بۇل شارانىڭ ماقساتى – كوحلەارلى يمپلانت جۇيەسى ورناتىلعان بالالاردى الەۋمەتتىك ورتاعا بەيىمدەپ, ەستۋ جانە سويلەۋ قابىلەتتەرىن جەتىلدىرە وتىرىپ, سوزدەردىڭ ماعىناسىن ەركىن ءتۇسىنىپ, سوزدىك قورلارىن دامىتۋ. 15 تاۋلىك بويى وتەتىن وڭالتۋ شاراسىندا ورتالىق بولىمشەلەرىنەن ارنايى شاقىرتىلعان سۋردوپەداگوگ, لوگوپەد, پسيحولوگ ماماندار 10 جانە 15 جاس ارالىعىنداعى 31 بالاعا قاجەتتى كومەك جاساماق. ەستۋ قابىلەتى زاقىمدانعان بالالاردىڭ سويلەۋ پروتسەسسورلارىن باپتاۋ, قارىم-قاتىناستىق داعدىلارىن قالىپتاستىرۋ, كوحلەارلى يمپلانت اپپاراتىمەن قورشاعان ورتانىڭ دىبىستارىن ەستۋ ارقىلى قابىلداۋ قاسيەتتەرىن جەتىلدىرۋ, تىلدىك قابىلەتتەرىن دامىتۋ, اۋىزشا سويلەۋ قابىلەتتەرىن, بەيۆەربالدى وي-ورىستەرىن دامىتۋ, وڭالتۋ باعدارلاماسىنا كىرەتىن زەردەلى ويىندار جانە اتا-انالارعا پسيحولوگيالىق كومەك بەرۋ قىزمەتتەرى اتقارىلاتىن بولادى.
مامانداردىڭ پايىمداۋىنشا, كوحلەارلى يمپلانت جۇيەسى ورناتىلعان بالالاردىڭ ەستۋ جانە سويلەۋ قابىلەتتەرىن دامىتۋ جۇمىستارى ايتارلىقتاي ناتيجە بەرۋى ءۇشىن سالا ماماندارى جانە اتا-انالاردىڭ تىعىز قارىم-قاتىناسى قاجەت. ال الەۋمەتتىك وڭالتۋ ورتالىعى بالالاردى وڭالتۋدا جوعارى ناتيجەگە جەتەلەيتىن وزىندىك ء«ۇمىت وشاعى» ءرولىن اتقارۋدا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىمەن جۇزەگە اسىپ وتىرعان بۇل شارا, ەرەكشە قاجەتتىلىككە مۇقتاج بالالارعا كوممۋنيكاتيۆتىك داعدىلارىن دامىتۋمەن قاتار, ولاردىڭ قوعامدىق ومىرگە بىرتىندەپ ەنۋلەرىن تەزدەتىپ, اتا-انالارىنا دا جەڭىلدىك اكەلىپ وتىر.
