شيرەك فينالدان سوڭ, ۇزدىك 15-ءى ىرىكتەلىپ, كەلەسى كەزەڭگە ءوتتى. 23 جاستاعى ەرنار سادىرباەۆ اۋەلى نۇرعيسا تىلەنديەۆتىڭ «قۇستار ءانىن» شىرقاپ, ەكىنشى كۇنى وركەستردىڭ سۇيەمەلدەۋىمەن رايموند ءپاۋلستىڭ «پودبەري مۋزىكۋ» جانە روكوپەرا موتسارتتىڭ «يا سپليۋ نا روزاح» اتتى شىعارمالارىن ورىنداعان. فەستيۆالدا قازاقستاننىڭ حالىق ءارتىسى روزا رىمباەۆا مەن ديماش قۇدايبەرگەن تورەلىك ەتتى. ەسكە سالساق, ديماش قۇدايبەرگەن 2015 جىلى ۆيتەبسكىدە وتكەن «سلاۆيان بازارى» حالىقارالىق ءان فەستيۆالىندە باس جۇلدەنى يەلەنگەن بولاتىن.
جيىرما جەتىنشى رەت وتكىزىلگەن حالىقارالىق ونەر فەستيۆالىنىڭ گران-پري جۇلدەسى رۋمىنيانىڭ ءانشىسى مارچەل روشكاعا بۇيىردى. روشكا مەن ەرنار سادىرباەۆتىڭ ۇپايلارى بىردەي بولعان (156 بالل). الايدا, قازىلار القاسىنىڭ توراعاسى الەكساندر موروزوۆتىڭ شەشىمىمەن باس جۇلدە رۋمىنيالىققا بەرىلدى.
ەكىنشى ورىندى ۋكراينا, ءۇشىنشى ورىندى پولشا مەن بەلارۋس ەلدەرىنىڭ انشىلەرى العان. بۇل – ەرنار سادىرباەۆتىڭ حالىقارالىق دارەجەدەگى ءۇشىنشى ءىرى جەڭىسى. بۇعان دەيىن پراگا قالاسىندا وتكەن ەكى بىردەي حالىقارالىق ءان بايقاۋىنان گران-پري جۇلدەسىن ۇتىپ العان.
1995 جىلدان باستاپ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ جەكە قولداۋىمەن وتەتىن فەستيۆال حالىقتار اراسىنداعى مادەني ديالوگتىڭ قالىپتاسۋىنا ىقپال ەتەتىن مادەني شارا بولىپ ەسەستەلەدى. فەستيۆال كۇندەرى بەلارۋس, رەسەي, ۋكراينا ەلدەرىنىڭ ونەر يەلەرىنىڭ گالا-كونتسەرتى, «شەكاراسىز فەستيۆال», «تەاتر كەزدەسۋلەرى», «جۇلدىزدى ءسات» باعدارلامالارى وتكىزىلەدى. بيىلعى «شەكاراسىز فەستيۆال» قازاقستاننىڭ ونەر شەبەرلەرىنە ارنالعان بولاتىن. سونىمەن قاتار, بەلارۋس پرەزيدەنتى الەكساندر لۋكاشەنكو «سلاۆيان بازارى» فەستيۆالىنىڭ سالتاناتتى اشىلۋ راسىمىندە ءانشى روزا رىمباەۆاعا «ونەر ارقىلى – بەيبىتشىلىك پەن ءوزارا تۇسىنىستىككە» ارنايى ماراپاتىن تابىس ەتتى, ءانشى بۇل ماراپاتتىڭ بەرىلىۋى ونىڭ شىعارماشىلىعىن مويىنداۋ دەپ قانا ەمەس, قازاقستاننىڭ ونەرىنە قۇرمەت كورسەتۋ ەكەندىگىن اتاپ ءوتتى. «بەلارۋس پەن قازاقستاننىڭ قارىم-قاتىناسى ءاردايىم جىلى بولعان. ءبىز ونى جىلدار بويى ساقتاپ قالدىق», دەدى روزا رىمباەۆا.
ال ۆيتەبسكىگە قازىلار القاسىنىڭ مۇشەسى رەتىندە كەلىپ, فەستيۆال اياسىندا ءان شىرقاعان ديماش ازيا-تىنىق مۇحيت ايماعىنىڭ ەڭ تانىمال ارتىستەرىنىڭ تىزىمىندە تاعى كوش باستاپ تۇر.
باعاشار تۇرسىنباي ۇلى,
«ەگەمەن قازاقستان»
