ءيا, ءبىز ايتىپ وتىرعان ماقتارال اۋدانى جەتىساي قالاسىنداعى باۋىرجان مومىش ۇلى اتىنداعى №6 مەكتەپ-گيمنازيا تۇلەكتەرىنىڭ بيىل 50-ءى «التىن بەلگى», 17-ءسى «ۇزدىك اتتەستات» يەگەرى اتانىپ وتىر. 2017-2018 وقۋ جىلىندا 70 وقۋشى مەكتەپ ءبىتىردى, ەندى قانشا پايىزى «التىن بەلگى» الىپ, «ۇزدىك» اتانعانىن ەسەپتەي بەرىڭىز. اتالمىش ءبىلىم وشاعى ءار جىلى باسەكەگە قابىلەتتى ۇرپاق دايارلاپ, ءبىلىم باسەكەسىندە رەسپۋبليكالىق دەڭگەيدە دە جوعارى ورىننان كورىنىپ كەلەدى.
مەكتەپ-گيمنازيانىڭ ديرەكتورى, «قۇرمەت» وردەنىنىڭ يەگەرى ءومىرحان قوزىباقتىڭ ايتۋىنشا, وتكەن جىلى دا مەكتەپ 40 «التىن بەلگى», 25 «ۇزدىك اتتەستات» يەگەرلەرىن شىعارىپ, جوعارى جەتىستىككە جەتكەن. «وقۋشىلارىمىزدىڭ بىلىمگە دەگەن ىنتا-تالابى جوعارى. قورىتىندى اتتەستاتتاۋ ەمتيحاندارىنا ۇلكەن جاۋاپكەرشىلىكتە دايارلىقپەن كەلىپ, وتە جاقسى تاپسىردى. ۇبت كەزىندە ءار بالا تاعدىرىنا الاڭدايمىز. دەگەنمەن سىننان سۇرىنبەي جاقسى بالل جينايتىندارىنا سەنىمدى بولامىز. ويتكەنى 11-سىنىپ وقۋشىلارىن جىل بويىندا ۇبت-عا دايارلاۋ ماقساتىندا 94 تەست الىنىپ, ورتا كورسەتكىشىمىز 120 بالدى قۇراعان بولاتىن. تۇلەكتەرىمىز وسى دەڭگەيدى دالەلدەپ تە كەلەدى», – دەيدى ءو.قوزىباق.
راسىندا دا اۋدانداعى ۇزدىك ءبىلىم ۇياسى سانالاتىن ب. مومىش ۇلى مەكتەپ-گيمنازياسىنىڭ تۇلەكتەرى ورتاشا 119,8 بال كورسەتكىشىمەن وبلىستا دا ۇزدىكتەر قاتارىنان كورىندى. جالپى, ماقتارال اۋدانىندا ۇلتتىق بىرىڭعاي تەستىلەۋ قورىتىندىسى بويىنشا ورتاشا كورسەتكىش 75,8 بالل بولدى. بۇل بىلتىرعى جىلمەن سالىستىرعاندا 5,3 بالعا جوعارى. 518 تۇلەك 100 جانە ودان جوعارى بالل جيناسا, «دارىن» مەكتەپ-ينتەرناتىنىڭ وقۋشىسى مەيىربەك قازىبەك 138 بالمەن كوش باستادى. ايتا كەتەيىك, بيىل ماقتارال اۋدانىندا 4524 تۇلەك مەكتەپ بىتىرسە, سونىڭ 2807-ءى ۇلتتىق بىرىڭعاي تەست تاپسىرۋعا ءوتىنىش بەرگەن بولاتىن. وتكەن جىلى اۋداندا 189 «التىن بەلگى» يەگەرى شىقسا, بيىل 211 وقۋشى «التىن بەلگى» يەگەرى اتانىپ وتىر. سونداي-اق 2017 جىلى 84 وقۋشى 120 جانە ودان جوعارى بالل جيناسا, بيىل 187 وقۋشى 120 بالدان جوعارى كورسەتكىشكە يە بولعان.
عالىمجان ەلشىباي,
«ەگەمەن قازاقستان»
تۇركىستان وبلىسى
