كونگرەستىڭ اشىلۋىندا مادەنيەت جانە سپورت ۆيتسە-ءمينيسترى اقتوتى رايىمقۇلوۆا: ء«بىز بۇكىل الەم ساۋلەتشىلەرىنىڭ شىعارماشىلىعىنا زور قۇرمەت بىلدىرە وتىرىپ, ءاردايىم جاڭا جوبالاردى قۋانا كۇتەمىز, ەلىمىز ەڭ ساۋلەتتى ەلدەردىڭ ءبىرى بولۋى ءۇشىن جۇمىس ىستەۋگە ءاردايىم ءازىرمىز» دەگەن ەدى.
سوعان وراي جاس ساۋلەتشىلەر مەن ستۋدەنتتەر اراسىندا ستارتاپ ۋيكەند فورماتىندا «قالالىق ورتا: «اقىلدى» اۋدان» بايقاۋىنىڭ ءوتىپ جاتقانىن دا ايتقان بولاتىنبىز. قورىتىندى جيىندا بايقاۋ جەڭىمپازدارى ماراپاتتالدى.
سونىمەن تۇرعىندار ءۇشىن قىسقى جىلىجاي كەشەندەرىن جاساۋدى ۇسىنعان «Sredalab» كومانداسى گران-پري يەلەندى. ال قالاداعى كولىك تۇراقتارى ءۇشىن AirBnB بالاماسىن جاساۋدى ۇسىنعان «Nurcelona» كومانداسى ءبىرىنشى ورىندى السا, قالالىق درەناج جۇيەلەرىن ۇسىنعان «RainTech» كومانداسى ەكىنشى ورىن يەگەرى اتاندى. مۇمكىندىگى شەكتەۋلى جاندار ءۇشىن ات-مەكتەپ قۇرۋدى ۇسىنعان «ات مەكتەبى» كومانداسى ءۇشىنشى ورىندى ەنشىلەدى. «King Wins» كومانداسى بولسا استانا اكىمىنىڭ ارنايى سىيلىعىمەن ماراپاتتالدى.
Astana Innovations باسقارما توراعاسى ولجاس سارتاەۆ جەڭىمپازداردىڭ ءوز يدەيالارىن «اقىلدى» اۋدان جوباسى اياسىندا ىسكە اسىرۋعا مۇمكىندىكتەرى بولاتىنىن ايتا كەلىپ: «بۇگىندە «جاستار» شاعىن اۋدانىندا ءۇش باعىت بويىنشا بىرنەشە تەحنولوگيا ەنگىزىلگەن. مىسالى جىلىجاي كەشەندەرى تۋرالى ايتساق. ولاردى ىسكە اسىرۋ ءۇشىن ءۇش-ءتورت اي ۋاقىت كەرەك. ءبىز ءوز تاراپىمىزدان باعالاپ, بيىل ەڭ بولماسا ءبىر جىلىجايدى شاعىن اۋدانعا شىعارۋعا تىرىسامىز», دەدى.
وسى شارا اياسىندا استانا قالاسى اكىمىنىڭ ورىنباسارى ماليكا بەكتۇروۆا دا قالاداعى «اقىلدى» جۇيە تۇرعىندار ءۇشىن قالاي قولايلى بولۋى كەرەكتىگى تۋرالى ايتىپ: ء«بىز العاش رەت ساۋلەتشىلەر كونگرەسى مەن «اقىلدى» قالا بويىنشا بولىگىن استانانىڭ دامۋدىڭ كەلەسى كەزەڭىنە وتكەنىن كورسەتۋ ءۇشىن بىرىكتىردىك. بۇل جاي عانا قۇرىلىستار ەمەس, ءۇي «اقىلدى» بولۋى ءۇشىن ەندى ءبىز ەنەرگيالىق ءتيىمدى عيماراتتار سالىپ, ماتەريالداردى, وزىق تەحنولوگيالاردى پايدالانعىمىز كەلەدى. قالا ءوسىپ كەلە جاتىر, ونىڭ تيىمدىلىگى دە ارتا ءتۇسۋى ءتيىس», دەگەن بولاتىن.
جان-جاقتى تالقىلاۋ, قىزۋ پىكىرتالاس, جاڭا تەحنولوگيا مۇمكىندىكتەرى تۋدىرعان نەبىر وزىق ويلار ورتاعا سالىنعان اتالمىش جيىن سوڭىنا دا كەلىپ جەتتى. مادەنيەت جانە سپورت مينيسترلىگى جينالىس زالىندا كونگرەسس جۇمىسىنىڭ قورىتىندىسىنا ارنالعان ءباسپاسوز كونفەرەنتسياسى ءوتتى.
جينالىس تىزگىنىن العان ساۋلەتشىلەر وداعى حالىقارالىق قاۋىمداستىعىنىڭ پرەزيدەنتى سەرىك رۇستەمبەكوۆ ءسوزىن: «ساۋلەت ونەرى وسى ومىردەگى بار ونەردىڭ «اناسى» بولىپ تابىلادى. سۋرەت سالۋ, ءمۇسىن جاساۋ بولسىن ولاردىڭ بارلىعى باستاۋىن ساۋلەت ونەرىنەن الادى. جالپى, كۇنى بۇگىنگە دەيىن مادەنيەت مينيسترلىگىنىڭ باسشىلىعىنا ولار بىزبەن دۇرىس جۇمىس ىستەمەيدى دەپ شاعىمداناتىنبىز. بۇگىندە بۇل ولقىلىقتىڭ ورنى تولتىرىلدى. مادەنيەت جانە سپورت مينيسترلىگى استانانىڭ 20 جىلدىعىن اتاپ ءوتۋ اياسىندا ءبىزدىڭ وسىنداي اۋقىمدى شارا وتكىزۋىمىزگە كومەكتەستى. بولاشاقتا بۇل داستۇرگە اينالادى دەگەن ويدامىز», دەگەن ريزاشىلىق لەپپەن باستادى. ءارى قاراي ءتورت كۇن بويى وتكەن جيىندا ساۋلەت ونەرى سالاسىنداعى زاماناۋي تەندەنتسيالار جانە وزگە دە كوپتەگەن تاقىرىپتار ءسوز بولعانىن قىسقاشا ايتىپ ءوتتى.
«وتكەن ءجۇز جىلدىقتا جانە 21 عاسىردا جاپان دالادا سالىنعان قالالار ساۋساقپەن سانارلىقتاي. مىسالى اۋسترالياداعى كاندرا, برازيليانىڭ جاڭا قالاسى – برازيليا جانە ءبىزدىڭ استانا. كونگرەستىڭ جۇمىسى بارىسىندا وسى ءۇش قالانىڭ اراسىنداعى ۇندەستىك پەن ايىرماشىلىق ءوزارا سالىستىرىلدى. شەتەلدەن كەلگەن ساراپشىلاردىڭ بارلىعى دەرلىك استانانىڭ ساۋلەتىنە ريزاشىلىقتارىن ءبىلدىرىپ وتىر», دەدى ول.
سونىمەن بىرگە ساۋلەتشىلەر كونگرەسىندە ەۋرازيا ساۋلەتشىلەر اكادەمياسىن قۇرۋ باستاماسى كوتەرىلگەنىن تىلگە تيەك ەتتى.
ۇلاربەك نۇرعالىم ۇلى,
«ەگەمەن قازاقستان»
