«قازاقستان رەسپۋبليكاسى ۇكىمەتىنىڭ 2016 جىلعى 18 اقپانداعى № 72 قاۋلىسىنا سايكەس «قازاۆياقۇتقارۋ» اق بيۋدجەت قاراجاتى ەسەبىنەن قارجىلاندىرىلاتىن مەملەكەتتىك ورگاندار مەن ۇيىمدارعا تىكۇشاق قىزمەتتەرىن ۇسىنۋ جونىندەگى بىرىڭعاي وپەراتور بولىپ بەلگىلەندى.ۇكىمەت قاۋلىسىن ىسكە اسىرۋ ماقساتىندا قازاۆياقۇتقارۋ ءىىم توتەنشە جاعدايلار كوميتەتى مەن ونىڭ بولىمشەلەرىنىڭ, دەنساۋلىق ساقتاۋ مينيسترلىگىنىڭ رەسپۋبليكالىق سانيتاريالىق اۆياتسيا ورتالىعىنىڭ, اۋىل شارۋاشىلىعى مينيسترلىگىنىڭ قازاق ورمانداردى اۆياتسيالىق قورعاۋ جانە ورمان شارۋاشىلىعىنا قىزمەت كورسەتۋ بازاسىنىڭ, قازاەروناۆيگاتسيانىڭ, جەرگىلىكتى اتقارۋشى ورگانداردىڭ جانە باسقا دا مەملەكەتتىك تاپسىرىس بەرۋشىلەردىڭ مۇددەلەرى ءۇشىن اۋەگە كوتەرىلەدى. اۆياتسيا تاسقىن جانە مۇز جاعدايىن باعالاۋ مەن اۆياتسيالىق بارلاۋدى جۇرگىزۋ ماقساتىندا تارتىلادى, توتەنشە جاعدايلاردان كەيىنگى قالپىنا كەلتىرۋ جۇمىستارىن قامتاماسىز ەتەدى, باعىتىنان جاڭىلعان بالىقشىلاردى قۇتقارۋ, دالا جانە ورمان ءورتىن ءسوندىرۋ جۇمىستارىنا, سەلگە قارسى ءىس-شارالارعا قاتىسادى. بۇدان وزگە, «قازاۆياقۇتقارۋ» اۋە كەمەلەرى بىلىكتى مەديتسينالىق مامانداردى جەتكىزۋ, شالعاي ەلدى مەكەندەردەگى ناۋقاستارعا مامانداندىرىلعان مەديتسينالىق كومەك كورسەتۋ ءۇشىن ۇشۋلار ورىندايدى», دەدى ول.
سونىمەن قاتار اندرەي كوسولاپوۆ «كازاۆياقۇتقارۋدىڭ» اۆياپاركىندە قازاقستاندا جانە شەتەلدە جاسالعان 27 تىكۇشاق بار ەكەنىن تىلگە تيەك ەتتى.
«تىكۇشاقتار استانا, الماتى, اتىراۋ, اقتاۋ, اقتوبە, قىزىلوردا, شىمكەنت, تاراز, تالدىقورعان, وسكەمەن, پاۆلودار, ورال, بالقاش قالالارىندا ورنالاسقان. مىسالى, ەس-145 (ەۆروكوپتەر) تىكۇشاقتارى دەنساۋلىق ساقتاۋ سالاسىن دامىتۋدىڭ «سالاماتتى قازاقستان» مەملەكەتتىك باعدارلاماسى شەڭبەرىندە ساتىپ الىندى جانە حالىقارالىق ستاندارتتارعا سايكەس كولىكتىك مەديتسينانى دامىتۋدى قامتاماسىز ەتۋگە باعىتتالعان. ەۆروكوپتەرلەر دەفيبريللياتوردى, وكپەنى جاساندى جەلدەتۋ جۇيەسىن, تامىرىشىلىك ينفۋزيا جۇيەسىن قامتيتىن مەديتسينالىق مودۋلمەن جانە ناۋقاستار مەن زارداپ شەككەندەردى تاسىمالداۋ ءۇشىن قاجەتتى شارالاردى قامتاماسىز ەتەتىن باسقا دا مەديتسينالىق قۇرالدارمەن جابدىقتالعان. ەۆروكوپتەرلەر كوبىنەسە رەسپۋبليكالىق سانيتارلىق اۆياتسيا ورتالىعىنىڭ وتىنىمدەرى بويىنشا تارتىلادى.
