ءىس-شاراعا «ايبىن» رەسپۋبليكالىق اسكەري-پاتريوتتىق جاستار جيىنىنىڭ جەتەكشىسى, «جاس سارباز» اسكەري-پاتريوتتىق قوعامدىق قوزعالىسى رەسپۋبليكالىق شتابىنىڭ توراعاسى, قازاقستان قارۋلى كۇشتەرى باس شتابى باستىعىنىڭ ورىنباسارى, گەنەرال-مايور مۇحامەدجان تالاسوۆ, قاراعاندى وبلىسىنىڭ اكىمى ەرلان قوشانوۆ جانە شاقىرىلعان ارداگەرلەر قاتىستى.
– ءبىز بارشامىز كوماندالاردىڭ ءىس-قيمىلىن ءجىتى قاداعالاپ وتىردىق. سىزدەر سايىسقا بەلسەنە اتسالىستىڭىزدار, اسكەري ىسپەن, قارۋلى كۇشتەردىڭ تاريحىمەن ەتەنە جاقىن بولدىڭىزدار, وزدەرىڭىزدىڭ جەتىستىكتەرىڭىزدى, بىلىمدەرىڭىز بەن شەبەرلىكتەرىڭىزدى پاش ەتتىڭىزدەر, جاڭا دوستار تاپتىڭىزدار, سايىستا مىقتىلىقتارىڭىزدى سىناپ كوردىڭىزدەر. وسى جيىندا ءبىز ەلىمىزدە بىرىڭعاي ديالوگ الاڭىن جانە بارلىق اسكەري-پاتريوتتىق جۇمىستىڭ ورتالىعىنا اينالعان «جاس سارباز» رەسپۋبليكالىق جاسوسپىرىمدەر اسكەري-پاتريوتتىق قوزعالىسىنىڭ ىرگەتاسىن قالادىق. سىزدەردى جۇلدەلى ورىندارىڭىزبەن شىن جۇرەكتەن قۇتتىقتايمىز, – دەدى گەنەرال-مايور م.تالاسوۆ قاتىسۋشىلاردىڭ الدىندا سويلەگەن سوزىندە.
جيىن قورىتىندىسى بويىنشا اسكەري-پاتريوتتىق كلۋبتار اراسىندا ءبىرىنشى ورىندى ب.مومىش ۇلى اتىنداعى «جاس ۇلان» رەسپۋبليكالىق مەكتەبىنىڭ كومانداسى, ەكىنشى ورىندى ش.ءۋاليحانوۆ اتىنداعى ەر بالالارعا ارنالعان «جاس ۇلان» مامانداندىرىلعان مەكتەبى (سەمەي) جانە ءۇشىنشى ورىندى س.راقىموۆ اتىنداعى «جاس ۇلان» رەسپۋبليكالىق مەكتەبى (شىمكەنت) جەڭىپ الدى.
سونىمەن قاتار قازاقستان قارۋلى كۇشتەرى مەن باسقا دا اسكەري قۇرالىمداردىڭ اسكەري-پاتريوتتىق كلۋبتارى اراسىندا «شىعىس» اسكەري-پاتريوتتىق كلۋبى ءبىرىنشى ورىندى, «جاس قىران» اسكەري-پاتريوتتىق كلۋبىنىڭ كومانداسى (وتار) ەكىنشى ورىندى جانە «جاس دەسانتشى» (سارىوزەك) اسكەري-پاتريوتتىق كلۋبى ءۇشىنشى ورىندى ەنشىلەدى.
وڭىرلەردىڭ اسكەري-پاتريوتتىق كلۋبتارى اراسىندا «قايسار» (پاۆلودار) كومانداسى ءبىرىنشى ورىندى, «جىگەر» (بقو) ەكىنشى ورىندى جانە «جاس بۇركىت» (استانا) ءۇشىنشى ورىندى يەلەندى.
جيىن قورىتىندىلارى بويىنشا «ايبىنى اسقاق جاس سارباز» جۇلدەسى بەكزاتحان قالمىرزاەۆقا («قىزىلوردا ايبىندارى» اپك) تابىس ەتىلدى. ال كلۋبتار اراسىنان «قايسار» (پاۆلودار) اسكەري-پاتريوتتىق كلۋبى اتالىمىندا باس جۇلدە يەگەرى اتاندى. جالپى كوماندالىق جانە جەكە ەسەپتەردەگى جەڭىمپازدار گراموتالار, مەدالدار, كۋبوكتارمەن ماراپاتتالدى. وعان قوسا اسكەري-پاتريوتتىق جيىننىڭ بارلىق قاتىسۋشىسىنا سەرتيفيكاتتار مەن ەستەلىك سىيلىقتار تابىس ەتىلدى.
ەستەرىڭىزگە سالا كەتسەك, بيىل جيىننىڭ باعدارلاماسى اياسىندا « ۇلى دالا اسكەرى – «ماڭگىلىك ەل» تىرەگى!» اتتى قارۋلى كۇشتەر تۇرلەرىنىڭ وكىلدەرىمەن كەزدەسۋى, «ايبىن دارىنى» زياتكەرلىك ويىنى, روبوت تەحنيكاسى بويىنشا «مەنىڭ روبوتىم» بايقاۋى, «ايبىن جالىنى» الاۋىنىڭ ماڭىنداعى قىزىققا تولى كەش, «قازاقستاننىڭ 100 جاڭا تۇلعاسى» جوباسىنىڭ جەڭىمپازدارىمەن كەزدەسۋ, سونداي-اق «ايبىن داۋىسى» مەگا ارت-فەستيۆالى وتكەن بولاتىن.
سونداي-اق باعدارلامادا سپورتتىڭ اسكەري-قولدانبالى تۇرلەرى مەن جاۋىنگەرلىك دايارلىق پاندەرى بويىنشا كوپتەگەن اسكەري-قولدانبالى سايىستار ەرەكشە قىزىعۋشىلىققا يە بولدى.
سەرىك ابدىبەك,
«ەگەمەن قازاقستان»
