كوماندالىق جۇيە بويىنشا وتەتىن ءدۇبىرلى دودادا اۋعانستان, بانگلادەش, ۆەتنام, يراك, قازاقستان, قىتاي, موڭعوليا, ومان, وزبەكستان, سيريا جانە ءۇندىستان قۇرامالارى ونەر كورسەتەدى. ۇيىمداستىرۋشى مەملەكەت رەتىندە پارسى ەلى بايراقتى باسەكەگە ءوزىنىڭ ءۇش كومانداسىن قوسۋدى قۇپ كورىپ وتىر.
سارى قۇرلىقتا شاحمات ونەرى كەرەمەت قارقىنمەن دامىپ كەلە جاتقانى بارشاعا ءمالىم. ماسەلەن, قازىرگى كەزدە قىتايدىڭ قوس مىقتىسى ايەلدەر اراسىنداعى الەمدىك رەيتينگتە كوش باستاپ تۇر. ولار – يفان حوۋ مەن تسزيۋي ۆەنتسزيۋن. قىتايدىڭ تاعى جەتى وكىلى «توپ-50» ويىنشىنىڭ قاتارىندا. سونداي-اق, ۇزدىكتەر تىزىمىندە دينارا سادۋاقاسوۆا مەن جانسايا ابدىمالىك سىندى قازاقستاننىڭ قوس سۇلۋى جانە ءۇندىستان, كاتار جانە موڭعوليانىڭ ءبىر-ءبىر سپورتشىسى بار. بارلىعى – 14 ادام.
ەرلەر اراسىندا «توپ-50» شاحماتشىنىڭ قاتارىنا ازيانىڭ 10 ورەنى ەنىپ وتىر. ولاردىڭ التاۋى – قىتايدان, ۇشەۋى – ءۇندىستاننان جانە بىرەۋى – ۆەتنامنان. سولاردىڭ اراسىنداعى ەڭ ۇزدىك ناتيجە دين ليجەنگە تيەسىلى. قىتاي شاحماتشىسى الەمدىك رەيتينگتە ءتورتىنشى ورىندا تۇر.
وسىدان ەكى جىل بۇرىن بىرىككەن اراب امىرلىكتەرىنىڭ استاناسى – ءابۋ-دابيدە وتكەن ازيا ۇلتتارى كۋبوگى جولىنداعى جارىستا قازاقستاننىڭ قوس كومانداسى دا كوڭىل كونشىتەرلىكتەي ناتيجەگە قول جەتكىزىپ, ءۇشىنشى تۇعىرعا تابان تىرەگەن بولاتىن. جىگىتتەرىمىز تەك ءۇندىستان مەن قىتاي قۇرامالارىنان قالىپ قويسا, قىزدارىمىز قىتاي مەن وزبەكستانعا عانا جول بەردى.
بيىلعى جارىستا ەرلەر اراسىندا رينات جۇماباەۆ, مۇرتاس قاجىعاليەۆ, دەنيس ماحنەۆ, پەتر كوستەنكو جانە ءانۋار يسماعامبەتوۆ شەبەرلىك بايقاسسا, ايەلدەر سايىسىندا دينارا سادۋاقاسوۆا, جانسايا ابدىمالىك, گۇلميرا داۋلەتوۆا, گۇليسحان ناقباەۆا جانە اسەل سەرىكوۆا ونەر كورسەتەدى. باسەكەلەر كلاسسيكالىق شاحمات, راپيد جانە بليتستەن وتەدى.
عالىم سۇلەيمەن,
«ەگەمەن قازاقستان»