مي-8متۆ/8ت/171/ تىكۇشاقتارى نەگىزگى اۆياتسيالىق تەحنيكا بولىپ تابىلادى, ولاردىڭ قىزمەتى توتەنشە جاعدايلاردىڭ الدىن الۋعا جانە جويۋعا باعىتتالعان. تىكۇشاقتار ورتكە 5 تونناعا دەيىن وت باساتىن سۇيىقتىقتى تاستاۋعا مۇمكىندىك بەرەتىن سۋاعار قۇرىلعىلارىمەن جابدىقتالعان. كا-32ا11ۆس تىكۇشاقتارى قالالىق ورتادا وڭاي ءجۇرىپ, ءورت ءسوندىرۋدى جۇزەگە اسىرا الادى. Simplex كومپانياسىنىڭ «Fire Attack» ءورت ءسوندىرۋ جۇيەسىمەن جانە سۋ پۋشكاسىمەن جابدىقتالعان كا-32ا11ۆس ءورت ءسوندىرۋدىڭ جاقسى قۇرالى بولىپ تابىلادى.
الەمدە جۇك كوتەرگىشتىگى ەڭ جوعارى سەريالى مي-26ت تىكۇشاعى فيۋزەلياج ىشىندە نەمەسە سىرتقى اسپادا 20 تونناعا دەيىن جۇك تاسىمالداي الادى. سونداي-اق مي-26ت 15 تونناعا دەيىن وت باساتىن سۇيىقتىقتى تاسىمالداۋعا مۇمكىندىك بەرەتىن سۋاعار قۇرىلعىمەن جابدىقتالعان. ۇشۋلاردى قامتاماسىز ەتۋ مەن ورىنداۋدى جوعارى بىلىكتى ۇشۋ جانە ينجەنەرلىك-تەحنيكالىق قۇرام جۇزەگە اسىرادى. پەرسونال ۇنەمى جەتەكشى اۆياتسيالىق وقۋ ورتالىقتارىندا كاسىبي دەڭگەيدى ۇستاۋ جانە ارتتىرۋ كۋرستارىنان وتەدى. ماسەلەن, ەۆروكوپتەر تىكۇشاقتارىنىڭ ۇشۋ قۇرامىنا كۋرستار مەن ترەناجەرلىق دايارلىقتار «ەۆروكوپتەر قازاقستان ينجينيرينگ» جشس وقۋ ورتالىعىنىڭ بازاسىندا جۇزەگە اسادى. ماسەلەن, 2017 جىلى ۇشۋلاردىڭ سانى 740-قا دەيىن جەتتى. 2018 جىلدىڭ 6 ايىندا 240 ۇشۋ جۇزەگە اسىرىلدى. وتكەن جىلعى قاڭتاردا اقتوبە وبلىسىندا وزبەك ازاماتتارىن اپارا جاتقان اۆتوبۋستا بولعان قايعىلى وقيعا كەزىندە قازاۆياقۇتقارۋ قازا بولعانداردىڭ دەنەلەرىن تاسىمالداۋ مەن وقيعانى تەرگەۋ كوميسسياسىن جەتكىزۋ ءۇشىن قىسقا مەرزىمدە وقيعا ورنىنا بىرنەشە تىكۇشاقتى جۇمىلدىردى», دەدى ول.
راۋان قايدار,
«ەگەمەن قازاقستان»
