«بۇگىندە ەلەكە سازى اۋماعىنداعى 3 نىساندا ءبىر اي بويى قازبا جۇمىستارى جۇرگىزىلىپ جاتىر. ايتا كەتۋ كەرەك, اتقارىلىپ جاتقان ءىستىڭ ايتۋلى ناتيجەسى دە بار. تاريح عىلىمدارىنىڭ دوكتورى زەينوللا ساماشەۆتىڭ مالىمدەۋىنشە, تارباعاتاي تاۋلارىنداعى ەلەكە سازىنداعى 2 نىساننان التىن زاتتار تابىلعان. “بۇل – «التىن ادام» دەگەن ۇعىمعا سايكەس كەلەتىن ەسكەرتكىشتەردىڭ ءبىرى دەپ ايتۋعا بولادى”, - دەيدى عالىم.
قازىرگى ۋاقىتتا 3000-عا جۋىق التىن بۇيىم تابىلعان. بولجام بويىنشا ساق داۋىرىندەگى, ياعني, ب.ز.د 8-7 عاسىرعا جاتاتىن بەكزادالار مەن حانشايىمدارعا تيەسىلى زاتتار بولۋى مۇمكىن. اسىرەسە, ايەل ازاماتتارىنىڭ التىن اشەكەيلەرى, ءار فورماداعى مونشاقتار جانە كيىمدەرىنە ارنالعان جاپسىرمالار مەن قاپسىرمالار وتە كوپ. سونىمەن قاتار التىننان سوعىلعان ات ابزەلدەرى دە بار.
“سول داۋىردەگى شەبەرلەردىڭ التىن بۇيىمداردى جاساۋ تەحنولوگياسى تاڭقالدىرادى. زەرگەرلەر دياگونالى 1 مم بولاتىن التىن مونشاقتاردى تەسىپ, كيىمدەردى كومكەرگەن. بۇل دەگەنىڭ سول زامانداعى جوعارى مادەنيەت پەن وزىق تەحنولوگيانىڭ قولدانىستا بولعاندىعىن, ياعني ولاردىڭ عاجايىپ دالا وركەنيەتىنىڭ يەسى ەكەندىگىن ايعاقتايدى”,-دەيدى ارحەولوگتار» دەلىنگەن وبلىس اكىمىنىڭ ءباسپاسوز قىزمەتى تاراتقان اقپاراتتا.
اتالعان قازبا جۇمىستارىنىڭ جەتەكشىسى زەينوللا ساماشەۆ ءدال قازىرگى ۋاقىتتا جولدا بولعاندىقتان بايلانىسقا شىعا الماي وتىرمىز. الداعى بىرەر ساعاتتار كولەمىندە تارباعاتايدان تابىلعان التىن بۇيىمدار تۋرالى تاپتىشتەپ جازاتىن بولامىز.
ازامات قاسىم,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى
سۋرەتتەردى تۇسىرگەن تىلەۋبەك شاياحمەت
