سالتاناتتى جيىندى اشقان قازۇۋ رەكتورى, اكادەميك عالىمقايىر مۇتانوۆ اسقار زاكاريننىڭ وتاندىق جوعارى ءبىلىمدى دامىتۋعا قوسقان زور ۇلەسى جايلى ءسوز قوزعادى. قابىرعالى قايراتكەر عىلىمي مەكتەپ قۇرىپ, سوڭىنان شاكىرت ەرتتى, وقۋ ورنىنىڭ حالىقارالىق عىلىمي بايلانىستارىن دامىتتى, ستۋدەنتتىك قالاشىقتىڭ نەگىزىن قالادى, مەحانيكا-ماتەماتيكا فاكۋلتەتىنىڭ جاڭا عيماراتىن تۇرعىزدى. ا.زاكارين گيدروبيولوگيا, يحتيولوگيا, مەتەورولوگيا, جوعارى ماتەماتيكا, ورىس فيلولوگياسى, قاتتى دەنەلەر فيزيكاسى جانە باسقا جاڭا كافەدرالاردىڭ, جوعارى وقۋ ورىندارى ءۇشىن بىلىكتىلىكتى ارتتىرۋ فاكۋلتەتى مەن فيلوسوفيا-ەكونوميكا فاكۋلتەتىنىڭ, ستۋدەنتتەردىڭ مۇحتار اۋەزوۆ اتىنداعى ادەبي بىرلەستىگى مەن «جەتى مۋزا» قوعامىنىڭ اشىلۋىنا مۇرىندىق بولدى.
اسقار زاكاريا ۇلىنىڭ عالىم, ۇيىمداستىرۋشى جانە تۇلعا رەتىندەگى بەينەسىن ونىڭ بەل بالاسى, مەملەكەتتىك سىيلىقتىڭ لاۋرەاتى, فيزيك-عالىم ەدىگە زاكارين تەبىرەنە ەسكە الدى. پروفەسسور ا.زاكارين مەملەكەت قايراتكەرى رەتىندە تالاي اسۋدان ءوتىپ, قازاق كسر جوعارعى كەڭەسىنىڭ توراعاسى, قازاقستان ۇكىمەتى توراعاسىنىڭ ورىنباسارى, وقۋ-اعارتۋ ءمينيسترى, سىرتقى ىستەر ءمينيسترى, قازاق كسر جوعارعى كەڭەسىنىڭ دەپۋتاتى قىزمەتتەرىن ابىرويمەن اتقارعانىن تىلگە تيەك ەتكەن ەدىگە اسقار ۇلى القالى جيىندى ۇيىمداستىرعان ۋنيۆەرسيتەت باسشىلىعىنا العىسىن ءبىلدىردى.
جيناقتىڭ باس رەداكتورى, اكادەميك ع.مۇتانوۆتىڭ العىسوزىمەن اشىلعان كىتاپقا اسقار زاكاريننىڭ ماسكەۋدە جارىق كورگەن ىرگەلى عىلىمي جۇمىستارىمەن قاتار ونىڭ قازاق تىلىندە تالاپكەر جاستارعا ارناپ جازعان «گەومەتريانىڭ العاشقى ۇعىمدارى», «تەڭدەۋلەر مەن توپتار», «افيندىك گەومەتريا» سياقتى ەڭبەكتەرى, ەۆاريست گالۋا, نيلس گەنريك ابەل, البەرت ەينشتەين سىندى ۇلى عالىمدار جايىنداعى جازبالارى ەنگەن. جيناقتا سونداي-اق اكادەميكتەر ومىرزاق سۇلتانعازين, يسا بايتۋلين, زۇلقايىر مانسۇروۆ جانە تولەگەن قوجامقۇلوۆتىڭ قايراتكەر تۋرالى ماقالالارى, بەلگىلى جازۋشى-جۋرناليست قايسار ءالىمنىڭ «زاڭعار زاكارين» اتتى كولەمدى وچەركى, اقىن سەرىك تۇرعىنبەكوۆتىڭ ەستەلىگى, ۋنيۆەرسيتەتتىڭ كافەدرا مەڭگەرۋشىسى جەتپىسباي بەكبولات ۇلىنىڭ «پارىزعا ادالدىق» اتتى عۇمىرنامالىق بايانى بەرىلگەن.
قوڭىر مۇقاتاەۆا,
ءال-فارابي اتىنداعى قازۇۋ دوتسەنتى
