مەملەكەتتىك قىزمەت سالاسىن باقىلاۋ باسقارماسىنىڭ باسشىسى نۇربول دولداشەۆ ءوز بايانداماسىندا مەملەكەتتىك قىزمەتتى تاڭداعان ادامنىڭ قوعامعا ۇلگى بولۋى قاجەتتىگىنە ەرەكشە توقتالدى. «مەملەكەتتىك قىزمەتشىگە قويىلار تالاپ جوعارى. ادەپ كەڭەسىندە ءبىز مەملەكەتتىك قىزمەتشىلەرگە قاتىستى ءتۇرلى جايتتاردى قاراستىرامىز. سىزدەردىڭ الدارىڭىزعا كەلىپ ءتۇسىندىرۋ جۇمىستارىن جۇرگىزۋىمىزدىڭ نەگىزگى ماقساتى – قورقىتىپ, ۇركىتۋ ەمەس, ءتۇرلى بولىپ جاتقان قيتۇرقى ارەكەتتەردى مىسال رەتىندە ايتا وتىرىپ, بولۋى ىقتيمال كەلەڭسىز جايتتاردىڭ الدىن الۋ. ادەپ كەڭەسى مەملەكەتتىك قىزمەشىلەردى ايىپتاپ, جازاعا تارتۋدى ماقسات تۇتپايدى. ماسەلەنىڭ انىق-قانىعىنا كوزىن جەتكىزىپ بارىپ شەشىم شىعارادى. كىنالى بولماعان جاعدايدا, نەگىزسىز ايىپ تاعىلعان كەزدەردە مەملەكەتتىك قىزمەتشىنىڭ قۇقىعىن قورعايمىز, دەدى نۇربول امانگەلدى ۇلى.
سىبايلاس جەمقورلىق پروفيلاكتيكاسى باسقارماسىنىڭ باس مامانى شىڭعىس يبراەۆ 2015-2025 جىلدارعا شاقتالعان سىبايلاس جەمقورلىققا قارسى ستراتەگيانىڭ ماقسات-مىندەتتەرى تۋرالى ەگجەي-تەگجەيلى بايانداپ بەردى.
«قازاقستان الەمدىك قاۋىمداستىقتىڭ جاۋاپتى مۇشەسى رەتىندە جەمقورلىق دەرتىنىڭ الدىن الۋعا باسا ءمان بەرەدى. قازىرگى كۇنى تاجىريبە كورسەتىپ وتىرعانداي پروفيلاكتيكالىق جۇمىستار نەعۇرلىم ءجيى جۇرگىزىلەتىن ەلدەردە پاراقورلىق فاكتىلەرى از. سوندىقتان ءبىز كۇندەلىكتى 4-5 ۇجىممەن كەزدەسۋلەر وتكىزەمىز, دەدى شىڭعىس مارات ۇلى.
ايتا كەتەيىك, ماڭعىستاۋ وبلىسى بويىنشا ەكولوگيا دەپارتامەنتىنىڭ نەگىزگى مىندەتتەرى – جوبالارعا مەملەكەتتىك ەكولوگيالىق ساراپتاما جاساۋ, تابيعات پايدالانۋشىلارعا قورشاعان ورتاعا ەميسسياعا رۇقسات بەرۋ, قورشاعان ورتانىڭ قۇرامداس بولىكتەرىنە زەرتحانالىق تالداۋ-باقىلاۋ جۇرگىزۋ بولىپ تابىلادى.
دەپارتامەنت قاۋىپتى قالدىقتاردىڭ پاسپورتىن تىركەۋ, مەملەكەتتىك ەكولوگيالىق ساراپتاما قورىتىندىسىن بەرۋ جانە قورشاعان ورتاعا ەميسسياعا رۇقسات بەرۋ باعىتىندا قىزمەت ەتەدى.
سونداي-اق, ەكولوگيالىق زاڭنامالاردىڭ ساقتالۋى, تابيعات قورعاۋ شارالارىنىڭ ورىندالۋىنا, تابيعات پايدالانۋشىلاردىڭ جاعدايلارىنا جانە ءتارتىپ بۇزۋشىلىلىقتاردى تۇزەتۋگە بەرگەن ەسكەرتپەلەردى ورىنداۋىنا باقىلاۋ جاسايدى.
سوندىقتان دا بۇل سالاداعى جەمقورلىقتىڭ الدىن الۋعا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ەرەكشە كوڭىل بولەدى.
گۇلايىم شىنتەمىرقىزى,
«ەگەمەن قازاقستان»
