كارىپبەك كۇيىكوۆپەن بىرگە اۋستراليالىق دجەفري لي جانە ۇلىبريتانيالىق ليندا ۋولكەر سىيلىققا لايىق دەپ تانىلعان. تاعى ەكى سىيلىقتى فرانتسۋز سۋرەتشىلەرىنىڭ جۇبى ديدە جانە پولەت انگەرگە جانە ولاردىڭ اۋستريالىق ارىپتەسى پيتەر ۆەيشكە بۇيىرعان.
«بۇل سىيلىق – بۇكىل قازاقستاننىڭ ەڭبەگى! بۇل – ەلىمىزدىڭ, اتوم جوباسىنىڭ باستاماشىسى – پرەزيدەنت نۇرسۇلتان نازارباەۆتىڭ ۇلكەن جانە اۋىر جۇمىسىنىڭ باعاسى. رەسپۋبليكامىز ءوزىنىڭ جەكە ۇلگىسىمەن يادرولىق اتومدى تاراتپاۋ جانە قارۋسىزدانۋ ءۇشىن قالاي كۇرەسۋ قاجەتتىگىن كورسەتتى, سونداي-اق يادرولىق بولاشاق ءۇشىن نەمەسە وعان قارسى شەشىم قابىلداۋ ماسەلەسىندە قوبالجىعان الەمنىڭ باسقا مەملەكەتتەرى ءۇشىن تىرەك بولدى», دەدى ك.كۇيىكوۆ.
اتوم جوباسى – جاھاندىق يادرولىق قارۋسىزدانۋ مەن قوعامدىق ديپلوماتيا سالاسىندا قازاقستان رەسپۋبليكاسىنىڭ پرەزيدەنتى ن.نازارباەۆتىڭ ماڭىزدى باستاماسى. بۇل باستاما بۇۇ جاريالاعان حالىقارالىق يادرولىق سىناقتارعا قارسى ارەكەتتەر كۇنى 2012 جىلعى 29 تامىزدا استانادا «يادرولىق سىناقتارعا تىيىم سالۋدان – يادرولىق قارۋدان ازات الەمگە» حالىقارالىق كونفەرەنتسياسىندا جاريالانعان بولاتىن.
قازىرگى ۋاقىتتا الەمنىڭ 100 ەلىنەن 300 000-نان اسا ادام يادرولىق سىناقتارعا جاپپاي تىيىم سالۋ تۋرالى شارتتىڭ (دۆزياي) ءوز كۇشىنە جەدەل ەنۋىن قامتاماسىز ەتۋ جونىندە الەم ليدەرلەرىنە ارنالعان ۇندەۋ مەن اتوم جوباسىنىڭ ونلاين-پەتيتسياسىنا قول قويعان.
باعاشار تۇرسىنباي ۇلى,
«ەگەمەن قازاقستان»
