«ەرتىس وزەنىنىڭ جاعاسىندا 22 جاعاجاي اشىلدى. بىراق تۇرعىندار وبلىس ورتالىعىنداعى سۋعا شومىلۋ ءۇشىن اسا قاۋىپتى جانە رۇقسات ەتىلمەگەن ورىندارعا بارىپ سۋعا تۇسەدى», دەيدى قۇتقارۋشىلار. دەپارتامەنتتىڭ جەدەل-قۇتقارۋ جاساعىنىڭ حابارلاۋىنشا, ستاتيستيكا سۋداعى وقىس جاعدايلاردىڭ 90 پايىزى شومىلۋعا ارنالماعان جەرلەردە بولاتىنىن كورسەتەدى.
وڭىردەگى وزەن-سۋلاردا 50-دەن اسا وسىنداي قاۋىپتى جەرلەر بار, سوندىقتان تەكسەرىلمەگەن سۋ ايدىندارىنىڭ ءتۇبى قاۋىپتى, وندا تەمىر, قوقىس جانە تاعى باسقا زاتتار كەزدەسەدى. ەكىنشىدەن, بۇل جەرلەردە قاتتى اعىن, جارتاس, ءيىرىم بولۋى مۇمكىن. ۇشىنشىدەن, سۋعا تۇسۋگە رۇقسات ەتىلمەگەن جەرلەردە دابىل تۇسە سالىسىمەن كومەككە كەلەتىن قۇتقارۋشى بولمايدى. شومىلۋعا رۇقسات بەرىلمەگەن جەرلەردەگى تۇرعىندار وزدەرىنىڭ جەكە قاۋىپسىزدىگى, بالالارىنىڭ قاۋىپسىزدىگى تۋرالى ويلانبايتىنى وكىنىشتى.
مىسالى, باس قۇتقارۋشى ەرقانات اققوزينوۆتىڭ ايتۋىنشا, وڭىردە سۋعا شومىلۋعا رۇقسات بەرىلگەن جاعاجايلاردا بىردە-ءبىر ادامنىڭ قازا بولۋى تىركەلمەپتى. ويتكەنى بۇل جاعاجايلار سۋ جاعالاۋلارىنىڭ قاۋىپسىز ايماعى سانالادى. وبلىستىق توتەنشە جاعدايلار دەپارتامەنتى ماماندارى ءبىلىم بەرۋ باسقارماسىمەن بىرلەسىپ, بىلتىر 1,5 مىڭعا جۋىق وقۋشىنى سۋدا جۇزۋگە دە ۇيرەتتى.
قازىر جاز ماۋسىمىنىڭ باسىنان باستاپ قۇتقارۋ بولىمشەلەرى مەن سۇڭگۋىر اپاتتىق-قۇتقارۋ جاساعى كەز كەلگەن قاۋىپتىڭ الدىن الۋ ءۇشىن كۇشەيتىلگەن رەجىمدە جۇمىس ىستەۋگە كوشكەن. سەنبى جانە جەكسەنبى كۇندەرى جاسىباي جانە سابىندىكول كولدەرى دەمالىس ايماقتارىندا دەمالۋشىلاردىڭ سانى 10 مىڭ ادامعا جەتەدى. وتكەن اپتادا قۇتقارۋ جيلەتىنسىز كاتاماراندا سەرۋەندەۋشىلەر جاسىباي كولىنە باتىپ كەتە جازداپ, دەر كەزىندە قۇتقارىلىپتى.
قازىر ەرتىس وزەنىندەگى سۋدىڭ دەڭگەيى جوعارى. سوندىقتان سۋعا شومىلۋ كەزىندە ساق بولۋ قاجەت. جاعاجايلارعا جاقىن جانە اسا قاۋىپتى جەرلەردە 100-دەن استام ەسكەرتۋ جانە تىيىم سالۋ بەلگىسى ورناتىلعان. توتەنشەلىكتەردىڭ ايتۋىنشا, وقىس وقيعالاردىڭ الدىن الۋ ءۇشىن شومىلۋشىلارعا ارنالعان ارنايى جاعاجايلاردىڭ قاتارىن ءالى دە كوبەيتە ءتۇسۋ قاجەت. وبلىس بويىنشا 192 كول, 7 شاعىن وزەن جانە ەرتىس وزەنى بار. بارلىق اۋىلدىڭ, اۋدان ورتالىقتارىنىڭ تۇرعىندارى ەرتىس وزەنى جاعالاۋىندا دەمالىپ, سۋعا تۇسەدى.
قازىر وزەن جاعالاۋلارىنداعى 26 جاعاجايدا 99 قۇتقارۋشى, جەدەل-قۇتقارۋ جاساعىنىڭ قىزمەتكەرلەرى كەزەكشىلىكتە. وبلىستىق دەنساۋلىق ساقتاۋ باسقارماسىنىڭ مالىمەتىنشە, بيىلعى جىلدىڭ 6 ايى ارالىعىندا جاس ەرەكشەلىكتەرى ءارتۇرلى 7 بالا سۋعا كەتكەن, 5 بالا بيىكتىكتەن قۇلاعان. باسقارما اتا-انالاردان بالالاردى قاراۋسىز قالدىرماۋدى سۇرايدى.
فاريدا بىقاي,
«ەگەمەن قازاقستان»
پاۆلودار
