي وتىرىپ ءتۋريزمدى دامىتۋ. بالالار مۇندا جاي دەمالىپ قانا قويماي, اسەم تابيعات اياسىندا دەنساۋلىعىن نىعايتادى, قورشاعان ورتانى تانىپ, ەڭبەكتى سۇيۋگە باۋليتىن ءىس-شارالارعا قاتىسادى. تۋعان جەردىڭ تابيعاتىنا ءسۇيسىنىپ, توپىراعىنا اۋناپ وسكەن بالانىڭ بويىندا ەلىنە, جەرىنە دەگەن سۇيىسپەنشىلىك, وتانشىلدىق رۋح ايرىقشا بولارى انىق.
دەمالىس ورنىنىڭ اشىلۋىندا اۋدان اكىمى سالتانات ابەۋوۆا جينالعانداردى لاگەردىڭ اشىلۋىمەن قۇتتىقتاي كەلە, وسىنداي يگى ءىستى قولعا الىپ, بالالاردىڭ جازعى دەمالىسىن قىزىقتى وتكىزۋگە جاعداي جاساعان مەكتەپ ۇجىمىنا, اۋداندىق ءبىلىم بولىمىنە العىس ءبىلدىردى. اۋدان باسشىسى ەلباسىنىڭ «رۋحاني جاڭعىرۋ» باعدارلاماسىندا ىشكى تۋريزم مادەنيەتىن دامىتۋعا ماڭىز بەرگەنىن اتاپ ءوتتى. وسىعان ساي قازىرگى كەزدە ءتۇرلى باعدارلامالار قولعا الىنۋدا, ونىڭ اياسىندا اقتوعاي اۋدانىندا دا ناقتى ءىس-شارالار جۇزەگە اسىرىلىپ جاتىر. «جاس تۋريست» بالالار لاگەرى – سونىڭ ءبىر كورىنىسى.
جيىنعا قاتىسقان وبلىستىق تۋريستىك كلۋبتىڭ ديرەكتورى, سپورت شەبەرى سەرگەي كيستانوۆ تا جازعى دەمالىستىڭ ءساتتى وتۋىنە تىلەكتەستىك ءبىلدىردى.
اتالعان لاگەردە اۋدان بويىنشا 13 مەكتەپتەن 15-16 جاس ارالىعىنداعى جاسوسپىرىمدەر دەمالادى. ءۇش اۋىسىمدا بارلىعى 90 وقۋشىنى قامتۋ كوزدەلىپ وتىر.
ەركەبۇلان ايتجان
قاراعاندى وبلىسى,
اقتوعاي اۋدانى
