تاياۋدا الماتى شاھارىنىڭ ورتاسىندا الىپ ءتيىننىڭ ءمۇسىنى پايدا بولدى. نازىك قولىنا قىزىل الما ۇستاپ تۇرعان ءتيىندى بەينەلەگەن تۋىندى قالانىڭ قاق ورتاسىنداعى «اتاكەنت» كەشەنىنىڭ الدىنان ورىن تەپكەنى, بيىكتىگىنىڭ ءتورت قاباتتى ۇيمەن بىردەيلىگى, 15 توننا تەمىر, 3 توننا اعاش پەن 3 توننا سابان جۇمسالعانى بىرقاتار باسپاسوزدە جاريالاندى. الايدا اتالعان تيىنگە ارنالعان ينستاللياتسيا قوعام اراسىندا قىزۋ تالقىعا ءتۇستى. الاتاۋ شىڭدارىنىڭ ەتەگىندەگى شانشىلا بىتكەن قاراعاي نۋى مەن الماتىداي الىپ مەگاپوليس ساياباقتارىنىڭ سانىنە اينالعان سۇيكىمدى ءتيىننىڭ سۇيكىمسىز بولۋى نەلىكتەن دەگەن ساۋال تۋادى.
قالىڭ ەلدى ەڭ الدىمەن قاپالاندىرعانى – ءمۇسىننىڭ ۋاقىتشا مەرزىمگە قويىلعاندىعى بولسا, ەكىنشىدەن, ماۋسىم وتكەن سوڭ لاۋ ەتە قالاتىن قۋراعان قۋ ساباننان سوعىلعان مۇسىنگە 23 ميلليون تەڭگەنىڭ جۇمسالۋى دەۋگە بولادى. قالا اكىمدىگىنە «كرەاتيۆتى» يدەياسىن بۇلداي بىلگەن FUNK كرەاتيۆتى اگەنتتىگىنىڭ جەتەكشىسى مايرا يزمايلوۆا بۇل قاراجاتتىڭ كوپ ەمەس ەكەندىگىن ايتقانىمەن, قازاقستاندىق قوعامدى قىنجىلتقان جوبا بەدەلدى حالىقارالىق ءباسپاسوز بەتتەرىنە دە ارقاۋ بولدى. ونىڭ ىشىندە بريتاندىق BBC News, The Times, امەريكاندىق New York Post, FOX News سياقتى بەلدى اقپارات قۇرالدارى بار. وسىلايشا, ارت-نىسان ايداي الەمگە الماتىنىڭ اتاعىن شىعاردى.
PR ماماندارى قارالاۋدىڭ ءوزى دە جارناما بولعاندىقتان, بۇل مۇسىنگە جۇمسالعان قاراجات ءوزىن ءوزى اقتادى دەيدى. ال قازاقستاندىقتاردىڭ الەۋمەتتىك جەلىدەگى اششى پىكىرلەرى مەن ۋىتتى ازىلدەرىن جارناما كومپانيالارى دا پايدالانىپ قالۋعا تىرىسۋدا. ولار ءوز ونىمدەرىن الىپ ءتيىننىڭ اياسىنداعى بەزەندىرۋلەرمەن بەرە باستاعانىن بايقاۋعا بولادى.
ارادا كوپ ۋاقىت وتپەي الماتى وبلىسى قاراساي اۋدانىنىڭ المالىباق اۋىلىندا وسىمدىك قورعاۋ جانە كارانتين ينستيتۋتىنىڭ قىزمەتكەرلەرى مەن قازاق ۇلتتىق اگرارلىق ۋنيۆەرسيتەتىنىڭ ستۋدەنتتەرى دە ءدال وسى ىسپەتتى ءمۇسىننىڭ كوشىرمەسىن جاساپ شىقتى. كولەمى ءسال كىشكەنە بولعانىمەن ورىندالۋ تەحنولوگياسى ۇقساس. ارينە, بۇل ءتيىننىڭ تيىنى تۋرالى رەسمي اقپارات حابارلانعان جوق. بىراق الماتىلىق ءتيىننىڭ قارجىسىنداي قاراجات جۇمسالماعانى ايان. دەسە دە, الماتىداعى الىپ تيىنگە ماتەريالدىق شىعىننان گورى يدەيا مەن بەدەلگە جۇمسالعان شىعىن ارتىعىراق بولۋى ابدەن مۇمكىن. ويتكەنى جوبا اۆتورلىعى بريتاندىق تانىمال سۋرەتشى الەكس رينسلەرگە تيەسىلى. ال ونىڭ وسى ىسپەتتى ۋاقىتشا تۋىندىلارى الەمنىڭ ءىرى مەگاپوليستەرىندە قويىلىپ ءجۇر. ۋاقىتشا دەمەكشى, جوبا جەتەكشىلەرى ەگەر سۇرانىس بولسا, ءمۇسىن اۆتورىمەن كەلىسىمشارتتى ۇزارتۋ ارقىلى الىپ ءتيىننىڭ ء«ومىرىن» دە ۇزارتۋعا بولادى دەگەن ءۋاج ايتىپ وتىر...
ارينە 23 ميلليون تەڭگە قاراپايىم قالا تۇرعىنى ءۇشىن قوماقتى قارجى. ءتىپتى قالاداعى قوس باسپانانىڭ قۇنى ەكەنىن ەسكەرسەك, ءبىر پاتەردى 20 جىلعا نەسيەمەن ساتىپ الاتىن قالا حالقىنىڭ قىجىلىن تۇسىنۋگە بولادى. سوندىقتان شاھاردىڭ تۋريستىك تارتىمدىلىعىن ارتتىرۋ ماقساتىنداعى كەز كەلگەن ارت-جوبا ماۋسىمدىق بولماۋى ءتيىس. جەرگىلىكتى اڭ-قۇستى بەينەلەگەننىڭ وزىندە قولادان قۇيىلسا ەسكەرتكىش رەتىندە ەل يگىلىگىنە ۇزاق قىزمەت ەتەرى انىق.
سونداي-اق قالا كەلبەتىن اشۋدا ۇلتتىق قۇندىلىقتاردى العا شىعارعان ابزال. ايتالىق, تاياۋدا ەلباسىنىڭ جارلىعىمەن ۇلتتىق دومبىرا كۇنى بەلگىلەندى. ال الماتىدا تالاي داۋلەسكەر كۇيشىلەر ءومىر ءسۇردى. ايگىلى نۇرعيسا تىلەنديەۆتىڭ ۇلتتىق مۇراعا اينالعان سىلقىم دا سىرلى كۇيلەرى جەتەرلىك. ماسەلەن «اققۋ» كۇيىن الايىق. ۇلتتىق دومبىرا كۇنى اياسىندا وسى كۇيگە الگى 23 ميلليون تەڭگەگە عاجاپ ەسكەرتكىش تۇرعىزۋعا بولادى عوي. الماتىعا دومبىرانىڭ الىپ ەسكەرتكىشى دە ارتىق بولماس ەدى. ار جاعىندا الاتاۋ اسقاقتاپ تۇرعاندا, زاماناۋي تەحنولوگيالار ارقىلى مەنمۇندالاعان الىپ دومبىرانىڭ شاناعىنان كۇي توگىلىپ تۇرسا, ونى جاساۋعا مۇسىنشىلەرىمىزدىڭ دەڭگەيى دە, شەبەرلىگى دە جەتەدى. بۇل قالاعا ۇلتتىق رەڭك بەرەدى ءارى وتاندىق ساۋلەتشىلەرگە دە قولداۋ. سوندىقتان شاھار باسشىلىعى قوعامنىڭ ءار تالقىسىنان قورىتىندى شىعارا بىلسە, قانەكي. بۇل دا مادەنيەت. قالا قازىناسى بولگەن قاراجاتتىڭ ماقساتتى تۇردە جۇمسالۋىنا قوعامدىق وي-پىكىر ءورىس العان تۇستا رەسمي جاۋاپ ايتۋ مادەنيەتى وتە قاجەت. ويتكەنى «حالىق ايتسا قالت ايتپايدى» دەگەن ءسوز بار.
قالاي بولعاندا دا اتى شۋلى «قوناقجاي» ءتيىننىڭ قاسىندا سۋرەتكە تۇسۋشىلەر لەگى تولاستار ەمەس. الايدا تابيعاتتىڭ ءتيىنى ىنىنە كىرگەندە الماتىنىڭ الىپ ءتيىنى كوزدەن بۇلبۇل ۇشاتىنى وكىنتەدى.
دۋمان اناش,
«ەگەمەن قازاقستان»
